ខេត្តបាត់ដំបង ៖ បក្សពួកក្រុមចោរហារយចំនួន២នាក់ ក្នុងចំណោមជិត២០នាក់ ដែលវាយប្លន់យកស្លាកលេខម៉ូតូអ្នកដំណើរ កាលពីសប្ដាហ៍មុន ត្រូវបានសមត្ថកិច្ចធ្វើការស្រាវជ្រាវឃាត់ខ្លួន និងបានកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី២០ កក្កដា…
ខេត្តបាត់ដំបង ៖ បក្សពួកក្រុមចោរហារយចំនួន២នាក់ ក្នុងចំណោមជិត២០នាក់ ដែលវាយប្លន់យកស្លាកលេខម៉ូតូអ្នកដំណើរ កាលពីសប្ដាហ៍មុន ត្រូវបានសមត្ថកិច្ចធ្វើការស្រាវជ្រាវឃាត់ខ្លួន និងបានកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី២០ កក្កដា ខណៈបក្សពួកជាង១០នាក់ទៀតកំពុងសំងំលាក់ខ្លួន ។
របាយការណ៍សមត្ថកិច្ចបានឲ្យដឹងថា ជនសង្ស័យ០២នាក់ដែលត្រូវឃាត់ខ្លួន ឈ្មោះ អ៊ន សំអាត ហៅ រ៉ា អាយុ១៧ឆ្នាំ នៅភូមិវត្តចែង ឃុំអូរដំបង១ ស្រុកសង្កែ និងម្នាក់ទៀតឈ្មោះ អឿត សុជីត អាយុ១៦ឆ្នាំ នៅភូមិកំពង់ពិល ឃុំវត្តតាមិម ស្រុកសង្កែ ។ ជនទាំង០២នាក់នេះ ត្រូវកម្លាំងការិយាល័យព្រហ្មទណ្ឌកំរិតស្រាល សហការជាមួយកម្លាំងជំនាញធ្វើការស្រាវជ្រាវរហូតឃាត់ខ្លួនបាន នៅយប់ថ្ងៃទី១៨ កក្កដា នៅចំណុចបន្ទប់ជួលមួយកន្លែង នៅភូមិវត្តរំដួល សង្កាត់ចំការសំរោង ក្រុងបាត់ដំបង ក្រោយពួកគេរួមដៃគ្នាជាមួយបក្សពួកជាង១០នាក់ទៀតព្រួតគ្នាវាយអ្នកដំណើរប្លន់យកស្លាកលេខម៉ូតូ កាលពីសប្ដាហ៍មុន ។
កាលពីវេលម៉ោងជិត៣រំលងអធ្រាត្រឈានចូលថ្ងៃទី១៣ កក្កដា ក្រុមចោរហារយខាងលើនេះ បានស្ទាក់វាយអ្នកដំណើរឈ្មោះ ចក់ សាន្ត ហៅង៉ា ភេទប្រុស អាយុ២៦ឆ្នាំ ខណ:ដែលជនរងគ្រោះរូបនេះជិះម៉ូតូកាត់តាមផ្លូវមុខផ្ទះសំណាក់ កែវមុន្នី ចំពេលក្រុមជនអន្ធពាលខាងលើ កំពុងត្រៀមកាប់ចាក់គ្នាជាមួយភាគីម្ខាងទៀត ដែលដេកនៅផ្ទះសំណាក់នេះ ស្ថិតនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង ។
ក្រុមជនពាលនេះ បានវាយកម្ទេចម៉ូតូជនរងគ្រោះ រួចធាក់បំបាក់ស្លាកលេខម៉ូតូប្លន់យកទៅបាត់។ កម្លាំងសមត្ថកិច្ចបានចុះអន្តរាគមន៍ភ្លាមៗ តែត្រូវក្រុមចោរហាររយនាំគ្នាជិះម៉ូតូគេចខ្លួនអស់ទៅហើយ។ បើតាមចម្លើយសារភាព របស់ពួកចោរហារយដែលបម្លែងខ្លួនចេញពីក្រុមក្មេងទំនើងនេះ បាននិយាយថា នៅយប់កើតហេតុពួកខ្លួនមានគ្នា១៦នាក់ ជិះម៉ូតូ០៧គ្រឿងបាននាំគ្នាជិះទៅខាងមុខផ្ទះសំណាក់កែវ មុន្នី ដើម្បីតាមវាយទៅលើគូសត្រូវរបស់ខ្លួនមួយក្រុម ដែលដេកនៅផ្ទះសំណាក់នេះ។ ប៉ុន្ដែពេលពួកខ្លួនកំពុងឡោមព័ទ្ធផ្ទះសំណាក់ ស្រាប់តែឃើញជនរងគ្រោះខាងលើជិះម៉ូតូតាក់ទីនោះ ហើយស្មានតែជាបក្សពួកគូសត្រូវខ្លួន ទើបពួកខ្លួនកាត់វាយ ។
ក្រុមនេះនិយាយថា នៅពេលនោះម្ចាស់ម៉ូតូរត់រួច ហើយពួកខ្លួនក៏វាយកំទេចម៉ូតូ និងធាក់បំបាក់ស្លាកលេខយក ហើយនាំគ្នាជិះម៉ូតូគេចខ្លួនតែម្ដង ។ លោក ឈឿង គឹមសុង ស្នងការរង ដឹកនាំការិយាល័យព្រហ្មទណ្ឌកំរិតស្រាលបានប្រាប់ថា ក្រុមជនដៃដល់នេះបានស្ទាក់វាយមនុស្សច្រឡំ នៅពេលជនរងគ្រោះជិះកាត់កន្លែងក្រុមជនអន្ធពាលកំពុងប្រយុទ្ធគ្នានៅមុខផ្ទះសំណាក់កែវមុន្នី។ លោកបានបញ្ជាក់ថា តាមពិតក្រុមជនដៃដល់មានជម្លោះជាមួយជនពាលមួយក្រុមទៀត ដែលមានបក្សពួកប្រហែលគ្នា ដេកនៅផ្ទះសំណាក់នេះ ។
ប៉ុន្តែពេលឃើញជនរងគ្រោះជិះម៉ូតូកាត់ទីនោះ ក៏ត្រូវក្រុមជនទំនើងមួយក្រុមនេះស្ទាក់វាយប្លន់យកស្លាកលេខម៉ូតូតែម្ដង ។ ជាមួយនឹងការឃាត់ខ្លួនបក្សពួកចោរហារយ០២នាក់នេះ សមត្ថកិច្ចដកហូតម៉ូតូ០១គ្រឿង និងស្លាកលេខម៉ូតូរបស់ជនរងគ្រោះលេខបាត់ដំបង 1S-9145 ដែលជនដៃដល់បានប្លន់យកទៅ ។
យ៉ាងណាពេលនេះ កម្លាំងការិយាល័យជំនាញបានកសាងសំណុំរឿងបញ្ជូនជនសង្ស័យទាំង០២នាក់ទៅកាន់សាលាដំបូងខេត្តហើយ ខណ:កម្លាំងជំនាញកំពុងតាមចាប់ខ្លួនបក្សពួកជនដៃដល់ចំនួន១៤នាក់ទៀត ៕
ចែករំលែកព័តមាននេះ