ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយ នៅតែបន្តត្រៀបត្រា តាំងលម្អរាជធានីភ្នំពេញនៅលើផ្ទៃទឹកដៃទន្លេសាប ស្ថិតក្នុងភូមិគ្រួស សង្កាត់សំរោង ខណ្ឌព្រែកព្នៅ ដែលរហូតមកដល់ពេលនេះ អាជ្ញាធរពន្យារយៈពេលជាង២ឆ្នាំមកហើយ តើពេលណា បានបន្តចាត់វិធានការរុះរើ?
រាជធានីភ្នំពេញ ៖ ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយ នៅតែបន្តត្រៀបត្រា តាំងលម្អរាជធានីភ្នំពេញនៅលើផ្ទៃទឹកដៃទន្លេសាប ស្ថិតក្នុងភូមិគ្រួស សង្កាត់សំរោង ខណ្ឌព្រែកព្នៅ ដែលរហូតមកដល់ពេលនេះ អាជ្ញាធរពន្យារយៈពេលជាង២ឆ្នាំមកហើយ តើពេលណា បានបន្តចាត់វិធានការរុះរើ?។
បើតាមប្រជាពលរដ្ឋរស់នៅភូមិគ្រួស បានអោយដឹងថា ផ្ទះទឹកបែចិញ្ចឹមត្រីរបស់ជនជាតិវៀតណាមជាច្រើនបានចល័តមកចតត្រៀបត្រានៅតាមទន្លេសាបក្រោយវត្តគ្រួស បន្ទាប់ពីអាជ្ញាធរ បានប្រើកម្លាំងអនុវត្តវិធានការរដ្ឋបាលរុះរើយ៉ាងក្ដៅគគុក កាលពីថ្ងៃទី១២ ខែមិថុនា ឆ្នាំ២០២១ កន្លងមក គ្រាន់តែដេញឱ្យល្អមើលតែប៉ុណ្ណោះ។ ការចល័តបែចិញ្ចឹមនោះ ត្រូវគេដឹងថា ធ្វើឡើងតាមការណែនាំរបស់អាជ្ញាធររាជធានីភ្នំពេញ ដើម្បីទុកពេលអោយម្ចាស់បែចិញ្ចឹមត្រីធំសិន ប៉ុន្តែម្ចាស់បែចិញ្ចឹមត្រីទាំងនោះបានបន្តដាក់កូនត្រីចិញ្ចើមឡើងវិញ ខ្លះបន្តសង់បែថ្មីៗ និងខ្លះទៀតក៏បានរុះរើចេញ។ទោះបីជាយ៉ាងណា ចាប់តាំងពីថ្ងៃយុទ្ធនាការរុះរើមកដល់ពេលនេះ គឺមានរយៈពេលជាង២ឆ្នាំមកហើយ កំពុងបន្តរីកធំឡើងៗដែលសង្ស័យថា មិនងាយធ្វើបែកឡើយ។
ប្រជាពលរដ្ឋនៅតំបន់នោះ បានអោយដឹងថា ចាប់តាំងពីបែចិញ្ចឹមត្រីអូសមកចតត្រៀបត្រានៅមុខវត្តគ្រួស ក្នុងតំបន់នោះ បង្កអោយប៉ះពាល់បរិស្ថានជាខ្លាំង ដែលពីមុនទឹកធ្លាប់បូមមកប្រើប្រាស់ និងធ្វើនំបញ្ចុកបាន តែពេលនេះលែងប្រើប្រាស់បាន។ ហើយនៅក្នុងភូមិ មានកន្លែងដឹកចំណីត្រីមកស្តុកទុក និងដឹកយកទៅទម្លាក់តាមបែធំ ធ្វើឱ្យមានក្លិនស្អុយពេញភូមិ ពិបាករស់នៅ ដោយមិនដឹងថា តើថ្ងៃណាអាជ្ញាធរបន្តមានវិធានការរុះរើចេញនោះទេ?។
បើតាមអ្នកចិញ្ចឹមត្រីក្នុងបែទាំងនោះ បានអោយដឹងទៀតថា ដោយមានការស្នើសុំពីស្ថានទូតវៀតណាម អាជ្ញាធរបានទុកពេល៣ឆ្នាំទៀត… ណ្ហើយ! ទ្រាំៗទៅ បើគេសុំហើយ។
គួរបញ្ជាក់ថា កាលពីថ្ងៃទី១២ ខែមិថុនា ឆ្នាំ២០២១ អាជ្ញាធរខណ្ឌទាំង៦ នៅជាប់ដងទន្លេ បានប្រើកម្លាំងអនុវត្តន៍វិធានការរដ្ឋបាលរុះរើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ ដើម្បីបើកផ្លូវនាវាចរ កុំអោយប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់។ ជាពិសេសកុំអោយបន្តការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលនៅក្នុងទន្លេ ធ្វើឱ្យខូចខាតយ៉ាងធ្ងន់ធ្ងរដល់ជីវចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាពប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ។
ការប្រើវិធានការរដ្ឋបាលនេះ ទទួលបាននូវការគាំទ្រពីមហាជនយ៉ាងខ្លាំង ហើយអាជ្ញាធរបានចាត់ទុកថា ការអនុវត្តវិធានការរៀបចំសណ្ដាប់ធ្នាប់លើផ្ទៃទន្លេបានប្រព្រឹត្តទៅយ៉ាងរលូន និងទទួលបានជោគជ័យ… ប៉ុន្តែជោគជ័យខ្យល់!។
ទន្ទឹមនឹងនោះ លោក មាន ចាន់យ៉ាដា អភិបាលរងរាជធានីភ្នំពេញ និងជាតំណាងឲ្យលោក ឃួង ស្រេង អភិបាលរាជធានីភ្នំពេញ បានមានប្រសាសន៍នៅក្នុងកិច្ចប្រជុំសាមញ្ញលើកទី២៦របស់ក្រុមប្រឹក្សារាជធានីភ្នំពេញ ឲ្យដឹងថា រាជធានីភ្នំពេញ មានខណ្ឌចំនួន០៦ ដែលមានផ្ទះបណ្ដែតទឹក បែត្រី និងសំណង់មិនរៀបរយនៅតាមដងទន្លេ ដែលមានចំនួន១៤៧២ទីតាំង ចែកចេញជា៤ប្រភេទ ក្នុងនោះមានប្រភេទជា បែត្រី សំណង់មិនរៀបរយ ដៃត្រី និងទូកនេសាទ។
អាជ្ញាធរក៏បានបញ្ជាក់ថា នៅក្នុងយុទ្ធនាការរុះរើ បងប្អូនប្រជាពលរដ្ឋបានស្ម័គ្រចិត្តរុះរើបានចំនួន១២៤២ទីតាំង។ នៅសល់មួយចំនួនទៀត បានរៀបចំឲ្យពួកគាត់ចិញ្ចឹមត្រីជាបណ្តោះអាសន្នចំនួន២ទីតាំងផ្សេងគ្នា ក្នុងនោះទីតាំងទី១- នៅជាប់ព្រំប្រទល់រវាងស្រុកពញាឮ និងខណ្ឌព្រែកព្នៅ មានចំនួន១៩៤ទីតាំង និងទីតាំងទី២- នៅជាប់នឹងស្រុកលើកដែកចំនួន១៩ទីតាំង។
ទោះបីជាយ៉ាងណា នៅមានបែត្រី ដែលអាជ្ញាធរអះអាងថា នៅសល់ប្រមាណ ២០០ទៀត បន្តនៅចតត្រៀបត្រា តាំងលម្អរាជធានីភ្នំពេញនៅឡើយ។
ទំនងចាំបោះឆ្នោតរួចរាល់… ចាំមានរដ្ឋអំណាចអាណត្តិថ្មី ចាំដោះស្រាយក៏មិនយឺតពេលដែរ… ព្រោះគង់តែដេញហើយ កើតវិញដដែល ចាំយូរទៀតឱ្យទាល់តែស្អុយទឹកប្រើលែងកើតក៏មិនយឺតដែរ… ហេ! ហេ!
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ