យុវជនចំនួន៤នាក់ ត្រូវបានកម្លាំងសមត្ថកិច្ចខណ្ឌសែនសុខ ធ្វើការឃាត់ខ្លួន បន្ទាប់ពីឆែកឆេររកឃើញខ្សែក្រវាត់ និងដុំថ្មជាច្រើនដុំ ដែលបម្រុងទុក
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនចំនួន៤នាក់ ត្រូវបានកម្លាំងសមត្ថកិច្ចខណ្ឌសែនសុខ ធ្វើការឃាត់ខ្លួន បន្ទាប់ពីឆែកឆេររកឃើញខ្សែក្រវាត់ និងដុំថ្មជាច្រើនដុំ ដែលបម្រុងទុកវា.យតប់គ្នា បង្កឱ្យមានការភ្ញាក់ផ្អើលកាលពីវេលាម៉ោង១រំលងអធ្រាត្រឈានចូលថ្ងៃទី១៧ ខែកក្កដា ឆ្នាំ២០២៣ នៅត្រង់ចំណុចខាងមុខក្លិបកម្សាន្ត «ហ្គោឡាញ» តាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពពីកម្លាំងសមត្ថកិច្ចខណ្ឌសែនសុខ បានរៀបរាប់ប្រាប់ឲ្យដឹងថា នៅមុនពេលកើតហេតុ កម្លាំងសមត្ថកិច្ចបានជិះម៉ូតូធ្វើការល្បាតក្នុងភូមិសាស្ត្រ ដើម្បីកាត់បន្ថយ និងទប់ស្កាត់បទល្មើសផ្សេងៗដែលអាចកើតឡើងដោយប្រការណាមួយ។ លុះពេលជិះមកដល់ចំណុចកើតហេតុ ក៏ប្រទះឃើញក្រុមយុវជនមានគ្នាចំនួន៤នាក់ កំពុងតែឈរក្បែរម៉ូតូមើលទៅគួរឱ្យសង្ស័យ។ បន្ទាប់មកកម្លាំងល្បាតក៏បានចូលទៅធ្វើការសាកសួរ និងឆែកឆេរ ដើម្បីត្រួតពិនិត្យ ស្រាប់តែប្រទះឃើញខ្សែក្រវាត់ និងដុំថ្មជាច្រើនដុំ ដែលក្រុមយុវជនទាំង៤នាក់នោះ ច្រកដាក់ក្នុងថង់ខ្មៅមួយទុក ដើម្បីធ្វើសកម្មភាពវា.យតប់គ្នា។ ចុងក្រោយ ត្រូវកម្លាំងសមត្ថកិច្ចធ្វើការឃាត់ខ្លួនភ្លាមៗតែម្ដង។
សមត្ថកិច្ចបន្តថា នៅចំពោះមុខសមត្ថកិច្ច ក្រុមយុវជនទាំងនោះបានឆ្លើយថា នៅមុនពេលកើតហេតុ ពួកគេបានចូលទៅរាំលេងកម្សាន្តនៅក្នុងក្លិបកម្សាន្ត «ហ្គោលឡាញ» ហើយក៏មានបញ្ហាជាមួយយុវជនមួយក្រុមទៀតដែលអង្គុយលើសាឡុងជាប់គ្នា។ បន្ទាប់មក យុវជនទាំងនោះក៏បានហៅពួកគេអោយចេញក្រៅ ទើបធ្វើឱ្យពួកគេខ្លាច ក៏រើសដុំថ្មទុក ដើម្បីការពារខ្លួនតែម្តង។
បច្ចុប្បន្ន ក្រុមយុវជនទាំង៤នាក់ខាងលើនេះ រួមទាំងវត្ថុតាងត្រូវបានសមត្ថកិច្ចនាំយកទៅអធិការដ្ឋាននគរបាលខណ្ឌសែនសុខ ធ្វើការសាកសួរ និងកសាងសំណុំរឿង ដើម្បីចាត់ការទៅតាមផ្លូវច្បាប់ជាបន្តទៀត៕
ចែករំលែកព័តមាននេះ