ចាប់ឡាន២គ្រឿង លួចដឹកជញ្ជូនបទល្មើសសត្វព្រៃ និងបទល្មើសជលផល បំរុងឆ្លងដែនទៅវៀតណាម
- ព្រៃវែង
ខេត្តព្រៃវែង ៖ សត្វព្រៃចំនួន១២៨ក្បាល និង កូនបបែល ព្រមទាំងត្រីលំអ ( ត្រីក្រឹម ) ជាង៣០០
ខេត្តព្រៃវែង ៖ សត្វព្រៃចំនួន១២៨ក្បាល និង កូនបបែល ព្រមទាំងត្រីលំអ ( ត្រីក្រឹម ) ជាង៣០០
ខេត្តព្រៃវែង ៖ សត្វព្រៃចំនួន១២៨ក្បាល និង កូនបបែល ព្រមទាំងត្រីលំអ ( ត្រីក្រឹម ) ជាង៣០០ក្បាល ដែលក្រុមឈ្មួញកំពុងដឹកជញ្ជូនបំរ៉ុងនាំចេញទៅប្រទេសវៀតណាម ត្រូវបានកំលាំងកងរាជអាវុធហត្ថស្រុកកំពង់ត្របែក ស្ទាក់ចាប់បាន រួចប្រគល់ទៅអោយមន្ត្រីជំនាញ ចាត់ការបន្ត។
ប្រតិបត្តិការបង្ក្រាបបទល្មើសខាងលើនេះ បានធ្វើឡើងកាលពីវេលាម៉ោង១០និង៣០នាទីព្រឹក ថ្ងៃទី១៣ កក្កដា នៅចំណុចភូមិចំណងទៀក ឃុំពាមមន្ទា ស្រុកកំពង់ត្របែក ខេត្តព្រៃវែង។ ជាមួយគ្នានេះ កំលាំងអាវុធហត្ថក៏ចាប់ឃាត់ខ្លួនអ្នកបើកបរ ព្រមទាំងព្រូរថយន្តបានចំនួន៣នាក់ផងដែរ។
មន្ត្រីអាវុធហត្ថស្រុកកំពង់ត្របែកបានអោយដឹងថា រថយន្តដែលត្រូវចាប់ឃាត់ទី១ ជារថយន្តទួរីស ពណ៌ទឹកប្រាក់ ពាក់ស្លាកលេខភ្នំពេញ២S-៤៤៣០ ដឹកជញ្ជូនបទល្មើសសត្វព្រៃខុសច្បាប់ចំនួន១៥ប្រភេទ ស្មើនឹង១២៨ក្បាល ក្នុងនោះរួមមាន ៖
១-សត្វសេកប្រេស៊ីលពណ៏ខៀវ ៣ក្បាល
២-សត្វសេកប្រស៊ីលពណ៏ខ្មៅ ៤ក្បាល
៣-សត្វសេកប្រេស៊ីលពណ៏ស ១ក្បាល
៤-កូនសេកពណ៏លឿង ១៨ក្បាល
៥-អណ្តើកធំ២ក្បាល
៦-កូនអណ្តើកតូចៗ ២១ក្បាល
៧-មាន់ព្រៃ៨ក្បាល(ងា.ប់៦)
៨-ទន្សាយ៣៨ក្បាល(ងា.ប់៣០)
៩-កូនបង្គួយពណ៏២ថង់
១០-ចាបព្រៃ ៤៣ក្បាល
១១-កូនកាំប្រុក ២០ក្បាល
១២-កូនកណ្តុល ៥០ក្បាល
១៣-កូនពីងពាង៩ប្រអប់
១៤-កូនសំពោច៦ក្បាល
១៥-កណ្តុលធន់ធំងា.ប់៥ក្បាល
ចំណែករថយន្តទី២ ជារថយន្តទួរីស ពណ៌សពាក់ស្លាកលេខភ្នំពេញ ២H-១៣៣៧ ដឹកជញ្ជូនបទល្មើសជល់ផលខុសច្បាបរួមមាន ត្រី២ប្រភេទ ចំនួន៩ធុង កូនបបែល៧៩ក្បាល និងត្រីលំអគ្រប់មុខ ២៤២ក្បាល(ត្រីក្រឹម)។
ក្រោយធ្វើការបង្ក្រាបបាន កំលាំងអាវុធហត្ថបានបប្រគល់ជនសង្ស័យព្រមទាំងវត្ថុតាង ទៅអោយមន្ត្រីជំនាញចាត់ការបន្ត នៅរសៀលថ្ងៃដដែល ដោយសត្វព្រៃបានប្រគល់ទៅអោយក្រុមអន្តរាគមបង្ក្រាបបទល្មើសសត្វព្រៃចល័ត ចំណែកត្រីនិងបបែល ប្រគល់ទៅអោយផ្នែករដ្ឋបាលជលផលស្ទឹងស្លូត។
ប៉ុន្តែអ្វីដែលគួរអោយកត់សំគាល់ គឺនៅព្រឹកថ្ងៃទី១៤កក្កដា អ្នកយកពត៌មានកោះសន្តិភាព បានសាកសួរទៅលោក សឿ វិចិត្ត នាយផ្នែករដ្ឋបាលជលផលស្ទឹងស្លូត អំពីចំណាត់ការបន្ត ប៉ុន្តែត្រូវបានលោក សឿ វិចិត្ត បញ្ជាក់ថា កូនបបែល និងត្រីទាំងអស់នោះ លោកបានប្រគល់ទៅអោយម្ចាស់គេវិញអស់ហើយ មូលហេតុព្រោះនៅក្នុងច្បាប់ ការដឹកជញ្ជូនបែបនេះ គឺមិនមែនជាបទល្មើសនោះទេ ៕
ចែករំលែកព័តមាននេះ