ADផ្ទាំងផ្សព្វផ្សាយពាណិជ្ជកម្ម

Picture

ភ្ញៀវ​ទេសចរ​ជាង​៧០០​នាក់​ជាប់​លើ​កោះនានា ​ត្រូវ​បាន​ជម្លៀស​មក​ដីគោក

1 ឆ្នាំ មុន
  • ព្រះសីហនុ

កប៉ាល់​ចំនួន​៦​គ្រឿង បាន​ដឹក​ភ្ញៀវ​ទេសចរ​ជាតិ និង​អន្តរជាតិ ដែល​ជាប់​គាំង​នៅ​លើ​កោះ​នានា​មក​កាន់​ដីគោក​វិញ​ដោយ​សុវត្ថិភាព ។ វិធានការ​ដឹក​ជញ្ជូន​ភ្ញៀវ​ទេសចរ​ពី​ដី​កោះ​មក​ដីគោក​នេះ​ដោយសារ​

ខេត្ត​ព្រះ​សីហ​នុ ៖ គិត​ត្រឹម​វេលា​ព្រឹក​ថ្ងៃ​ទី​១៧ ខែកក្កដា ឆ្នាំ​២០២៣ កប៉ាល់​ចំនួន​៦​គ្រឿង បាន​ដឹក​ភ្ញៀវ​ទេសចរ​ជាតិ និង​អន្តរជាតិជាង​៧០០​នាក់​ ដែល​ជាប់​គាំង​នៅ​លើ​កោះ​នានា​មក​កាន់​ដីគោក​វិញ​ដោយ​សុវត្ថិ​ភាព ។ វិធានការ​ដឹក​ជញ្ជូន​ភ្ញៀវ​ទេសចរ​ពី​ដី​កោះ​មក​ដីគោក​នេះ​ដោយសារ​ធម្មជាតិ​មិន​អំណោយផល​ព្រោះ​ផ្ទៃមេឃ​អាប់អួរ​មាន​ភ្លៀង​និង​ខ្យល់​បោកបក់​ខ្លាំង​បង្ក​ជា​រលក​ធំ​ៗ ។

មន្ត្រី​រដ្ឋបាល​ខេត្ត​ឱ្យ​ដឹង​ថា កប៉ាល់​ដំបូង​ចេញ​អន្តរាគមន៍​តែ​៥​គ្រឿង​ទេ តែ​អាជ្ញាធរ​ខេត្ត​បន្ថែម​កប៉ាល់​១​គ្រឿង​ទៀត កើន​ដល់​៦​គ្រឿង ដើម្បី​ដឹក​ជញ្ជូន​ភ្ញៀវ​ទេសចរ ដែល​ជាប់​គាំង​នៅ​លើ​កោះ​ឲ្យ​បាន​ទាន់​ពេលវេលា ។

ក្រសួង​ធនធានទឹក​និង​ឧតុនិយម​បាន​ចេញ​សេចក្តី​ប្រកាស​រួច​ហើយ​អំពី​ស្ថានភាព​អាកាសធាតុ​មិន​អំណោយផល​ក្នុង​ការ​ធ្វើ​ដំណើរ​តាម​ផ្លូវទឹក​(​សមុទ្រ​) ខណៈ​រង​ឥទ្ធិពល​នៃ​ព្យុះ​ទី​៤ កំពុង​បោកបក់​ពី​សមុទ្រ​ចិន​ឆ្ពោះទៅ​ភាគ​ខាងជើង​ប្រទេស​វៀតណាម ហើយ​កម្ពុជា​បាន​ទទួល​រង​សម្ពាធ​ទាប​នេះ ពិសេស​​តំបន់​មាត់សមុទ្រ​មាន​ភ្លៀង​ធ្លាក់​ច្រើន ខ្យល់​ខ្លាំង​រលក​ខ្ពស់ ។

ឯកឧត្តម គួ​ច ចំរើន អភិបាល​នៃ​គណៈ​អភិបាលខេត្ត​ព្រះ​សីហ​នុ នៅ​ព្រឹក​ថ្ងៃ​ទី​១៧ ខែកក្កដា ឆ្នាំ​២០២៣​នេះ បាន​បញ្ជា​ឲ្យ​លោក​ឧត្តមសេនីយ៍ទោ ជួន ណា​រិ​ន្ទ ស្នងការ​នគរបាល​ខេត្ត បញ្ចេញ​កប៉ាល់​ធំ​ៗ​ចំនួន​៥​គ្រឿង ដើម្បី​ទៅ​ដឹក​ជញ្ជូន​ភ្ញៀវ​ទេសចរ​ដែល​ជាប់​គាំង​នៅ​តាម​បណ្ដា​កោះ​នានា ដោយ​សារ​បញ្ហា​អាកាស​ធាតុខ្យល់​កន្ដ្រាក់ និង​រលក​សមុទ្រ​ធំ​ៗ​កាលពី​ថ្ងៃអាទិត្យ​កន្លង​ទៅ ។ ភ្ញៀវ​ភាគច្រើន​ដែល​ជាប់​គាំង​នៅ​លើ​កោះ​រ៉ុ​ង និង​កោះ​រ៉ុ​ង​សន្លឹម ។

ថ្លែងប្រាប់​បណ្ដាញ​ព័ត៌មាន ឯកឧត្តម គួ​ច ចំរើន បាន​អះអាង​ថា ដោយ​មើលឃើញ​អាកាសធាតុ​បាន​ធូរស្រាល និង​រលក​រាង​ស្ងប់​បន្ដិច​នោះ ឯកឧត្តម​បាន​បញ្ជា​ឲ្យ​ស្នងការ​ខេត្ត បញ្ចេញ​កប៉ាល់​ធំ​ៗ ដើម្បី​ទៅ​ទទួលភ្ញៀវ​ទេសចរ​ដែល​ជាប់​គាំង​នៅ​តាម​បណ្ដា​កោះ​មក​កាន់​ដីគោក​(​ក្រុងព្រះសីហនុ​)​វិញ ។

អភិបាលខេត្ត​ព្រះ​សីហ​នុ បាន​គូសបញ្ជាក់​ថា បើ​ទោះបី​ស្ថានភាព​អាកាសធាតុ​រាង​ស្ងប់ខ្យល់ និង​រលក​បន្ដិច​ក៏​ពិតមែន ប៉ុន្ដែ​សមត្ថកិច្ច​ដែល​ចេញ​ទៅ​ទទួលភ្ញៀវ​ទេសចរ​ទាំង​អស់នោះ ត្រូវ​ត្រៀមលក្ខណៈ​គ្រប់​បែប​យ៉ាង​ដើម្បី​ការពារ​ហានិភ័យ​ដែល​អាច​កើត​មាន​ឡើង ក្នុង​នោះ មន្ដ្រី​នគរបាល​ជើង​​ទឹក ក៏​ត្រូវ​ជិះ​អមដំណើរ​អ្នកទេសចរ ហើយ​អ្នកទេសចរ​ទៀត​សោត ត្រូវ​តែ​ពាក់អាវ​ពោង​ឲ្យ​បាន​គ្រប់​ៗ​គ្នា ។

កប៉ាល់​ធំ​ៗ​បាន​ដឹក​ភ្ញៀវ​ទេសចរណ៍​មក​ដល់​ដីគោក​ចំនួន​៤​គ្រឿង ដែល​មាន​មនុស្ស​ចំនួន​៧០៨​នាក់ ក្នុង​នោះ​​ស្រី​៣៤៧​នាក់ និង​កុមា​១៥​នាក់ ហើយ​លោក​បាន​បន្ថែម​កប៉ាល់​១​គ្រឿង​ទៀត​ដើម្បី​ទៅ​យក​អ្នក​ជាប់​គាំង​លើ​ដែន​កោះ​ក្នុង​នោះ​កប៉ាល់​៥​គ្រឿង​មក​ពី​៤​ក្រុមហ៊ុន​បាន​ជួយ​ធ្វើការ​ដឹក​ជញ្ជូន ។

គួរ​ជម្រាប​ថា ដោយសារ​បញ្ហា​អាកាសធាតុ​ភ្លៀង ខ្យល់​កន្ដ្រាក់ និង​រលក​សមុទ្រ​ធំ​ៗ​នោះ អាជ្ញាធរ​បាន​សម្រេច​ឲ្យ​ភ្ញៀវ​ទេសចរ​ដែល​ទៅ​កម្សាន្ដ​នៅ​តាម​បណ្ដា​កោះ​នានា មក​កាន់​ដីគោក​វិញ​ជា​បណ្ដោះ​អាសន្ន​​សិន ដោយ​រង់ចាំ​ស្ថានភាព​ធូរស្រាល ។ នៅ​ព្រឹក​ថ្ងៃ​ទី​១៧ កក្កដា ទើប​មានការ​រៀបចំ​កប៉ាល់​ធំ​ៗ រួម​ជាមួយ​សមត្ថកិច្ច ដើម្បី​ទៅ​ទទួលភ្ញៀវ​ទាំង​អស់នោះ​ត្រឡប់​មក​កាន់​ដីគោក​វិញ ។

សូម​ជម្រាប​ថា នៅ​ថ្ងៃ​ទី​១៦ ខែកក្កដា ឆ្នាំ​២០២៣​នេះ នៅ​ខេត្ត​ព្រះ​សីហ​នុ​ផ្ទៃមេឃ​អួរ​អាប់​មាន​ភ្លៀង​ធ្លាក់​ច្រើន​និង​មាន​ខ្យល់​បោកបក់​ខ្លាំង​លើ​ផ្ទៃសមុទ្រ​ចាប់តាំងពី​វេលា​រំលង​អធ្រាត្រ​មក​ក្នុង​ជំហាន​ដំបូង ឯកឧត្តម គួ​ច ចំរើន អភិបាលខេត្ត​ព្រះ​សីហ​នុ បាន​បញ្ជូន​កប៉ាល់​ចំនួន​៥​គ្រឿង ដើម្បី​ទៅ​ដឹក​ជញ្ជូន​ភ្ញៀវ​ទេសចរ​ទាំង​ជាតិ​និង​អន្តរជាតិ ដែល​ជាប់​គាំង​នៅ​លើ​កោះ​ដោយសារ​បញ្ហា​អាកាសធាតុ​មិន​អំណោយផល ព្រោះ​មាន​ភ្លៀង​និង​ខ្យល់​បក់​បោក​បង្ក​ឱ្យ​មាន​រលក​ខ្ពស់​ៗ​អាច​បង្ក​គ្រោះថ្នាក់​ជាយថាហេតុ សម្រាប់​អ្នក​ធ្វើ​ដំណើរ​តាម​សមុទ្រ​។ ជាមួយ​គ្នា​នេះ​មានការ​ហាម​ទូក​នេសាទ​ទាំងអស់​មិន​ឱ្យ​ចេញ​នេសាទ​ទេ ដើម្បី​បញ្ចៀស​គ្រោះថ្នាក់​ជាយថាហេតុ ។

ត្រឹម​រសៀល​ថ្ងៃ​ដដែល​ក្រុម​មន្ត្រី​ឱ្យ​ដឹង​ថា នៅ​សល់​កប៉ាល់​២​ទៀត​កំពុង​ដឹក​ជញ្ជូន​ភ្ញៀវ នៅ​តាម​កោះ​យក​មក​កាន់​ដីគោក​វិញ​ដែរ ៕

អត្ថបទសរសេរ ដោយ

អត្ថបទសរសេរ ដោយ

កែសម្រួលដោយ