ខេត្តបាត់ដំបង៖ ជនជាតិចិនម្នាក់មានស្នាមរបួសដៃនិងជើង ហើយស្ថិតក្នុងស្ថានភាពរញីរញ័រ បានរត់ឲ្យអ្នកភូមិជួយ ដោយពុំមានអ្នកដឹងពីមូលហេតុ កាលពីវេលាម៉ោងប្រមាណ៨យប់ថ្ងៃទី២៨ កក្កដា នៅតាមបណ្ដោយផ្លូវហាយវ៉េ (ផ្លូវជាតិលេខ៥) ត្រង់ចំណុច…
ខេត្តបាត់ដំបង៖ ជនជាតិចិនម្នាក់មានស្នាមរបួសដៃនិងជើង ហើយស្ថិតក្នុងស្ថានភាពរញីរញ័រ បានរត់ឲ្យអ្នកភូមិជួយ ដោយពុំមានអ្នកដឹងពីមូលហេតុ កាលពីវេលាម៉ោងប្រមាណ៨យប់ថ្ងៃទី២៨ កក្កដា នៅតាមបណ្ដោយផ្លូវហាយវ៉េ (ផ្លូវជាតិលេខ៥) ត្រង់ចំណុច ភូមិបោះពោធិ ឃុំអូរដំបង១ ស្រុកសង្កែ តែគេសង្ស័យជនជាតិរូបនេះលោតចុះពីរថយន្តក្នុងហេតុការណ៍អ្វីមួយ។
បើតាមប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា ដំបូងគេមិនបានដឹងថា ជនជាតិចិនម្នាក់នេះមានរឿងអ្វីទេ ស្រាប់តែរត់ចុះពីលើថ្នល់ស្រែកឲ្យគេជួយ ដែលមានស្នាមរបួសពេញដៃជើង។ គេមិនដឹងថា ជនបរទេសរូបនេះ ជិះអ្វីទេ ស្រាប់តែសុខស្រែករត់សំដៅចូលផ្ទះអ្នកភូមិក្នុងស្ថានភាពភិតភ័យរញីរញ័រដូចបែកថ្នាំ ពាក់អាវយឿត ស្លៀកខោខ្លីត្រឹមជង្គង់ តែមិនចេះនិយាយភាសារខ្មែរទេ ។
បើតាមភិនភាគ និងយោងលើស្ថានភាពភិតភ័យ ជាមួយនឹងស្នាមរបួសលើរាងកាយ គេសង្ស័យជនជាតិចិនម្នាក់នេះ លោតចុះពីរថយន្តក្នុងហេតុការណ៍អ្វីមួយ ហើយរត់ចូលផ្ទះអ្នកភូមិនៅក្បែរថ្នល់ឲ្យគេជួយ តែពុំមានអ្នកចេះស្ដាប់ភាសារចិនទេ។ អ្នកភូមិបានព្យាយាមទំនាក់ទំនងទៅសមត្ថកិច្ច ដើម្បីឲ្យជួយអន្តរាគមន៍លើជនបរទេសរូបនេះភ្លាមៗដែរ។ សាក្សីមួយចំនួនបាននិយាយថា ជនជាតិចិនដែលមានវ័យប្រហែល៣០ឆ្នាំរូបនេះ ជិះរថយន្តជាមួយបក្សពួកខ្លួន មកទិសខាងលិច ឆ្ពោះទៅទិសខាងកើត ហើយទំនងមានទំនាស់គ្នាធ្ងន់ធ្ងរក្នុងរថយន្ត ទើបមកដល់ចំណុចកើតហេតុ ក៏បើកទ្វារលោតចុះពីរថយន្តរមៀលរបួសពេញរាងកាយតែម្ដង។
អធិការស្រុកសង្កែ លោក យុត តុងហូរ បានផ្ដល់ចម្លើយខ្លីថា លោកមិនទាន់ដឹងពីគោលដៅរបស់ជនបរទេសខាងលើនេះទេ ហើយក៏មិនទាន់ដឹងថា ជនជាតិចិននេះជិះអ្វីឲ្យប្រាកដ ? តើមានរឿងអ្វីកើតឡើង ? គ្រាន់តែដឹងខ្លះៗថា ជនជាតិចិននេះ អាចធ្វើដំណើរពីទិសខាងលិចទៅកើត ព្រោះភ្លាមៗពុំមានអ្នកចេះស្ដាប់ភាសារចិនទេ ។ លោកបានបញ្ជាក់ថា ពេលនាំទៅកាន់អធិការ មន្ត្រីជំនាញបានធ្វើតេស្ដទឹកនោម លទ្ធផលរកឃើញជនជាតិចិនរូបនេះ «មានសារធាតុញៀន»ទៀតផង ។
ប៉ុន្តែយ៉ាងណា លោកអធិការបានបញ្ជាក់ថា មន្ត្រីរបស់លោកបានបញ្ជូនជនជាតិចិនរូបនេះទៅកាន់ការិយាល័យនិតិវិធីហើយ ដើម្បីសាកសួរបន្ត ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ