ខេត្តកំពត ៖ ការអនុវត្តច្បាប់ចរាចរណ៍ផ្លូវគោកចំពោះអ្នកបើកបរយានយន្តគ្រប់ប្រភេទការផាកពិន័យចំពោះម៉ូតូគ្មានកញ្ចក់មើលក្រោយ អ្នកបើកបរមិនពាក់មួកសុវត្ថិភាព និងរថយន្តដឹកសំពីងសំពោងហួសកំណត់ជាដើម បច្ចុប្បន្ននៅក្នុងទីក្រុងកំពត សមត្ថកិច្ចចម្រុះក្នុងខេត្តកំពុងអនុវត្ត នៅពេលថ្ងៃយ៉ាងសស្រាក់សស្រាំស្ទើរតែគ្មានពេលសម្រាក ហើយការអនុវត្តច្បាប់នេះធ្វើឱ្យប្រជាពលរដ្ឋគ្រប់មជ្ឈដ្ឋាន រួមទាំងមន្ត្រីរាជការផងដែរ មានការកក់ក្តៅ និងគាំទ្រយ៉ាងខ្លាំង ។
ប្រជាពលរដ្ឋមើលឃើញថា ចាប់តាំងពីការអនុវត្តច្បាប់ចរាចរណ៍ផ្លូវគោកបានមួយរយៈមក អត្រាគ្រោះថ្នាក់ចរាចរណ៍នៅទូទាំងខេត្ត ក៏មានការថយចុះមួយកម្រិតធំ ។ ប៉ុន្តែទោះបីលទ្ធផលនៃការអនុវត្តទទួលលទ្ធផលជាវិជ្ជមានគួរឱ្យកត់សម្គាល់យ៉ាងនេះក្តី ក៏ជនមួយចំនួននៅតែធ្វើមិនដឹងមិនឮដូចជានៅតែបន្តដឹកទំនិញសំពីងសំពោងមិនគោរពច្បាប់ហាមឃាត់ ឬផ្ទុកទំនិញហួសកំណត់ជាដើម ។
ជាក់ស្តែងដូចជារថយន្តដឹកទំនិញមួយគ្រឿងនេះ នៅតែដឹកទំនិញសំពីងសំពោងឆ្លងកាត់ប៉ុសិ៍្តចរាចរណ៍គោលដៅគ្រប់ប៉ុសិ៍្តប្រចាំការ តែពុំឃើញសមត្ថកិច្ចណែនាំ ឬហាមឃាត់ឡើយ គេឃើញតែធ្វើចរាចរណ៍ឆ្លងកាត់ខេត្តកំពតទៅខេត្តព្រះសីហនុ ឬខេត្តកោះកុងដោយរលូន ។ទោះជាយ៉ាងណា ទាក់ទិននឹងបញ្ហាខាងលើនេះ លោកណុប សារ៉េត នាយការិយាល័យចរាចរណ៍ផ្លូវគោកខេត្តបានឱ្យដឹងថា បើនៅមានតែរថយន្តផ្ទុកទំនិញសំពីងសំពោងទៀត លោកនឹងមានវិធានការទប់ស្កាត់ឱ្យខាងតែបាន ៕
ចែករំលែកព័តមាននេះ