ខេត្តកំពត ៖ កម្មករសំណង់នៅភ្នំបូកគោដែលឈរមើលទេសភាពនៅលើភ្នំក្រោយវត្ដសំពៅប្រាំបានរអិលជើងធ្លាក់ទៅទើរនៅលើផ្ទាំងថ្មជាប់គល់ឈើ បណ្ដាលឱ្យរបួសក ។
បុរសរងគ្រោះឈ្មោះមឿន ម៉ុច អាយុ២៨ឆ្នាំ មានស្រុកកំណើតនៅភូមិស្នាយអញ្ជិត ឃុំស្នាយអញ្ជិត ស្រុកជុំគិរី បានទៅធ្វើកម្មករសំណង់នៅលើភ្នំបូកគោ
ខេត្តកំពត ៖ កម្មករសំណង់នៅភ្នំបូកគោដែលឈរមើលទេសភាពនៅលើភ្នំក្រោយវត្ដសំពៅប្រាំបានរអិលជើងធ្លាក់ទៅទើរនៅលើផ្ទាំងថ្មជាប់គល់ឈើ បណ្ដាលឱ្យរបួសក ។
បុរសរងគ្រោះឈ្មោះមឿន ម៉ុច អាយុ២៨ឆ្នាំ មានស្រុកកំណើតនៅភូមិស្នាយអញ្ជិត ឃុំស្នាយអញ្ជិត ស្រុកជុំគិរី បានទៅធ្វើកម្មករសំណង់នៅលើភ្នំបូកគោ ។
តាមការរៀបរាប់របស់មិត្ដភក្ដិឈ្មោះសាយ សំណាង អាយុ២៤ឆ្នាំ មានទីលំនៅក្នុងភូមិគោកចំបក់ សង្កាត់ចោមចៅ ខណ្ឌដង្កោ ដែលទៅធ្វើកម្មករសំណង់ជាមួយគ្នា និងជាអ្នកឃើញហេតុការណ៍ឱ្យដឹងថា នៅថ្ងៃអាទិត្យជាថ្ងៃឈប់សម្រាក រូបគេនិងមិត្ដភក្ដិសរុប៥នាក់នាំគ្នាទៅឈរមើលទេសភាពលើកំពូលភ្នំនៅខាងត្បូងវិហារវត្ដសំពៅប្រាំ ។ ទីនោះជាកន្លែងដែលភ្ញៀវទេសចរតែងតែទៅឈរមើលទេសភាព ហើយមានបង្កាន់ដៃព័ទ្ធជុំវិញ ប៉ុន្ដែអ្នកទាំងប្រាំនាំគ្នាទៅឈរមើលនៅក្រៅរបងបង្កាន់ដៃ ព្រោះចង់មើលទេសភាពខាងក្រោម ។ ដោយសារពេលទៅឈរអើតមើលទៅក្រោមឃើញជ្រៅល្ហល្ហេវខ្លាំងពេកក៏នាំគ្នាដើរត្រឡប់មកវិញ ។
ប្រភពដដែលបន្តថា ខណៈពេលដើរមកវិញ ស្រាប់តែឮមឿន ម៉ុចស្រែកថា «រូបគេធ្លាក់ហើយ» ។ មិត្ដភក្ដិទាំងអស់មិនដឹងជាជួយដោយវិធីណា បានត្រឹមតែឈរមើលដោយក្ដីតក់ស្លុតប៉ុណ្ណោះ ។ ពេលមឿន ម៉ុច ធ្លាក់ផុតទៅបាននាំគ្នាទៅអើតមើលឃើញទើរលើផ្ទាំងថ្មដែលលយចេញពីភ្នំប្រមាណ៣ម៉ែត្រ ហើយមានដើមឈើដុះជាប់នឹងផ្ទាំងថ្មនោះ ។ ផ្ទាំងថ្មនោះជាកន្លែងដែលព្រះសង្ឃតែងតែយកសំរាមទៅចាក់ចោលមានកំពស់ប្រមាណ១០ម៉ែត្រចុះពីភ្នំ ។ មិត្តរបស់គេធ្លាក់ទៅទើរជាប់នៅលើផ្ទាំងថ្មកៀបជាប់នឹងដើមឈើ ទើបមិនបណ្ដាលឱ្យធ្លាក់ដល់ក្រោម បើសិនជាធ្លាក់ដល់ក្រោមវិញ សូម្បីតែសាកសពក៏បាក់បែកខ្ទេចខ្ទីអស់ដែរ ។
មិត្ដភក្ដិឃើញហេតុការណ៍ឱ្យដឹងទៀតថា ពួកគេនាំគ្នាតោងវល្លិចុះទៅជួយយកមឿន ម៉ុច ឡើងមកលើ រួចទើបរថយន្ដរបស់អ្នកម៉ៅការនៅលើភ្នំដឹកយកទៅព្យាបាលនៅមន្ទីរពេទ្យព្រះកុសុមៈទាំងយប់តែម្ដង ។ គ្រូពេទ្យបានថតមើល ហើយប្រាប់ថា មានបញ្ហាឆ្អឹងកត្រូវវះកាត់ជាបន្ទាន់ ៕
ចែករំលែកព័តមាននេះ