កាលពីពេលថ្មីៗកន្លងទៅនេះ មហាជនអ្នកប្រើប្រាស់បណ្តាញសង្គមជាច្រើនអាចនឹងធ្លាប់បានជ្រាបពីជីវិតរបស់លោកតាខ្លះៗហើយ បើទោះបីជាព្រះជន្មលោកតាកាន់តែជ្រេហើយក្តី ក៏លោកតានៅតែធ្វើវែកពីត្រឡោកដូងលក់ ដើម្បី
ខេត្តសៀមរាប ៖ កាលពីពេលថ្មីៗកន្លងទៅនេះ មហាជនអ្នកប្រើប្រាស់បណ្តាញសង្គមជាច្រើនអាចនឹងធ្លាប់បានជ្រាបពីជីវិតរបស់លោកតាខ្លះៗហើយ បើទោះបីជាព្រះជន្មលោកតាកាន់តែជ្រេហើយក្តី ក៏លោកតានៅតែធ្វើវែកពីត្រឡោកដូងលក់ ដើម្បីបានលុយកាក់ខ្លះៗទុកគ្រាន់ដោះស្រាយជីវភាពប្រចាំថ្ងៃ។
ជាការកត់សម្គាល់ ការធ្វើវែកពីត្រឡោកដូងរបស់លោកតារូបនេះ ឃើញថា វាពិតថ្មីប្លែកសម្រាប់បងប្អូនដែលពុំធ្លាប់បានដឹង និងឃើញ ប៉ុន្តែដោយសារលោកតាបានធ្វើវែកអំពីត្រឡោកនេះ តាំងពីកំលោះមកម្ល៉េះ ដែលលោកតាបានធ្វើ និងចាប់យកអាជីពមួយនេះ។
ប្រាកដណាស់ បើទោះជាពេលបច្ចុប្បន្ននេះ វែកនៅលើទីផ្សារមានច្រើនក៏ពិតមែន ដោយវែកទាំងនោះគេធ្វើឡើងពីជ័រ និងឈើ ឬអ្វីផ្សេងៗនោះ ក៏លោកតានៅតែមិនបោះបង់ការងារដែលធ្លាប់បានធ្វើតាំងពីបុរាណកាលនោះឡើយ ពោលគឺរកអ្វីបាន ចេះតែរករបរនឹងទៅ។ ក្នុងនោះដែរ អ្វីដែលជាភាពលេចធ្លោរបស់លោកតាក្នុងការធ្វើវែកនេះ គឺត្រឡោកតែម្តង ដោយមើលទៅលើសភាពត្រឡោកឃើញថា ខ្មៅក្រឹប រលោងស្រិល ស្រស់ស្អាតតែម្តង ហើយយើងក៏អាចយកទៅដួសអ្វីក៏បានដែរ។ ហើយការដែលប្រើប្រាស់វែកនេះ គឺល្អចំពោះសុខភាព ព្រោះជាវែកឈើរបស់ខ្មែរធ្វើ គាំទ្រផលិតផលក្នុងស្រុក គាំទ្រស្នាដៃកូនខ្មែរ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ចៅស្រីរបស់លោកតា បានជម្រាបជូនថា លោកតាឈ្មោះ បឹង សុខ មានវ័យ៨៧ឆ្នាំ សព្វថ្ងៃនេះលោកតាបានប្រកបរបរធ្វើវែកលក់ ដោយកាលពីកន្លងទៅ ធ្វើនៀលសម្រាប់ដួសអង្ករ និងប្រភូមិ ធ្វើអំពីផ្តៅជាដើម។ ហើយលោកតា បឹង សុខ ដែលមានស្រុកកំណើតនៅភូមិជប់សោម ឃុំវគ្គស្នែង ស្រុកអង្គរធំ ខេត្តសៀមរាប រូបនេះ បានធ្វើវែកពីត្រឡោកលក់តាំងពីមុនរបបអាវខ្មៅទៅទៀត នៅពេលដែលសម័យប៉ុលពតបានចូលមកដល់ លោកតាក៏បានឈប់ ក្រោយមកលោកតាក៏បន្តធ្វើរហូតមកដល់បច្ចុប្បន្ននេះ។
បើតាមការបង្ហើបរបស់ចៅស្រីលោកតា បានជម្រាបជូនបន្តថា វែកធំមានតម្លៃ ១០០០០រៀល និងវែកតូចមានតម្លៃ ៨០០០រៀល។ ហើយវែកដែលបានធ្វើឡើងនីមួយៗ គឺផ្ចិតផ្ចង់ជាទីបំផុត ដោយត្រឡោកត្រូវខាត់ដោយដៃអោយម៉ត់រលោង និងដងរបស់វែក គឺយកដើម កបភ្ញៀង មកធ្វើ ហើយដើមប្រភេទនេះ គឺមានតែនៅក្នុងព្រៃតែប៉ុណ្ណោះ ពោលគឺការធ្វើពិតជាពុំងា.យស្រួយនោះឡើយ។
តាមការបង្ហើបរបស់ចៅស្រីលោកតា បានជម្រាបជូនបន្តទៀតថា លោកតា បឹង សុខ កាលពីនៅមានកម្លាំង លោកតាអាចធ្វើវែកពីក្រឡោកនេះ បានចន្លោះពី៣ទៅ៤វែក ប៉ុន្តែដោយសារលោកតាមានវ័យកាន់តែចាស់ លោកតាពុំអាចធ្វើបានដូចមុនៗឡើយ គឺអាចធ្វើបានមួយថ្ងៃតែមួយប៉ុណ្ណោះ។
គួរបញ្ជាក់ផងដែរថា បើទោះបីជាមានមហាជនបានស្គាល់លោកតាច្រើនក៏ពិតមែន ប៉ុន្តែលោកតាលក់មិនសូវដាច់នោះទេ ដោយសារមានតែអ្នកនៅក្នុងភូមិរបស់លោកតា ជួយទិញ ហើយនឹងគាំទ្រស្នាដៃរបស់លោកតាតែប៉ុណ្ណោះ។ ដូច្នេះហើយ លោកតាសូមអោយមហាជនជួយជាវវែកដែលធ្វើអំពីក្រឡោករបស់លោកតាផង ដើម្បីឱ្យលោកតាបានថវិការខ្លះៗគ្រាន់ទិញចំណីចំណុក និងថ្នាំសង្កូវខ្លះៗផងដែរ។
គួររលឹកថា លោកតា គឺជាបុរសពោះម៉ាយ មានកូនចំនួន៩នាក់ ដែលសុទ្ធសឹងតែជួបការខ្វះខាតដូចគ្នា ហើយលោកតាសព្វថ្ងៃនេះ គឺរស់នៅជាមួយកូនប្រុសច្បង ដែលជាបុរសពោះម៉ាយដូចគ្នាផងដែរ៕ ដោយ ៖ លីហួ គីមឆាយ
ចែករំលែកព័តមាននេះ