ខេត្តបាត់ដំបង ៖ ប្រភពព័ត៌មានពីស្រុករតនមណ្ឌល បានឱ្យដឹងថា មន្ត្រីយោធាមួយក្រុមក្រោមឱវាទរបស់លោកនួន មួន មេបញ្ជាការផ្នែកសឹករងស្រុករតនមណ្ឌល បានប្រឈមមុខដាក់គ្នាយ៉ាងតឹងតែងជាមួយក្រុមតំណាងប្រជាពលរដ្ឋចំនួន៨៤គ្រួសារ ដោយសារការដណ្តើមកាន់កា.ប់ដីធ្លីមួយកន្លែងនៅចំណុចភូមិបួររុន ឃុំត្រែង ស្រុករតនមណ្ឌល
ខេត្តបាត់ដំបង ៖ ប្រភពព័ត៌មានពីស្រុករតនមណ្ឌល បានឱ្យដឹងថា មន្ត្រីយោធាមួយក្រុមក្រោមឱវាទរបស់លោកនួន មួន មេបញ្ជាការផ្នែកសឹករងស្រុករតនមណ្ឌល បានប្រឈមមុខដាក់គ្នាយ៉ាងតឹងតែងជាមួយក្រុមតំណាងប្រជាពលរដ្ឋចំនួន៨៤គ្រួសារ ដោយសារការដណ្តើមកាន់កាប់ដីធ្លីមួយកន្លែងនៅចំណុចភូមិបួររុន ឃុំត្រែង ស្រុករតនមណ្ឌល ។ ការប្រឈមមុខដាក់គ្នានេះមានរយៈពេលពីរថ្ងៃមកហើយ គឺចាប់ពីថ្ងៃទី៧ ដល់ទី៨ ឧសភា ហើយគេមិនទាន់ឃើញមានកិច្ចអន្តរាគមន៍ណាមួយពីអាជ្ញាធរ ឬសមត្ថកិច្ចនោះទេ រហូតធ្វើឱ្យតំណាងពលរដ្ឋមួយចំនួនកំពុងស្វែងរកជំនួយផ្នែកច្បាប់ពីអង្គការការពារសិទ្ធិមនុស្សទៀតផង ។
លោកយិន ម៉េងលី មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុក ប្រចាំខេត្តបាត់ដំបង និងប៉ៃលិន បានថ្លែងថា តំណាងប្រជាពលរដ្ឋចំនួន២នាក់បានមកកាន់ស្នាក់ការរបស់លោកកាលពីព្រឹកថ្ងៃអាទិត្យ ទី៨ ឧសភា ដើម្បីស្នើឱ្យជួយអន្តរាគមន៍ជាបន្ទាន់នូវអ្វីដែលពួកគាត់អះអាងថា ជាការរំលោភបំពានដណ្តើមកាន់កាប់ដីចម្ការរបស់ពួកគាត់ពីសំណាក់កម្លាំងយោធាមួយក្រុមរបស់លោកនួន មួន មេបញ្ជាការផ្នែកសឹករងស្រុករតនមណ្ឌល ។ មន្ត្រីសិទ្ធិមនុស្សរូបនេះ និយាយថា នេះជាករណីទំនាស់ដីធ្លីរវាងប្រជាពលរដ្ឋទន់ខ្សោយជាមួយកម្លាំងប្រដាប់អាវុធជាយោធាមួយក្រុមដែលធ្លាប់មានឈ្មោះអាស្រូវកន្លងមករឿងដីធ្លីនេះ ។
កសិករម្នាក់ដែលបានមកដល់ស្នាក់ការអាដហុកលោកពិន វ៉េត អាយុ៥៥ឆ្នាំ រស់នៅភូមិរស្មីសង្ហា ឃុំស្តៅ ស្រុករតនមណ្ឌល បាននិយាយថា ដីចម្ការរបស់គាត់មួយចំនួននៅចំណុចទំនាស់នោះ ក៏ត្រូវមន្ត្រីយោធារំលោភយកដែរ ។ គាត់ថា ដីនោះត្រូវបានបែងចែកដំបូងដោយអាជ្ញាធរមូលដ្ឋាន កាលពីអំឡុងឆ្នាំ២០០០ លុះនៅឆ្នាំ២០០៥ លោកសួស ជឿន មេឃុំត្រែង បានចេញប័ណ្ណកាន់កាប់ដីនេះបណ្តោះអាសន្នដល់ប្រជាពលរដ្ឋនៅតំបន់នោះគ្រប់ៗគ្នា ហើយប្រជាពលរដ្ឋបានកាប់ឆ្ការបង្កបង្កើនផលលើដីនោះបន្តបន្ទាប់រហូតមក ។ បុរសពិការជើងម្ខាងរូបនេះបានបញ្ជាក់ថា លុះនៅដើមខែមេសា ឆ្នាំ២០១១នេះ ស្រាប់តែលេចមុខមន្ត្រីយោធាមួយក្រុមខ្លះថា កូនចៅលោកនួន មួន មេបញ្ជាការផ្នែកសឹករងស្រុករតនមណ្ឌល ដឹកនាំដោយលោកប្រាក់ តារ៉ា មន្ត្រីយោធាវរសេនាតូចលេខ៥០៧ យកត្រាក់ទ័រមកឈូសឆាយលើដីប្រជាពលរដ្ឋ ធ្វើឱ្យមានការប្រឈមមុខដាក់គ្នាយ៉ាងខ្លាំងរហូតដល់ពេលនេះ។
ប្រជាពលរដ្ឋម្នាក់ទៀតអ្នកស្រីលាង សុខហ៊ាង អាយុ៣១ឆ្នាំ ដែលបានមកសុំជំនួយពីសមាគមសិទ្ធិមនុស្សដែរនោះ និយាយថា គាត់បានទិញដីបន្តពីប្រជាពលរដ្ឋនៅទីនោះចំនួន១០ហិកតា ដែលមានលិខិតផ្ទេរសិទ្ធិកាន់កាប់ដីទទួលស្គាល់ពីអាជ្ញាធរមូលដ្ឋានត្រឹមត្រូវកាលពីឆ្នាំ២០០៨ ប៉ុន្តែពេលនេះបែរជាមន្ត្រីយោធាឈ្មោះប្រាក់ តារ៉ា យកត្រាក់ទ័រមកឈូសឆាយដាំដំឡូងមីទៅវិញ ដោយអះអាងថា ជាដីរបស់គាត់ (ប្រាក់ តារ៉ា) ។ អ្នកស្រីនិយាយថា លោកមេឃុំត្រែងដែលទើបកាន់តំណែងថ្មីឈ្មោះរស់ សុត្ថា បានចេញលិខិតអន្តរាគមន៍កាលពីថ្ងៃទី២ ឧសភា ឆ្នាំ២០១១ ប្រាប់ទៅឈ្មោះប្រាក់ តារ៉ា ឱ្យបញ្ឈប់សកម្មភាពឈូសឆាយ ប៉ុន្តែគេមិនឃើញមន្ត្រីយោធារូបនេះផ្អាកសកម្មភាពនេះឡើយ ហើយបានឆ្លើយតបថា បើលោកនួន មួន បញ្ជាឱ្យឈប់ទើបគាត់ឈប់ ។
លោកប្រាក់ តារ៉ា បានបំភ្លឺប្រាប់កោះសន្តិភាព កាលពីព្រឹកថ្ងៃទី៨ ឧសភា ថា លោកនួន មួន បានបែងចែកដីនេះឱ្យរូបលោក និងមន្ត្រីយោធាជាច្រើននាក់ទៀតក្នុងអំឡុងឆ្នាំ១៩៩៦ លុះនៅឆ្នាំ១៩៩៩ រូបលោកបានស្នើសុំប័ណ្ណកាន់កាប់ដីនេះពីអាជ្ញាធរមូលដ្ឋាន ។ ប៉ុន្តែលោកតារ៉ា បានបញ្ជាក់ថា ទាំងរូបលោក និងមន្ត្រីយោធាជាច្រើនទៀត មិនបានកាប់ឆ្ការបង្កបង្កើនផលទេ ព្រោះជាប់ដៃធ្វើសង្គ្រាម… ទើបតែពេលនេះរូបលោកមានពេលមកធ្វើចម្ការ ។
សូមបញ្ជាក់ថា ប្រទេសកម្ពុជា បានបញ្ចប់សង្គ្រាមទាំងស្រុងក្រោយពីកម្លាំងខ្មែរក្រហមធ្វើសមាហរណកម្មក្នុងអំឡុងឆ្នាំ១៩៩៦ ដូច្នេះចាប់ពីឆ្នាំ ១៩៩៩ រហូតមកប្រទេសកម្ពុជាគ្មានសង្គ្រាមទេ ទើបតែប៉ះទង្គិចគ្នាជាថ្មីជាមួយប្រទេសសៀម ក្នុងឆ្នាំ២០០៨ រហូតមកដល់ពេលនេះតែប៉ុណ្ណោះ ។
ពាក់ព័ន្ធលិខិតអន្តរាគមន៍របស់លោករស់ សុត្ថា មេឃុំត្រែង លេខ០០២ ឃ.ត ចុះថ្ងៃទី២ ឧសភា ឆ្នាំ២០១១ ដែលស្នើឱ្យលោកប្រាក់ តារ៉ា បញ្ឈប់សកម្មភាពឈូសឆាយលើដីទំនាស់។ លោកប្រាក់ តារ៉ា បានបញ្ជាក់ថា លោកបានឃើញលិខិតនោះហើយ ប៉ុន្តែរូបលោកបានសួរនាំភ្លាមៗទៅលោកមេឃុំត្រែង អំពីខ្លឹមសារនៃលិខិតនេះ ហើយលោកមេឃុំបានបញ្ជាក់ប្រាប់លោកតាមទូរស័ព្ទវិញថា៖ «អត់បញ្ហាទេ ធ្វើចុះ ព្រោះលិខិតនេះ គឺលោកគ្រាន់តែចេញដើម្បីឱ្យប្រជាពលរដ្ឋដែលមកប្តឹងអស់ចិត្តប៉ុណ្ណោះ…»។
កោះសន្តិភាពបានព្យាយាមទំនាក់ទំនងសុំការបំភ្លឺពីលោករស់ សុត្ថា មេឃុំត្រែង ជុំវិញរឿងវិវាទដីធ្លីនេះ ប៉ុន្តែមិនអាចស្វែងរកមធ្យោបាយដើម្បីសុំការបំភ្លឺបានកាលពីព្រឹកថ្ងៃទី៨ ឧសភា កន្លងមកនេះ ។
ដោយឡែកលោកនួន មួន មេបញ្ជាការផ្នែកសឹករងស្រុករតនមណ្ឌល ដែលរូបលោកមានជាប់ពាក់ព័ន្ធជម្លោះដណ្តើមដីនេះដែរនោះ បានបំភ្លឺប្រាប់តាមទូរស័ព្ទថា រូបលោកពិតជាបានបែងចែកដីនៅតំបន់នោះឱ្យទៅមន្ត្រីយោធារបស់លោកមែន គឺជាង១០០នាក់ឯណោះ ដែលដីនេះបានមកពីការស្នើសុំពីអាជ្ញាធរស្រុកកាលពីឆ្នាំ១៩៩៦ ហើយរូបលោកក៏មានដីនៅតំបន់នោះដែរ ប៉ុន្តែលោកបានទិញបន្តពីកូនចៅរបស់លោកទេ ។ លោកនួន មួន បានចោទប្រកាន់ប្រជាពលរដ្ឋដែលមានដីនៅទីនោះថា ជាក្រុមអនាធិបតេយ្យ ។ លោកបញ្ជាក់ថា ដីកំពុងមានទំនាស់នេះមានចំនួនជិត២០០ហិកតា ហើយលោកបានបញ្ជូនឯកសារពាក់ព័ន្ធទៅកាន់អធិការកិច្ចខេត្តរួចហើយ ។
បើតាមប្រភពពីប្រជាពលរដ្ឋថា ឯកសាររបស់លោកនួន មួន មួយចំនួនក្លែងក្លាយ មានបន្លំស្នាមមេដៃ និងត្រាអាជ្ញាធរស្រុក ។ លោកយិន ម៉េងលី មន្ត្រីសិទ្ធិមនុស្សនិយាយថា បើយោធាមានប័ណ្ណកាន់កាប់ដីពីឆ្នាំ១៩៩៩ ហើយទើបចាប់ផ្តើមដាំដុះក្នុងឆ្នាំ២០១១ នេះគឺជាការផ្លោះសិទ្ធិ ។ រីឯប្រជាពលរដ្ឋកាន់កាប់ដីពីឆ្នាំ២០០០ រហូតមានឯកសារទទួលស្គាល់ដោយអាជ្ញាធរផង ចាត់ទុកថា ស្របច្បាប់ ។ លោកនិយាយថា មន្ត្រីយោធាដែលពាក់ព័ន្ធនឹងវិវាទនេះ គប្បីទុកឱ្យអាជ្ញាធរដោះស្រាយបញ្ចប់ទើបល្អ រីឯអាជ្ញាធរមិនគួរព្រងើយកន្តើយលើករណីនេះទេ ព្រោះការព្រងើយកន្តើយអាចបង្កឱ្យមានអំពើហិង្សាកើតឡើង ។ លោកនិយាយថា លោកនឹងចុះទៅពិនិត្យ និងស៊ើបអង្កេតលើករណីនេះ ៕
ចែករំលែកព័តមាននេះ