ខេត្តបាត់ដំបង ៖ សត្វដំរីព្រៃមួយហ្វូងបានចូលស៊ី និងកាច់បំផ្លាញដំណាំរបស់ប្រជាពលរដ្ឋ ហើយបានចាកចេញទៅវិញបន្សល់ទុកតែស្នាមដានជើងបែកវ៉ល់ពេញចម្ការ កាលពីយប់ថ្ងៃទី២៤ កក្កដា នៅភូមិភ្នំរៃ ឃុំតាតោក ស្រុកសំឡូត…
ខេត្តបាត់ដំបង ៖ សត្វដំរីព្រៃមួយហ្វូងបានចូលស៊ី និងកាច់បំផ្លាញដំណាំរបស់ប្រជាពលរដ្ឋ ហើយបានចាកចេញទៅវិញបន្សល់ទុកតែស្នាមដានជើងបែកវ៉ល់ពេញចម្ការ កាលពីយប់ថ្ងៃទី២៤ កក្កដា នៅភូមិភ្នំរៃ ឃុំតាតោក ស្រុកសំឡូត ។ នេះតាមសេចក្ដីរាយការណ៍ពីប្រពលរដ្ឋដែលបានប្រទះឃើញស្លាកស្នាមហ្វូងសត្វដំរីព្រែនេះ ។
សេចក្ដីរាយការណ៍បានឲ្យដឹងថា ហ្វូងសត្វដំរីព្រៃនេះ បានដើរចូលលុកឡុយស៊ីដំណាំដូង ចេកពាសពេញចម្ការនៅក្បែរផ្ទះអ្នកភូមិនាកណ្ដាលយប់ តែពុំមាននរណាបានឃើញផ្ទាល់នៅពេលនោះទេ រហូតព្រឹកឡើងទើបគេប្រទះឃើញស្លាកស្នាមដានជើងសត្វដំរី ដែលដើរបែកភក់វ៉ល់ពេញភូមិ ។ បើតាមការពិនិត្យលើទិដ្ឋភាពជាក់ស្ដែងដែលអ្នកភូមិបានប្រទះឃើញ និងតាមដានមើលស្លាកស្នាមនៅក្នុងចម្ការ គឺ គេឃើញមានដានជើងសត្វដំរីជាច្រើនក្បាល មានតូចមានធំ ដើរចូលលុកលុយពេញចម្ការ និងដើរចូលទៅក្បែរផ្ទះអ្នកភូមិ ។
ហ្វូងសត្វដំរីបានដើរស៊ីបំផ្លាញដំណាំតាមទំនើងចិត្ត ខណ:ម្ចាស់ចំការមិនបានស្នាក់នៅ។ នេះបើយោងតាមប្រភពព័ត៌មានពីប្រជាពលរដ្ឋនៅតំបន់នោះ ។ គេមិនទាន់ដឹងច្បាស់ទេថា តើហ្វូងសត្វដំរីព្រៃនេះមកពីប្រភពណាទេ ? តើវាឆ្លងដែនមកពីទឹកដីប្រទេសថៃ ឬជាសត្វដំរីស្ថិតនៅក្នុងទឹកដីខ្មែរនោះទេ?ប៉ុន្តែបើតាមប្រជាពលរដ្ឋដែលធ្លាប់ដឹងធ្លាប់ប្រទះឃើញហ្វូងសត្វដំរីនេះ បានសន្និដ្ឋានថា «វាជាហ្វូងដំរីព្រៃដែលរស់នៅតំបន់ភ្នំនានា នៅក្នុងទឹកដីស្រុកសំឡូត មិនមែនឆ្លងមកពីដីថៃទេ» ។
សូមរំលឹកថា កន្លងមកក៍ធ្លាប់មានហ្វូងសត្វដំរីព្រៃចូលមកអុកឡុកបំផ្លាញផលដំណាំរបស់ប្រជាពលរដ្ឋនៅតាមតំបន់ព្រំដែនខ្មែរ.ថៃ នៅក្នុងស្រុកសំឡូតដែរ។ ជាពិសេសនៅក្បែរៗ ច្រកទ្វារតំបន់ ៤០០ តែហ្វូងដំរីទាំងនោះត្រូវគេអះអាងថា «ជាហ្វូងសត្វដំរីព្រៃ ដែលឆ្លងចូលមកពីទឹកដីថៃ» ។
បើនិយាយពីសត្វព្រៃនៅក្នុងស្រុកសំឡូតវិញ ប្រជាពលរដ្ឋតែងប្រទះឃើញហ្វូងសត្វទន្សោងរាប់សិនក្បាល ចុះពីភ្នំមករកស៊ីចំណីនៅតាមចំការនានារបស់អ្នកភូមិ នៅក្នុងភូមិសាស្ត្រឃុំកំពង់ល្ពៅ ជាញឹកញាប់ ។ មន្ត្រីបរិស្ថានដែលគ្រប់គ្រង និងការពារដែនជម្រកសត្វព្រៃនៅតំបន់ភ្នំសំកុះ បាននិយាយថា សត្វព្រៃស្ទើរគ្រប់ប្រភេទ កំពុងរស់នៅតំបន់ជួរភ្នំសំកុះ ហើយត្រូវបានគេប្រទះតាមរយ:កាមេរ៉ាដែលមន្ត្រីជំនាញបំពាក់នៅតាមដើមឈើនៅតំបន់នោះ ។
ប្រធានមន្ទីរបរិស្ថានខេត្ត លោក កត បូរាណ ធ្លាប់បានប្រាប់កោះសន្តិភាពថា បច្ចុប្បន្ន នៅក្នុងស្រុកសំឡូតមានសត្វព្រៃច្រើនប្រភេទណាស់កំពុងរស់នៅក្នុងតំបន់ជួរភ្នំសំកុះ ដែលគ្រប់គ្រង និងការពារដោយមន្ត្រីបរិស្ថាន ។ លោកថា មន្ត្រីជំនាញ បានបំពាក់កាមេរ៉ានៅក្នុងព្រៃថតជាប់សត្វស្ទើរគ្រប់ប្រភេទ ។ សព្វថ្ងៃមន្ត្រីជំនាញបានប្រឹងប្រែងចុះណែនាំដល់ប្រជាពលរដ្ឋ ហាមបរបាញ់ហាមដាក់អន្ទាក់ ឬប្រើឧបករណ៍ផ្សេងៗចាប់សត្វទាំងនេះ ហើយមន្ត្រីជំនាញថែមទាំងបានធ្វើការអប់រំដល់ប្រជាពលរដ្ឋ រស់នៅតំបន់នោះជួយថែរក្សាហ្វូងសត្វព្រៃទាំងនោះទៀតផង ។
ចែករំលែកព័តមាននេះ