រាជធានីភ្នំពេញ ៖ សហព័ន្ធកីឡាវ៉ូវីណាមកម្ពុជាកាលពីថ្ងៃទី១០ ឧសភា បានបញ្ជូនកីឡាករ កីឡាការិនីរបស់ខ្លួនចំនួន១៩នាក់ទៅហ្វឹកហាត់បំប៉នបច្ចេកទេសបន្ថែមទៀតនៅទីក្រុងហូជីមិញប្រទេសវៀតណាម។
នៅក្នុងឱកាសជួបសំណេះសំណាល និងពិសាអាហាររួមគ្នាបន្តិចបន្តួចនៅក្នុងហាងកាហ្វេកីឡាដែលស្ថិតនៅខាងត្បូងផ្សារបឹងកេងកងកាលពីល្ងាចថ្ងៃទី៩ ឧសភា លោកឆឹង វ៉ាន់ថូ អនុប្រធានសហព័ន្ធវ៉ូវីណាមកម្ពុជាមានប្រសាសន៍ថា ការទៅហ្វឹកហាត់លើកនេះមានរយៈពេល២ខែគិតចាប់ពីថ្ងៃទី១១ ខែឧសភា តទៅ ។ សហព័ន្ធកីឡាវ៉ូវីណាមកម្ពុជាសម្រេចចិត្តបញ្ជូនកីឡាករ កីឡាការិនីទៅហ្វឹកហាត់លើកនេះគឺដើម្បីត្រៀមចូលរួមប្រកួតនៅក្នុងព្រឹត្តិការណ៍សំខាន់ចំនួន២ គឺត្រៀមចូលរួមប្រកួតកីឡាវ៉ូវីណាមពិភពលោកលើកទី២ដែលធ្វើឡើងនៅទីក្រុងហូជីមិញចាប់ពីថ្ងៃទី២៦ ខែកក្កដាដល់ថ្ងៃទី១ ខែសីហា ២០១១ខាងមុខនេះ។ ចំណែកលើកទី២ គឺជាការត្រៀមចូលរួមប្រកួតកីឡាសីុហ្គេមលើកទី២៦នៅទីក្រុងហ្សាការតានៅខែធ្នូខាងមុខ ។
លោកឧកញ៉ា រ័ត្ន សុខន ប្រធានសហព័ន្ធវ៉ូវីណាមកម្ពុជា និងជាប្រធានសហព័ន្ធវ៉ូវីណាមអាស៊ានធ្លាប់មានប្រសាសន៍ថា គោលបំណងដែលសហព័ន្ធសម្រេចបញ្ជូនកីឡាករ កីឡាការិនីទៅហ្វឹកហាត់នៅវៀតណាមនេះមិនមែនមានន័យថា ការហ្វឹកហាត់នៅស្រុកខ្មែរមិនបានល្អទេ ដោយសារតែការទៅហ្វឹកហាត់នៅទីនោះ គឺមានពេលវេលាច្រើន ការហូបចុកស្នាក់នៅមានភាពល្អប្រសើរ មានវិន័យត្រឹមត្រូវច្បាស់លាស់ ហើយគេមិនបណ្តោយឱ្យយើងដើររហេតរហូតទេ។
លោកបញ្ជាក់ច្បាស់ថា កីឡាករ កីឡាការិនីវ៉ូវីណាមកម្ពុជាធ្លាប់បានបញ្ជូនទៅប្រកួតក្នុងកម្មវិធីអីុនដូហ្គេមនៅទីក្រុងហូជីមិញឆ្នាំមុនម្តងមកហើយ គឺយើងទទួលបានមេដាយ៧ ក្នុងនោះមេដាយមាស១ ប្រាក់៣ សំរឹទ្ធិ៣។ ចំណែកលើកនេះមូលហេតុដែលលោកសម្រេចបញ្ជូនកីឡាករ កីឡាការិនីទៅហ្វឹកហាត់ច្រើនបែបនេះ ព្រោះលោកមានសង្ឃឹមច្រើនក្នុងការទទួលបានមេដាយ។
ក្នុងចំណោមប្រតិភូកីឡាទាំង១៩នាក់នេះមាន៩នាក់ជាកីឡាករអាជីព និង៧នាក់មិនមែនអាជីព និង៣នាក់ផ្សេងទៀតជាគ្រូបង្វឹក និងអ្នកដឹកនាំ។មូលហេតុដែលមានការបែងចែកកីឡាករអាជីព និងមិនមែនអាជីព ព្រោះថា ក្រសួងអប់រំយុវជន និងកីឡាបានផ្តល់សោហ៊ុយធ្វើដំណើរតែសម្រាប់កីឡាករអាជីព៩នាក់ និងគ្រូ២នាក់ប៉ុណ្ណោះ។ ចំណែកក្រៅពីនោះគឺជាការចំណាយរបស់សហព័ន្ធទាំងស្រុង។
ក្នុងឱកាសជួបសំណេះសំណាលនាពេលនោះ លោកអ៊ុក សិទ្ធិជាតិ ប្រធានមជ្ឈមណ្ឌលជាតិហ្វឹកហ្វឺនបានផ្តាំផ្ញើដល់ប្រតិភូកីឡាទាំងអស់ឱ្យខិតខំហ្វឹកហាត់ គោរពវិន័យ សីលធម៌ឱ្យបានល្អឈានទៅទទួលបានជ័យជំនះនៅក្នុងការប្រកួតនាពេលខាងមុខ ហើយលោកជូនពរដល់ការធ្វើដំណើរមានសុវត្ថិភាព។
លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានស្ងើចសរសើរដល់សហព័ន្ធកីឡាវ៉ូវីណាមដែលជាសហព័ន្ធកីឡាថ្មី តែអាចជ្រើសរើសបានកីឡាករល្អៗ ហើយលោកគាំទ្រ១០០ភាគរយរាល់សកម្មភាពរបស់សហព័ន្ធកីឡាមួយនេះ ។ លោកក៏សង្ឃឹមថា វិញ្ញាសានេះនឹងអាចរកបានមេដាយជូនជាតិនៅរាល់ការប្រកួតនៅក្រៅប្រទេស ៕
ចែករំលែកព័តមាននេះ