មណ្ឌលថែទាំមនុស្សចាស់ជរាគ្មានទីពឹង ដោយឥតគិតថ្លៃដំបូងគេ បានបង្កើតឡើងហើយ ក្នុងទឹកដីស្រុកព្រះស្តេច ខេត្តព្រៃវែង
- ព្រៃវែង
(ព្រៃវែង) ៖ មណ្ឌលថែទាំមនុស្សចាស់ជរាគ្មានទីពឹងដំបូងគេ ត្រូវបានបង្កើតឡើង និងធ្វើពិធីសម្ភោ
(ព្រៃវែង) ៖ មណ្ឌលថែទាំមនុស្សចាស់ជរាគ្មានទីពឹងដំបូងគេ ត្រូវបានបង្កើតឡើង និងធ្វើពិធីសម្ភោធដាក់អោយប្រើប្រាស់ជាផ្លូវការហើយ កាលពីព្រឹកថ្ងៃទី៧កក្តដាកន្លងទៅ ដែលទីតាំងស្ថិតនៅក្នុងបរិវេណវត្ត សឹម្ពិលីព្រឹក្សារកាជួរ ក្នុងភូមិរកាជួរទី១ ឃុំបន្ទាយចក្រី ស្រុកព្រះស្តេច ខេត្តព្រៃវែង។
មណ្ឌលថែទាំមនុស្សចាស់ជរាគ្មានទីពឹងនេះ ត្រូវបានផ្ដួចផ្ដើមបង្កើតឡើងដោយលោក ហ៊ឺ បាវី ប្រធានក្រុមការងារថ្នាក់ជាតិ ចុះជួយមូលដ្ឋានស្រុកព្រះស្តេច ក្នុងគោលបំណង ដើម្បីបង្ហាញអំពីការយកចិត្តទុកដាក់ ចំពោះមនុស្សចាស់ នៅក្នុងសហគមន៍ ជាពិសេស ដើម្បីចូលរួមសម្រាលទុក្ខលំបាក របស់មនុស្សចាស់ ដែលគ្មានទីពឹង។
លោក ហ៊ឺ បាវី អគ្គនាយកកំពង់ផែស្វ័យត្ន័ភ្នំពេញ និងជាប្រធានក្រុមការងារថ្នាក់ជាតិចុះជួយស្រុកព្រះបានអោយដឹងថាមណ្ឌលនេះ បង្កើតឡើងផ្តោតលើមុខងារសំខាន់ៗចំនួន៣ គឺ ១-ថែទាំមនុស្សចាស់ជរាគ្មានទីពឹង និងមានជីវភាពក្រីក្រលំបាក ដោយផ្តល់នូវកន្លែងស្នាក់នៅ និងអាហារហូបចុកសមរម្យ, ទី២-ផ្តល់នូវកម្មវិធីដំណើរកម្សាន្ត ទៅកាន់តំបន់ប្រវត្តិសាស្ត្រ និងតំបន់ទេសចរណ៍សំខាន់ៗរបស់កម្ពុជា ដើម្បីបង្កើតភាពសប្បាយរីករាយ និងអារម្មណ៍ស្រស់ថ្លាអោយពួកគាត់ និងទី៣-ជាទីកន្លែងសម្រាប់ប្រមូលផ្តុំមនុស្សចាស់ ដែលមានបទពិសោធន៍ ដើម្បីធ្វើការពិគ្រោះ និងចែករំលែកបទពិសោធន៍ជូនដល់យុវជន ឈានទៅរកការជួយលើកកម្ពស់សង្គមជាតិ។
លោក ហ៊ឺ បាវី បានបញ្ជាក់ថា លោកមានគម្រោងបង្កើតមណ្ឌលថែទាំមនុស្សចាស់គ្មានទីពឹងនេះ សម្រាប់គ្រប់ឃុំទាំងអស់ នៅក្នុងស្រុកព្រះស្តេច ពោលគឺទាំង ១១ឃុំតែម្តង។
ដោយឡែកលោក ភុន សម្ភស្ស អភិបាលស្រុកព្រះស្តេច បានអោយដឹងថា មណ្ឌលថែទាំមនុស្សចាស់ជរាគ្មានទីពឹងនេះ តាមគំរោងនិងត្រូវបង្កើតឡើងនៅតាមទីវត្តអារាម និងនៅគ្រប់ឃុំទាំងអស់ក្នុងស្រុកព្រះស្តេចតែម្តង ដើម្បីបញ្ជៀសកុំអោយមានការស្ទះណែននៅលើទីតាំងតែមួយ ប៉ុន្តែពេលនេះយើងបើកដំណើរការ ទីតាំងដំបូងនៅក្នុងឃុំបន្ទាយចក្រីសិន។
លោកអភិបាលស្រុកបានបន្តថា មណ្ឌលថែទាំមនុស្សចាស់ជរាគ្មានទីពឹងដំបូងគេនេះ បច្ចុប្បន្នមានមនុស្សចាស់ជរាគ្មានទីពឹងកំពុងរស់នៅចំនួន៧នាក់ហើយ ហើយទៅថ្ងៃមុខចំនួននេះអាចហ្នឹងបន្តកើនឡើងថែមទៀត ចំណែកឯលក្ខ័ណសម្រាប់មនុស្សចាស់ដែលអាចចូលមករស់នៅក្នុងមណ្ឌលនេះបាន គឺតាមរយៈអាជ្ញាធរ បើចុះពិនិត្យជាក់ស្តែងទៅឃើញថា ពួកគាត់ពិតជាជនចាស់ជរាគ្មានទីពឹងពិតមែន នោះក្រុមការងារហ្នឹងទទួលយកពួកគាត់ អោយមករស់នៅក្នុងមណ្ឌលភ្លាម ហើយការចំណាយទាំងអស់ គឺក្រុមការងារថ្នាក់ជាតិជាអ្នកខុសត្រូវ ក្រោមការគ្រប់គ្រងនិងមើលថែផ្ទាល់ ពីអាជ្ញាធរ និងព្រះសង្ឃនៅក្នុងវត្ត ៕
ចែករំលែកព័តមាននេះ