ភ្នំពេញ៖ សម្តេចព្រះមហាក្សត្រី នរោត្តម មុនិនាថ សីហនុ បានចេញផ្សាយនូវសៀវភៅ ដែលមាន​ចំណងជើងថា «សាក្សីប្រវត្តិសាស្ត្រ»។ សៀវភៅ ជាភាសាខ្មែរនេះ ជាកំណត់ហេតុសំណេរ​ដើម ស្តីពី តថភាពនៃព្រះរាជបូជនីយកិច្ច ដើម្បីជាតិ មាតុភូមិ និងប្រជានុរាស្ត្រកម្ពុជារបស់ ព្រះករុណា ព្រះបរមរតនកោដ្ឋ និងសម្តេចព្រះមហាក្សត្រី ព្រះវររាជមាតាជាតិខ្មែរ ក្នុងព្រះរាជដំណើរពីទីក្រុង​ប៉េកាំង ឆ្លងកាត់ការលំបាក នៅឆ្នាំ១៩៧៣ រយៈពេលមួយខែ ចូលមកកម្ពុជាដែលប្រទេសជាតិ កំពុងស្ថិត ក្នុងស្ថានភាពវឹកវរ។

សៀវភៅ «សាក្សីប្រវត្តិសាស្ត្រ» នេះ ក៏ត្រូវបាន​សម្តេចម៉ែ សព្វព្រះរាជហឫទ័យប្រោស​ព្រះរាជទាន​ជូនសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី  ១៧  ខែកក្កដា  ឆ្នាំ២០២៣ នេះ។

ក្រោយពីទទួលបានសៀវភៅ «សាក្សីប្រវត្តិសាស្ត្រ» ​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានទូលថ្វាយនូវសារលិខិត ថ្លែងអំណរព្រះរាជគុណ ថ្វាយចំពោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព  សេចក្តីថ្លៃថ្នូរ  និងសុភមង្គល  ព្រះប្រធានកិត្តិយសកាកបាទក្រហមកម្ពុជា៕