ខេត្តស្វាយរៀង ៖ ថ្លែងជាថ្មីម្តងទៀត សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា សម្តែងក្តីបារម្ភចំពោះការកើនឡើងនៃអ្នកឆ្លងជំងឺអេដស៍ពីអ្នកស្រឡាញ់ភេ.ទដូចគ្នានៅក្នុងប្រទេសកម្ពុជា និងស្នើឲ្យមានទប់ស្កាត់ ព្រមទាំងប្រុងប្រយ័ត្ន។
ទោះបីជាយ៉ាងណា កាលពីថ្ងៃទី២៤ ខែមិថុនា ឆ្នាំ២០២៣ សម្តេចតេជោ ប្រកាសថា មិនបានហាមឃាត់ចំពោះការស្រឡាញ់ភេ.ទដូចគ្នានោះទេ តែសម្តេចថា កម្ពុជា មិនបង្កើតច្បាប់អ្នកស្រលាញ់ភេ.ទដូចគ្នាឡើយ ហើយក៏មិនហាមឃាត់ក្នុងការស្រលាញ់គ្នាដែរ។
ថ្លែងនាឱកាសអញ្ជើញជួបសំណេះសំណាលជាមួយកម្មករ កម្មការិនីនៅខេត្តស្វាយរៀង នាព្រឹកថ្ងៃទី២៥ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានឱ្យដឹងថា ជំងឺអេដស៍នៅកម្ពុជា មិនទាន់ចប់នៅឡើយ។ ផ្ទុយទៅវិញ អ្នកកើតជំងឺអេដស៍ឆ្នាំ២០២២ កើនឡើងប្រមាណ ៣០០នាក់ ធៀបនឹងឆ្នាំ២០២១ ហើយការកើនឡើងនេះ ក្នុងចំណោមអ្នកស្រឡាញ់ភេ.ទដូចគ្នា។
សម្ដេចតេជោ គូសបញ្ជាក់ថា «តើអត្រាឆ្លងនេះទាក់ទងជាមួយអ្នកណា? វាទាក់ទងជាមួយ នឹងអ្នកយកភេ.ទជាមួយគ្នា ហើយអ្នកយកភេ.ទដូចគ្នានេះ ស្រីនិងស្រី មិនចោទបញ្ហាប៉ុន្មានទេ តែរឿងបុរសនិងបុរសយកគ្នានេះ អាហ្នឹងជាប្រភពចម្លងដែលគេរកឃើញនៃការឆ្លង (ឆ្លងជំងឺអេដស៍) ដោយសារប្រទេសយើងអត់បានបង្កើតច្បាប់ណាមួយរារាំង ហើយក៏មិនបានបង្កើតច្បាប់ដើម្បីអនុញ្ញាតដែរ។ យើងមិនហាមឃាតទេ ការស្រលាញ់ភេ.ទដូចគ្នា ក៏ស្រលាញ់ទៅចុះ តែយើងមិនធ្វើច្បាប់ឱ្យទៅជារៀបអាពាហ៍ពិពាហ៍រវាងភេទដូចគ្នាទេ»។ ស្ថិតក្នុងស្ថានភាពបែបនេះ សម្ដេចនាយករដ្ឋមន្ដ្រី បានអំពាវនាវឱ្យរួមគ្នាទប់ស្កាត់ការឆ្លងមេរោគអេដស៍ និងកុំរើសអើងចំពោះអ្នកកើតមេរោគអេដស៍ ត្រូវចេះប្រើវិធីការពារ។
កាលពីថ្ងៃទី២៤ ខែមិថុនាកន្លងមក សម្ដេចតេជោបានឲ្យដឹងថា ប្រទេសកម្ពុជាជោគជ័យលើ ការគ្រប់គ្រងជំងឺគ្រុន ស្វិតដៃជើង និងកំពុងឈានទៅសម្រេចផ្តាច់ព្រ័ត្រជំងឺគ្រុនចាញ់ នៅឆ្នាំ២០២៥។ លើសពីនេះ សម្តេច ក៏អំពាវនាវឲ្យពលរដ្ឋបង្កើតការការពារកុំឲ្យកើនឡើងនូវជំងឺអេ ដស៍បន្តទៀត ព្រោះថា ពិភពលោកមិនទាន់មានប្រទេសណាមួយរកឃើញថ្នាំអេដស៍ព្យាបាល ឱ្យជាសះស្បើយនោះទេ។
សម្ដេចនាយករដ្ឋមន្ត្រីបានបន្ថែមថា អ្នកមានមេរោគអេដស៍ សូមកុំចម្លងទៅអ្នកដទៃ បង្កើតបញ្ហា លើបញ្ហា។ ជាមួយគ្នានេះ ក៏អំពាវនាវឱ្យបង្កើនការការពារខ្លួនកុំឱ្យមានមេរោគអេដស៍ ជាពិសេសអ្នកស្រលាញ់ភេ.ទដូចគ្នា ហើយបើសង្ស័យមានផ្ទុកមេរោគអេដស៍ត្រូវធ្វើតេស្តដើម្បីទទួលបានសេវាព្យាបាលភ្លាមៗផងដែរ៕
ចែករំលែកព័តមាននេះ