ខេត្តបាត់ដំបង ៖ រថយន្តស៊េរីទំនើបមួយគ្រឿង ត្រូវបានអគ្គិភ័យឆាបឆេះអស់គ្មានសល់ ក្រោយពីបើកបុកយ៉ាងពេញទំហឹងឡើងខឿនរង្វង់មូលផ្លូវហាយវ៉េ កាលពីវេលាម៉ោង៤ទៀបភ្លឺថ្ងៃទី៣១ កក្កដា នេះ ស្ថិតនៅចំណុចភូមិកគោ ឃុំជ្រៃ…
ខេត្តបាត់ដំបង ៖ រថយន្តស៊េរីទំនើបមួយគ្រឿង ត្រូវបានអគ្គិភ័យឆាបឆេះអស់គ្មានសល់ ក្រោយពីបើកបុកយ៉ាងពេញទំហឹងឡើងខឿនរង្វង់មូលផ្លូវហាយវ៉េ កាលពីវេលាម៉ោង៤ទៀបភ្លឺថ្ងៃទី៣១ កក្កដា នេះ ស្ថិតនៅចំណុចភូមិកគោ ឃុំជ្រៃ ស្រុកថ្មគោល តែគេពុំទាន់ដឹងពីមូលហេតុពីអ្នកបើកបរនៅឡើយទេ ។
តាមរបាយការណ៍បានឲ្យដឹងថា រថយន្តជួបគ្រោះថ្នាក់នេះម៉ាក LEXUS GS 300 ពណ៌ខ្មៅ ស៊េរីឆ្នាំ២០០៦ ពាក់ស្លាកលេខភ្នំពេញ 2-AW 7725 តែគេមិនស្គាល់អត្តសញ្ញាណអ្នកបើកបរទេ ព្រោះពេលកើតហេតុអ្នកបើកបរនៅមានជីវិតហើយបានគេចខ្លួនបាត់ពីកន្លែងកើតហេតុភ្លាមៗដែរ ។
នាយប៉ុស្ដិ៍រដ្ឋបាលឃុំជ្រៃ លោក ហង្ស សីហា បានឲ្យដឹងថា រថយន្តដែលត្រូវភ្លើងឆេះនេះ បានធ្វើដំណើរពីទិសខាងកើតឆ្ពោះទៅលិច បែបទំនងលឿនគួរសម លុះទៅដល់ចំណុចកើតហេតុក៏ជួបគ្រោះថ្នាក់តែម្ដង ។ លោកមេប៉ុស្ដិ៍បានប្រាប់ថា បើពិនិត្យលើស្លាកស្នាមកង់រថយន្តនៅកន្លែងកើតហេតុ រថយន្តនេះទំនងបម្រុងបត់ឆ្វេង តែដោយសារបើកលឿនពេក ក៏ជ្រុលបុកពេញទំហឹងរហូតឡើងលើខឿនរង្វង់មូល ត្រង់ចំណុចផ្លូវប្រសព្វហាយវ៉េ បណ្ដាលឲ្យក្រឡាប់ជាច្រើនត្រឡប់បង្កជាអគ្គិភ័យឆាបឆេះតែម្ដង ។
លោកនាយប៉ុស្ដិ៍ដដែលបានបញ្ជាក់ថា ពេលដែលអគ្គិភ័យកំពុងឆាបឆេះរថយន្ត គេឃើញម្ចាស់រថយន្តបានដើរឆ្វែលរថយន្ត តែបន្តិចក្រោយក៏បាត់ម្ចាស់រថយន្តនេះភ្លាមៗដែរ ។ បើតាមប្រភពពីសាក្សីដែលព្យាយាមជួយអន្តរាគមន៍ភ្លាមៗបាននិយាយថា ពេលរថយន្តនោះក្រឡាប់ភ្លាម អ្នកដំណើរបានព្យាយាមចូលជួយសង្គ្រោះមនុស្ស ក្រែងមានជាប់ក្នុងរថយន្ត តែពេលនោះ គេឃើញមានមនុស្ស០៣នាក់ ក្នុងនោះមានស្ត្រី០២នាក់ផង បានដើរឆ្វែលមើលរថយន្ត ។
ប៉ុន្តែភ្លាមៗស្រាប់តែអគ្គិភ័យបានកើតឡើងឆេះរថយន្តគ្មានសល់ ហើយមនុស្ស០៣នាក់នោះ ក៏គេចខ្លួនបាត់ពីកន្លែងកើតហេតុភ្លាមៗដែរ ។ បើតាមសាក្សីដដែលបានបញ្ជាក់ថា រថយន្តនេះបានបើកលឿន ហើយទំនងបម្រុងបត់ឆ្វេង តែបើកលឿនពេកក៏ជ្រុលបុកនិងឡើងខឿនរង្វង់ក្រឡប់ជាច្រើនត្រឡប់ផ្ងារជើងឆេះខ្ទេច តែសំណាងល្អពុំមានគ្រោះថ្នាក់ដល់មនុស្ស៕
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ