រាជធានីភ្នំពេញ ៖ ស្ត្រីម្នាក់រួមទាំងកូនប្រុសក្នុងផ្ទៃបានស្លាប់បាត់បង់ជីវិត បន្ទាប់ពីឈឺពោះគ្រប់ខែ ហើយត្រូវប្តី និងម្តាយបញ្ជូនទៅកាន់មន្ទីរពេទ្យបង្អែកសម្តេចឪដែលមានទីតាំងនៅសង្កាត់គីឡូម៉ែត្រលេខ៦ ខណ្ឌឫស្សីកែវ ។
ការស្លាប់ទាំងម្តាយ និងកូននេះបានធ្វើឱ្យមានប្រតិកម្មយ៉ាងខ្លាំងពីញាតិមិត្តជិតឆ្ងាយ និងមិនអស់ចិត្តពីសំណាក់ក្រុមគ្រួសារដោយអះអាងថា បណ្តាលមកពីការធ្វេសប្រហែសរបស់ពេទ្យឆ្មបដែលមិនបានយកចិត្តទុកដាក់។ លុះដល់ពេលអ្នកជំងឺធ្ងន់ធ្ងរមែនទែនរហូតផុតដង្ហើមទើបស្ទុះស្ទាចាត់ចែងបញ្ជូនទៅកាន់មន្ទីរពេទ្យកាល់ម៉ែតឱ្យផុតពីដៃ និងបានស្លាប់បាត់ទៅហើយមុនពេលបញ្ជូនទៅដល់ ហើយត្រូវបានរថយន្តដដែលជួយដឹកត្រឡប់មកវិញយកទៅឈាបនដ្ឋាន។
ស្ត្រីដែលបានស្លាប់ទាំងកូនក្នុងផ្ទៃនេះឈ្មោះហុក ដាវី អាយុ៣០ឆ្នាំ រស់នៅផ្ទះលេខ២៩២ ក្រុមទី២ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។ ស្ត្រីរូបនោះបានស្លាប់បាត់បង់ជីវិតកាលពីវេលាម៉ោង១ និង១៧នាទីរំលងអធ្រាត្រឈានចូលថ្ងៃទី៧ ខែឧសភា ពេលបញ្ជូនចេញពី មន្ទីរពេទ្យបង្អែកសម្តេចឪ ទៅកាន់មន្ទីរពេទ្យកាល់ម៉ែត។ ពេលទៅដល់មន្ទីរពេទ្យកាល់ម៉ែតត្រូវគ្រូពេទ្យប្រចាំការពិនិត្យភ្លាមៗទើបដឹងថា ស្លាប់បាត់ទៅហើយ ដែលគេសង្ស័យថា ស្លាប់តាំងតែពីបញ្ជូនចេញពីមន្ទីរពេទ្យសម្តេចឪម្លេ៉ះ។ សពម្តាយ និងកូនប្រុសត្រូវក្រុមគ្រួសារបញ្ជូនទៅកាន់ឈាបនដ្ឋានវត្តឧត្តរាវតី ធ្វើបុណ្យតាមប្រពៃណី និងបូជានៅព្រឹកថ្ងៃទី៨ ខែឧសភាទាំងក្តីអាឡោះអាល័យបំផុត និងនឹកស្មានមិនដល់ធ្វើឱ្យក្រុមគ្រួសារឈឺចាប់ក្រៃលែង ។
តាមស្ត្រីឈ្មោះក្លូត សុខា អាយុ៤៧ឆ្នាំ ត្រូវជាម្តាយស្ត្រីដែលស្លាប់មានប្រតិកម្មយ៉ាងខ្លាំងដោយអះអាងថា នេះជាកំហុសគ្រូពេទ្យឆ្មបនៃមន្ទីរពេទ្យសម្តេចឪ មិនយកចិត្តទុកដាក់ដោយទុកអ្នកជំងឺចោល ដល់ពេលធ្ងន់ធ្ងរទើបបញ្ជូនទៅកាន់មន្ទីរពេទ្យកាល់ម៉ែត ហើយបានស្លាប់ទាំងម្តាយ និងកូនក្នុងផ្ទៃ។ ស្ត្រីជាម្តាយដែលនៅកំដរជាប់ជាមួយកូនបានឱ្យដឹងទៀតថា កូនស្រីរបស់គាត់ឈឺពោះគ្រប់ខែត្រូវឆ្លងទន្លេនៅវេលាម៉ោងប្រមាណ១១ព្រឹក ថ្ងៃទី៦ ខែឧសភា ហើយបានធ្វើដំណើរទៅកាន់មន្ទីរពេទ្យបង្អែកសម្តេចឪដែលស្ថិតនៅជិតផ្ទះ តែត្រូវគ្រូពេទ្យឱ្យដឹងថា ស្បូនមិនទាន់បើកទេ ក៏ឱ្យត្រឡប់មកផ្ទះវិញ។ លុះដល់ពេលវេលាយប់ឈឺពោះទៀត ក៏ធ្វើដំណើរទៅមន្ទីរពេទ្យ ហើយត្រូវគ្រូពេទ្យដដែលអះអាងថា ស្បូនមិនទាន់បើកដដែល ក៏ឱ្យទៅ ផ្ទះវិញទៀត។ នៅពេលចុងក្រោយ ពេលឈឺពោះខ្លាំងទៀត ម្តាយ និងប្តីក៏បញ្ជូនទៅដល់មន្ទីរពេទ្យជាលើកទី៣ទៀត ហើយត្រូវគ្រូពេទ្យឆ្មបពិនិត្យដោយនិយាយថា ស្បូនមិនទាន់បើក គឺបើកតែមួយ។ ពេទ្យឆ្មបថារួចក៏ត្រឡប់ចូលទៅក្នុងបន្ទប់ដេកបាត់ទៅដោយប្រាប់មកវិញថា «កុំហៅច្រើនពេកចាំឈឺខ្លាំងសឹមហៅ ទុកឱ្យខ្ញុំបានដេកពួនផងអត់ងងុយណាស់»។ ថា តែប៉ុណ្ណេះអ្នកគ្រូឆ្មបទៅដេកបាត់ទៅ។
ស្ត្រីជាម្តាយបន្តទៀតថា ក្រោយមកកូនស្រីគាត់ឈឺពោះកាន់តែខ្លាំង ឈឺមហាឈឺ ប៉ុន្តែគាត់ជាម្តាយពុំហ៊ានទៅហៅគ្រូពេទ្យទេ ដោយខ្លាចគ្រូពេទ្យស្តីឱ្យទៀត ព្រោះគ្រូពេទ្យបានស្តីឱ្យរួចទៅហើយ។ ដោយកូនរបស់គាត់ទ្រាំឈឺរហូតដល់បាត់មាត់ ធ្លាក់ដៃចុះ ទើបរូបគាត់ស្ទុះទៅហៅគ្រូពេទ្យ ហើយត្រូវគេចាត់ចែងបញ្ជូនទៅកាន់មន្ទីរពេទ្យកាល់ម៉ែតឱ្យផុតពីដៃ។ ពេលបញ្ជូនទៅដល់មន្ទីរពេទ្យ កូនរបស់គាត់ស្លាប់បាត់ទៅហើយ រួមទាំងកូនក្នុងផ្ទៃ។ បន្ទាប់ពីស្លាប់បាត់បង់ជីវិត រថយន្តសាមុយរបស់មន្ទីរពេទ្យបង្អែកសម្តេចឪបានបញ្ជូនទៅកាន់ឈាបនដ្ឋានវត្តឧត្តរាវតីធ្វើបុណ្យតាមប្រពៃណី។
តាមសំដីបុរសជាប្តីឈ្មោះសួង ប៊ុនថេង អាយុ៣៥ឆ្នាំ ឱ្យដឹងថា នេះជាការអៀនខ្មាសណាស់ដែលមន្ទីរពេទ្យនៅក្នុងក្រុងដែលមានសំភារគ្រប់គ្រាន់ បែរជាគ្មានលទ្ធភាពសង្គ្រោះប្រពន្ធលោកឱ្យបានទាន់ពេល។ បើសិនគ្រូពេទ្យពិនិត្យមើលទៅឃើញវាធ្ងន់ធ្ងរគ្មានលទ្ធភាព ត្រូវបញ្ជូនទៅកាន់មន្ទីរពេទ្យធំៗដើម្បីសង្គ្រោះបន្ទាន់ មិនគួរទុកចោលក្នុងមន្ទីរពេទ្យដោយមិនរវីរវល់ ទុកទាល់តែស្លាប់បែបនេះឡើយ។
បុរសជាប្តីឱ្យដឹងថា លោកមិនប្តឹងតវ៉ាទេ គឺគ្រាន់តែសំណូមពរដល់ប្រធានមន្ទីរសុខាភិបាលរាជធានីភ្នំពេញឱ្យជួយពិនិត្យកុំឱ្យប្រជាពលរដ្ឋស្លូតត្រង់ដែលមិនដឹងអ្វីរងគ្រោះតទៅទៀត ព្រោះអ្នកជំងឺទៅមន្ទីរពេទ្យសង្ឃឹមលើគ្រូពេទ្យ។ តាមការពិនិត្យជាក់ស្តែង ទាំងសីលធម៌ និងវិជ្ជាជីវៈ គ្រូពេទ្យមួយចំនួនមានការខ្វះខាតដែលបានបណ្តោយឱ្យប្រពន្ធរបស់លោកធ្ងន់ធ្ងរស្លាប់ទើបបញ្ជូនទៅកាន់មន្ទីរពេទ្យកាល់ម៉ែត ដែលវាហួសពេលទៅហើយ។
លោកវេជ្ជបណ្ឌិតឡុង នី ប្រធានមន្ទីរពេទ្យបង្អែកសម្តេចឪបានឱ្យដឹងថា មន្ទីរពេទ្យជាអ្នករងគ្រោះ។ ការស្លាប់នេះអាចបណ្តាលមកពីអ្នកជំងឺធ្លាប់ដួល ធ្លាប់យកកូនចេញច្រើនដង និងធ្លាប់វះកាត់ប្រមាត់។
លោកនាយកមន្ទីរពេទ្យ រួមទាំងអ្នកស្រីពេទ្យឆ្មបឈ្មោះផា សុផាន ឱ្យដឹងថា នៅពេលដែលអ្នកជំងឺមកដល់ភ្លាម អ្នកជំងឺឈឺពោះខ្លាំង ត្រូវរូបគាត់ចាត់ចែងបញ្ជូនទៅកាន់មន្ទីរពេទ្យកាល់ម៉ែត ហើយបានស្លាប់នៅក្នុងមន្ទីរពេទ្យកាល់ម៉ែត។ អ្នកស្រីផា សុផាន ឱ្យដឹងថា អ្នកស្រីជាពេទ្យឆ្មបរយៈពេលជាង២០ឆ្នាំមកហើយមិនដែលជួបប្រទះ និងមានរឿងដូចនេះទេ ។
គួរបញ្ជាក់ថា ស្ត្រីឈឺពោះឆ្លងទន្លេដែលជួបគ្រោះអកុសលស្លាប់ទាំងកូននេះសំរាលកូនជាកូនលើកទី២។ បើតាមការអះអាងរបស់ប្តីថា នៅពេលមានផ្ទៃពោះ ប្រពន្ធលោកតែងតែទៅពិនិត្យសុខភាពត្រឹមត្រូវមិននឹកស្មានថា ជួបរឿងបែបនេះឡើយ។ នៅពេលភរិយាទទួលមរណភាព ប្តីបានបួសមុខភ្លើង ចំណែកកូនប្រុសម្នាក់អាយុ៤ឆ្នាំបានកោរសក់ឈរជិតមឈូសសពម្តាយទាំងយំសស្រាក់រហូតយំលែងចេញ។
មានមតិជាច្រើនបានរិះគន់ថា មកដល់សម័យជឿនលឿននេះហើយគេមិនគួរទុកឱ្យអ្នកសំរាលកូនស្លាប់ទាំងម្តាយ ទាំងកូនបែបនេះឡើយ។ យ៉ាងហោចណាស់សង្គ្រោះជីវិតម្តាយបានប្រសិនបើពេទ្យយកចិត្តទុកដាក់ឱ្យដល់កម្រិតបច្ចេកទេសរបស់ខ្លួន។ តើអ្នកស្រីគ្រូពេទ្យឆ្មបដែលទទួលបន្ទុកនេះមានវិប្បដិសារីដែរទេ?
ចែករំលែកព័តមាននេះ