ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ រួចមួយថ្ងៃ នៅព្រឹកថ្ងៃទី២៤ ខែកក្កដា ឆ្នាំ២០២៣ ឯកឧត្តម ស៊ុយ សែម ប្រធានក្រុមការងាររាជរដ្ឋាភិបាល ចុះមូលដ្ឋានខេត្តពោធិ៍សាត់ និងជាបេក្ខជនតំណាងរាស្ត្រមណ្ឌលពោធិ៍សាត់លេខរៀងទី១ បានអញ្ជើញជួបសំណេះសំណាលជាមួយប្រធាន អនុប្រធានក្រុមការងារចុះមូលដ្ឋានទាំងអស់ក្នុងស្រុកបាកាន ដើម្បី
ខេត្តពោធិ៍សាត់ ៖ ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ រួចមួយថ្ងៃ នៅព្រឹកថ្ងៃទី២៤ ខែកក្កដា ឆ្នាំ២០២៣ ឯកឧត្តម ស៊ុយ សែម ប្រធានក្រុមការងាររាជរដ្ឋាភិបាល ចុះមូលដ្ឋានខេត្តពោធិ៍សាត់ និងជាបេក្ខជនតំណាងរាស្ត្រមណ្ឌលពោធិ៍សាត់លេខរៀងទី១ បានអញ្ជើញជួបសំណេះសំណាលជាមួយប្រធាន អនុប្រធានក្រុមការងារចុះមូលដ្ឋានទាំងអស់ក្នុងស្រុកបាកាន ដើម្បីពិនិត្យ និងផ្ទៀងផ្ទាត់លទ្ធផលនៃការបោះឆ្នោតតាមបណ្ដាឃុំនីមួយៗ។
ក្នុងឱកាសនោះ ឯកឧត្តម ស៊ុយ សែម បានថ្លែងអំណរគុណចំពោះលោកតាលោកយាយ អ៊ុំពូមីង បងប្អូនប្រជាពលរដ្ឋទាំងអស់ក្នុងស្រុកបាកាន ដែលបានអញ្ជើញទៅបោះឆ្នោតជូនគណបក្សដែលខ្លួនស្រលាញ់ពេញចិត្ត ជាពិសេសបានបោះឆ្នោតជូនគណបក្សប្រជាជនកម្ពុជាច្រើន ដែលពីមុនមកមិនធ្លាប់មាន។ ជាមួយគ្នានេះ ឯកឧត្តមក៏បានកោតសរសើរចំពោះប្រធានក្រុមការងារថ្នាក់ស្រុក ថ្នាក់ ឃុំ និងភូមិទាំងអស់ ដែលបានខិតខំប្រឹងប្រែងរៀងៗខ្លួន ដោយចំណាយទាំងពេលវេលា ទាំងថវិកា កម្លាំងកាយចិត្ត ធ្វើយ៉ាងណាឲ្យប្រជាពលរដ្ឋស្រលាញ់ពេញចិត្ត រហូតគណបក្សប្រជាជនកម្ពុជា ទទួលបានជ័យជំនះក្នុងការបោះឆ្នោតនេះ។
សូមជម្រាបថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣នេះ មានប្រជាពលរដ្ឋទូទាំងប្រទេសប្រមាណ៨.២១៣.២៦០នាក់ ស្មើនឹង៨៤,៥៨% បានមកបោះឆ្នោត ក្នុងចំណោមប្រជាពលរដ្ឋដែលមានឈ្មោះក្នុងបញ្ជីបោះឆ្នោត សរុប ៩.៧១០.៦៥៥ នាក់។ ដោយឡែកសម្រាប់ខេត្តពោធិ៍សាត់ ប្រជាពលរដ្ឋបានមកបោះឆ្នោតមានចំនួន២៦០.៧៦៧នាក់ ក្នុងចំណោមប្រជាពលរដ្ឋដែលមានឈ្មោះក្នុងបញ្ជីបោះឆ្នោតសរុប ៣០០.៣២៨នាក់។
ជាលទ្ធផល ស្រុកកណ្ដៀងជាប់លេខ១ ស្រុកក្រគរលេខ២ ស្រុកវាលវែងលេខ៣ ស្រុកតាលោសែនជ័យលេខ៤ ស្រុកបាកានលេខ៥ ក្រុងពោធិ៍សាត់លេខ៦ និងស្រុកភ្នំក្រវាញលេខ៧។ សរុបសេចក្ដីមក ខេត្តពោធិ៍សាត់ទទួលបានអាសនៈ៤លើ៤អាសនៈ ដោយគ្មានគណបក្សនយោបាយណាមកប្រជែងគណបក្សប្រជាជនកម្ពុជាបានឡើយ។
សម្រាប់លទ្ធផលការបែងចែកអាសនៈក្រៅផ្លូវការ ដែលទទួលបានពីគ្រប់រាជធានី ខេត្តទូទាំងប្រទេស បានឲ្យដឹងថា គណបក្សប្រជាជនកម្ពុជាទទួលបានសម្លេងគាំទ្រច្រើនលើសលប់ អាចគ្រប់គ្រង១២០អាសនៈ ខណៈគណបក្សហ្វុនស៊ីនប៉ិចទទួលបាន០៥អាសនៈ ៕
ចែករំលែកព័តមាននេះ