ខេត្តព្រះវិហារ ៖ នៅរសៀលថ្ងៃទី៩ ឧសភា ឆ្នាំ២០១១ កន្លងទៅនេះ នៅអគាររដ្ឋបាលសាលាខេត្ដព្រះវិហារ មានរៀបចំពិធីប្រកាសតែងតាំងមុខតំណែងប្រធានមន្ទីរឧស្សាហកម្ម រ៉ែ និងថាមពលខេត្ដ គឺលោកគង់ មករា ដែលជាអតីតមន្ដ្រីមកពីក្រសួងឧស្សាហកម្ម រ៉ែ និងថាមពល ត្រូវបានចាត់តាំងមកទទួលតំណែងជាប្រធានមន្ទីរ
ខេត្តព្រះវិហារ ៖ នៅរសៀលថ្ងៃទី៩ ឧសភា ឆ្នាំ២០១១ កន្លងទៅនេះ នៅអគាររដ្ឋបាលសាលាខេត្ដព្រះវិហារ មានរៀបចំពិធីប្រកាសតែងតាំងមុខតំណែងប្រធានមន្ទីរឧស្សាហកម្ម រ៉ែ និងថាមពលខេត្ដ គឺលោកគង់ មករា ដែលជាអតីតមន្ដ្រីមកពីក្រសួងឧស្សាហកម្ម រ៉ែ និងថាមពល ត្រូវបានចាត់តាំងមកទទួលតំណែងជាប្រធានមន្ទីរឧស្សាហកម្ម រ៉ែ និងថាមពលខេត្ដព្រះវិហារ ជំនួសលោកសំ លាងនី។ លោកសំ លាងនី បានត្រូវក្រសួងសម្រេចដកតំណែងរបស់លោក ព្រោះតែមានបញ្ហាអសកម្មជាច្រើនក្នុងការដឹកនាំ និងបង្កជម្លោះប្ដឹងផ្ដល់ជាច្រើនឆ្នាំជាមួយកូនចៅក្រោមឱវាទ ទើបពេលនេះក្រសួងសម្រេចដកតំណែងប្រធានមន្ទីរពីលោកឱ្យមកនៅក្រសួងវិញម្ដង ។
ពិធីប្រកាសតែងតាំងនេះបានធ្វើឡើងក្រោមអធិបតីភាពលោក តាន់ គឹមវិន់ រដ្ឋលេខាធិការ ក្រសួងឧស្សាហកម្ម រ៉ែ និងថាមពល និងលោកអ៊ុំ ម៉ារ៉ា អភិបាលនៃគណៈអភិបាលខេត្ដ ដោយមានការចូលរួមពីប្រតិភូអមដំណើរមកពីក្រសួងមន្ដ្រីរាជការតាមស្ថាប័នជុំវិញខេត្ដ មន្ដ្រីរាជការនៃមន្ទីរឧស្សាហកម្មខេត្ដ និងកងកម្លាំងទាំងបីប្រភេទរបស់ខេត្ដសរុបប្រមាណជាង១០០នាក់។ សេចក្ដីសម្រេចបានប្រកាសពីការតែងតាំងលោកគង់ មករា ជាប្រធានមន្ទីរឧស្សាហកម្មខេត្ដព្រះវិហារ និងប្រគល់សេចក្ដីសម្រេចដកតំណែងលោកសំ លាងនី ដោយលោករដ្ឋលេខា ធិការតាន់ គឹមវិន់ ព្រមទាំងប្រគល់ត្រាជូនប្រធាន មន្ទីរថ្មីនាពេលនោះដែរ ។
លោកគង់ មករា ជាប្រធានមន្ទីរថ្មីបានឡើងប្ដេជ្ញាចិត្ដគោរពតាមបាវចនាជាតិ សាសនា ព្រះមហាក្សត្រ ដោយអនុវត្ដឱ្យបានទៀងទាត់នូវរាល់ភារកិច្ចដែលរាជរដ្ឋាភិបាលបានប្រគល់ជូន និងខិតខំរឹតចំណងសាមគ្គីភាពឱ្យបានជិតស្និទ្ធជាមួយមន្ដ្រីក្រោមឱវាទ ។
លោក អ៊ុំ ម៉ារ៉ា អភិបាលខេត្ដបានមានប្រសាសន៍លើកឡើងជុំវិញកិច្ចការសំខាន់ៗ បញ្ជាក់ជូនលោកប្រធានមន្ទីរថ្មីថា ត្រូវបន្ដដឹកនាំឱ្យបានស៊ីជម្រៅ ពីព្រោះខេត្ដព្រះវិហារគឺជាខេត្ដមួយដែលមានសក្ដានុពលផ្នែកធនធានរ៉ែដ៏មានតម្លៃ ។ ពេលនេះមានក្រុមហ៊ុនអន្ដរជាតិជាច្រើនដែលមានច្បាប់ពីរាជរដ្ឋាភិបាលកំពុងចូលសិក្សាស្រាវជ្រាវទៅលើភូមិសាស្ដ្រខេត្ដដែលមានផ្ទៃដីប្រមាណ៣២គីឡូម៉ែត្រការ៉េ ។ ធនធានរ៉ែដ៏ធំធេងទាំងនោះ មានរ៉ែមាស និងរ៉ែដែក ហើយក្នុងនោះដែរក៏មានរ៉ែថ្មភក់ដ៏មានតម្លៃផងដែរ ។
លោក តាន់ គឹមវិន់ រដ្ឋលេខាធិការក្រសួងឧស្សាហកម្ម រ៉ែ និងថាមពលបានមានមតិសំណេះសំណាលនិងផ្ដែផ្ដាំដល់លោកប្រធានមន្ទីរថ្មី និងមន្ដ្រីរាជការក្រោមឱវាទក្នុងមន្ទីរឧស្សាហកម្ម រ៉ែ និងថាមពលខេត្ដទាំងអស់ថា ធ្វើយ៉ាងណាត្រូវចេះសាមគ្គីគ្នា និងយោគយល់គ្នាត្រូវចេះគោរព និងប្រតិបត្ដិភារកិច្ចដែលរាជរដ្ឋាភិបាលប្រគល់ជូនឱ្យសម្រេចមួយរយភាគរយមិនត្រូវប្រព្រឹត្ដជាដាច់ខាតនូវរាល់អំពើពុករលួយទាំងឡាយណាដែលខុសនឹងច្បាប់ ៕
ចែករំលែកព័តមាននេះ