រាជធានីភ្នំពេញ ៖ អាជ្ញាធរខណ្ឌទួលគោកកាលពីព្រឹកថ្ងៃទី៩ ឧសភា បានជួបប្រជុំមន្ត្រីរាជការ កងកម្លាំងប្រដាប់អាវុធ ដើម្បីជំរុញឱ្យការអនុវត្តន៍នយោបាយភូមិ-ឃុំមានសុវត្ថិភាពទទួលបានជោគជ័យ ធ្វើយ៉ាងណាឱ្យបទល្មើសក្នុងមូលដ្ឋានមានការថយចុះ ព្រមទាំងជំរុញឱ្យមានការរៀបចំសណ្តាប់ធ្នាប់ក្នុងមូលដ្ឋានឱ្យបានកាន់តែល្អប្រសើរ
រាជធានីភ្នំពេញ ៖ អាជ្ញាធរខណ្ឌទួលគោកកាលពីព្រឹកថ្ងៃទី៩ ឧសភា បានជួបប្រជុំមន្ត្រីរាជការ កងកម្លាំងប្រដាប់អាវុធ ដើម្បីជំរុញឱ្យការអនុវត្តន៍នយោបាយភូមិ-ឃុំមានសុវត្ថិភាពទទួលបានជោគជ័យ ធ្វើយ៉ាងណាឱ្យបទល្មើសក្នុងមូលដ្ឋានមានការថយចុះ ព្រមទាំងជំរុញឱ្យមានការរៀបចំសណ្តាប់ធ្នាប់ក្នុងមូលដ្ឋានឱ្យបានកាន់តែល្អប្រសើរ ។
កិច្ចប្រជុំនេះស្ថិតក្រោមអធិបតីភាពលោកសេង រតនៈ អភិបាលខណ្ឌទួលគោក និងមានការចូលរួមពីអភិបាលរង អធិការស្តីទី មេបញ្ជាការកងរាជអាវុធហត្ថខណ្ឌ ចៅសង្កាត់ និងប្រធានផ្សារយ៉ាងច្រើនកុះករ ។ អង្គប្រជុំក៏បានលើកយករបៀបវារៈចំនួន២គឺការងារសន្តិសុខ និងការអភិវឌ្ឍក្នុងមូលដ្ឋាន ។
លោកសេង រតនៈ បានឱ្យដឹងថា គោលនយោបាយភូមិ-សង្កាត់មានសុវត្ថិភាពមានលក្ខណៈ៥យ៉ាងគឺគ្មានចោរលួច-ឆក់-ប្លន់ គ្មានការជួញដូរប្រើប្រាស់គ្រឿងញៀន គ្មានការជួញដូរផ្លូវភេទ គ្មានក្មេងទំនើង និងគ្មានល្បែងស៊ីសង និងបទល្មើសគ្រប់ប្រភេទ ។ កន្លងមកនៅក្នុងមូលដ្ឋានយើង គឺនៅតែមានក្រុមចោរប្លន់ ហើយក្រុមចោរបានប្តូររូបភាពទៅប្លន់ម៉ូតូនៅពេលយប់ ហើយការប្លន់បែបនេះមិនមែនកើតឡើងតែក្នុងខណ្ឌទួលគោកទេ គឺហាក់ដូចជាមានការចាត់តាំង ដូចនេះទាមទារឱ្យយើងយកចិត្តទុកដាក់ចាត់វិធានការដោយផ្លាស់ប្តូរគ្រប់រូបភាពប្រែប្រួលទៅតាមសកម្មភាពនៃក្រុមជនល្មើស ។
លោក សេង រតនៈ ក៏បានសំណូមពរដល់ចៅសង្កាត់ឱ្យពង្រឹងការសហការជាមួយសមត្ថកិច្ចដើម្បីទប់ស្កាត់ឱ្យខាងតែបាន ដោយពង្រឹងការគ្រប់គ្រងផ្ទះជួល ផ្ទះសំណាក់ បើគ្រប់គ្រងផ្ទះជួល ផ្ទះសំណាក់មិនបានកុំសង្ឃឹមទប់ស្កាត់បទល្មើសបានឱ្យសោះ ។ បញ្ហាសណ្តាប់ធ្នាប់ជាបញ្ហាមិនអាចខ្វះបាន ហើយសមត្ថកិច្ចទាំងអស់ត្រូវចូលរួម និងជំរុញការចុះរៀបចំសណ្តាប់ធ្នាប់ ។ អាជ្ញាធរសង្កាត់ទាំង១០ត្រូវយកចិត្តទុកដាក់ បើកន្លែងណាមានការស្មុគស្មាញមិនអាចធ្វើបាន ត្រូវរាយការណ៍មកអាជ្ញាធរខណ្ឌដើម្បីមានវិធានការរដ្ឋបាល ហើយកម្លាំងសមត្ថកិច្ចនគរបាល និងកងរាជអាវុធហត្ថត្រូវតែចូលរួម ។ នៅឆ្នាំ២០១២ ប្រទេសកម្ពុជា មានកិច្ចប្រជុំអន្តរជាតិជាច្រើន ដូចនេះត្រូវយកចិត្តទុកដាក់ធ្វើយ៉ាងណាឱ្យរាជធានីភ្នំពេញយើងមានសោភ័ណភាព សន្តិសុខសណ្តាប់ធ្នាប់ល្អ ព្រោះជាមុខមាត់របស់ប្រទេស ។
លោកអភិបាលក៏បានព្រមានចំពោះមន្ត្រីឬកងកម្លាំងណាដែលយកប្រាក់ពីការរៀបចំសណ្តាប់ធ្នាប់ថា លោកនឹងរាយការណ៍ទៅថ្នាក់លើដើម្បីមានវិធានការ បើជាសណ្តាប់ធ្នាប់របស់ខណ្ឌត្រូវដកចោល ។ លោកអភិបាលក៏បានសំណូមពរដល់ចៅសង្កាត់ឱ្យយកចិត្តទុកដាក់ លើការថែរក្សាបរិស្ថាន និងអនាម័យក្នុងមូលដ្ឋានផងដែរ ៕
ចែករំលែកព័តមាននេះ