ខេត្តក្រចេះ ៖ ស្ងាត់ៗ ស្រាប់តែលេចលឺការបែកធ្លាយមួយថា លោកវរសេនីយ៍ឯក ប៊ុត នឿន ទាមទារលុយគោលនយោបាយភូមិ-ឃុំ និងរបបសាំង ពីមន្ត្រីតាមបណ្តាប៉ុស្តិ៍រដ្ឋបាលនៅក្នុងស្រុកចិត្របុរី តើរឿងនេះមានដំណោះស្រាយរបៀបណាហើយ..?។
ប្រភពសុំមិនបញ្ចេញឈ្មោះ បានបង្ហើបឱ្យដឹងថា លោកវរសេនីយ៍ឯក ប៊ុត នឿន អធិការនគរបាលស្រុកចិត្របុរី តែងតែធ្វើការកៀបសង្កត់សិទ្ធិសេរីភាពការងារទៅលើមន្ត្រីក្រោមឱវាទ. ប្រើសិទ្ធិអំណាចជាកូនប្រសារអតីតលោកស្នងការ។ ឱ! លោកអធិការដ៏មហិមាអើយ…
មិនតែប៉ុណ្ណោះទេ លោកតែងតែកេងប្រវ័ញ្ចទាមទារលុយ និងរបបសាំងគោលនយោបាយភូមិ–ឃុំមានសុវត្ថិភាពប្រចាំត្រីមាស ពីតាមបណ្តាប៉ុស្តិ៍រដ្ឋបាល ដែលក្រសួងមហាផ្ទៃផ្ដល់ឲ្យរាល់៣ខែម្ដង ប្រៀបដូចឆ្ដោត្របាក់កូនឯងដូច្នេះដែរ…ហេ! ហេ!
តាមប្រភពពីមន្ត្រីនគរបាលនៅស្រុកចិត្របុរី បានឱ្យទៀតថា លោកវរសេនីយ៍ឯក ប៊ុត នឿន អធិការនគរបាលស្រុកនេះ តែងតែទាមទារលុយ ឬរបបសាំង និងសម្ភារៈប្រើប្រាស់ពីមន្ត្រីតាមប៉ុស្តិ៍រដ្ឋបាលទាំងអស់ជាបន្តបន្ទាប់។
ហើយអ្វីដែលពិសេសសូម្បីតែលុយដែលឯកឧត្តមបណ្ឌិត ហ៊ុន ម៉ាណែត ឧបត្ថម្ភសម្រាប់យុវជន ក៏លោកបម្រុងស៊ីដាច់ដែរ ទុករហូតជាងមួយសប្តាហ៍មិនចង់បើកឱ្យមន្ត្រីក្រោមឱវាទនោះទេ ទុករហូតបែកធ្លាយរឿងនោះខ្ចរខ្ចាយ ទើបបានលោកអធិការហៅកូនចៅទៅចែកឱ្យ ដោយយកលេសថា រវល់ការងារខ្លាំងណាស់។
តាមការពិតកូនចៅ ជាមន្ត្រីក្រោមឱវាទតាមបណ្តាប៉ុស្តិ៍រដ្ឋបាលនោះ គឺដឹងចិត្តមេច្បាស់ណាស់ កូនចៅចាត់ទុកខ្លួនឯងជាចង្វាចិញ្ចឹមឆ្ដោត។
ប្រភពដដែលបង្ហើបបន្តថា មន្ត្រីតាមបណ្តាប៉ុស្តិ៍មានការព្រួយបារម្ភខ្លាំងណាស់ ខណៈពេលដែលលុយរបបគោលនយោបាយ ត្រូវក្រសួងផ្ដល់មកឱ្យសារជាថ្មីម្តងៗ ដោយសារតែជារៀងរាល់ត្រីមាស គឺលោកអធិការរូបនោះ តែងតែតម្រូវឱ្យតាមបណ្ដាប៉ុស្តិ៍ដកលុយនោះត្រឡប់ឱ្យទៅលោកវិញចំនួន២០ម៉ឺនរៀល និងរបបសាំងមួយចំនួនថែមទៀត ដែលក្នុងនោះមានប៉ុស្តិ៍រដ្ឋបាលចំនួន១០ នៅក្នុងស្រុកចិត្របុរី។
មន្ត្រីនគរបាលមូលដ្ឋាន នាំគ្នាត្អូញត្អែរថា ចំពោះការងារនៅតាមមូលដ្ឋាន មានតម្រូវការចាំបាច់ច្រើនណាស់ សម្រាប់បម្រើផលប្រយោជន៍ជូនប្រជាពលរដ្ឋទាំងយប់ទាំងថ្ងៃ ក្នុងនាមលោកជាថ្នាក់ដឹកនាំមិនបានជំរុញលើកទឹកចិត្តដល់មន្ត្រីក្រោមឱវាទទេ បែរជាតម្រូវការផ្ទាល់ខ្លួនយ៉ាងច្រើនពីមន្ត្រីនៅតាមបណ្ដាប៉ុស្តិ៍រដ្ឋបាលទៅវិញ។
មន្ត្រីក្រោមឱវាទនៅតាមបណ្ដាប៉ុស្តិ៍ទាំង១០ ក៏បានស្នើសុំទៅដល់លោកស្នងការនគរបាលខេត្តក្រចេះ ក៏ដូចជាថ្នាក់ដឹកនាំក្រសួងធ្វើការស្រាវជ្រាវ និងសម្របសម្រួលករណីនេះផង ដើម្បីកុំឱ្យមានបញ្ហាដូចនេះ កើតមានជាបន្តបន្ទាប់ទៀត។
ទាក់ទឹននឹងការចោ.ទប្រកាន់ខាងលើនេះ ក្រុមការងារយើងបានធ្វើការទំនាក់ទំនងតាមទូរស័ព្ទទៅលោកវរសេនីយ៍ឯក ប៊ុត នឿន អធិការនគរបាលស្រុកចិត្របុរីនោះដែរ ដើម្បីសុំជួយបំភ្លឺតាមការគួរ ទាក់ទិននឹងប្រតិកម្មរវាងកូនចៅក្រោមឱវាទ ចៀសវាងធ្វើការផ្សាយទៅមានការឆកល្វែង និងលំអៀងម្ខាងៗ តែទូរស័ព្ទមិនអាចទំនាក់ទំនងបានឡើយ។
ព័ត៌មានបន្តនឹងមានចុះផ្សាយនៅលើកាសែតកោះសន្តិភាព៕
ចែករំលែកព័តមាននេះ