ខេត្ដកំពង់ធំ ៖ ជនសង្ស័យ២នាក់ ត្រូវបានសមត្ថកិច្ចប៉ូលិសស្រុកបារាយណ៍ ចាប់ឃាត់ខ្លួនកាលពីថ្ងៃទី២៣ ឧសភា ឆ្នាំ២០១០ បន្ទាប់ពីជនទាំង២នាក់នេះ និងបក្សពួកបានព្រួតគ្នាវាយទៅលើបុរសម្នាក់ដែលកំពុងជិះកង់បណ្ដាលឱ្យរងរបួសធ្ងន់ កាលពីវេលា ម៉ោង១និង១៥នាទីរសៀល ថ្ងៃទី២៣ ឧសភា ឆ្នាំ២០១០ នៅក្នុងភូមិត្រស់ ឃុំបល្ល័ង្ក ស្រុកបារាយណ៍ ខេត្ដកំពង់ធំ ។ មន្ដ្រីប៉ូលិសនិយាយឱ្យដឹងថា ជនសង្ស័យទាំងពីរនាក់នេះ ម្នាក់ឈ្មោះស៊ូ មករា អាយុ ២៣ឆ្នាំ រស់នៅក្នុងភូមិកើតហេតុ និងម្នាក់ទៀតឈ្មោះឃុត សាគីន ហៅគឹម អាយុ២៤ ឆ្នាំ រស់នៅក្នុងភូមិឃ្លៃ ឃុំកំពង់ថ្ម ស្រុកសន្ទុក។ ពួកគេត្រូវបានឃាត់ខ្លួនបន្ទាប់ពីបានស្ទាក់វាយទៅលើឈ្មោះចាន់ ផល្លីន អាយុ២៧ឆ្នាំ រស់នៅក្នុងភូមិកើតហេតុបណ្ដាលឱ្យរងរបួសធ្ងន់ ។
តាមការរៀបរាប់របស់ជនរងគ្រោះ និងសាក្សីដែលបានឃើញហេតុការណ៍បាន និយាយថា មុនពេលកើតហេតុគេឃើញជនរងគ្រោះជិះកង់មកដល់ផ្លូវបំបែកក្នុងភូមិត្រស់ ពេលនោះជនសង្ស័យមានគ្នា៣នាក់ គឺ ១-ឈ្មោះស៊ូ មករា ២-ឈ្មោះឃុត សាគីន និង៣-ឈ្មោះអុន សំអន ហៅប្រុញ កំពុងឈរជជែកគ្នា និងបានស្រែកសុំលុយពីជនរងគ្រោះ១.០០០រៀល ហើយជនរងគ្រោះ និយាយថាគ្មានទេ ។ ពេលនោះជនទាំង៣ នាក់បានស្ទុះមកវាយជនរងគ្រោះ ខ្លះទាត់ ខ្លះធាក់ ខ្លះដាល់ រហូតដល់ជនរងគ្រោះសន្លប់ ។ ក្រោយពីកើតហេតុប៉ូលិសបានទៅដល់ ហើយក៏បានឃាត់ខ្លួនជនដៃដល់២នាក់ ឯម្នាក់ទៀតរត់គេចខ្លួនបាត់ ។
មន្ដ្រីប៉ូលិសនិយាយថា ក្នុងចំណោមជនទំនើងទាំង២នាក់នេះ ម្នាក់ឈ្មោះស៊ូ មករា ធ្លាប់ជាប់គុក៨ខែម្ដងហើយ ទើបចេញកាល ពីថ្ងៃទី១៣ កុម្ភៈ ២០១០ មូលហេតុវាយបំផ្លាញម៉ូតូគេ ។ ក្រោយពីឃាត់ខ្លួន និងកសាងសំណុំរឿងរួច ប៉ូលិសបានបញ្ជូនជនសង្ស័យទាំង២នាក់នេះទៅសាលាដំបូងខេត្ដ កាលពីថ្ងៃទី២៥ ឧសភា ដើម្បីវិនិច្ឆ័យទៅ តាមផ្លូវច្បាប់ ។
ចែករំលែកព័តមាននេះ