ខេត្តកំពង់ឆ្នាំង ៖ រថយន្តដឹកលៀសធុនធ្ងន់ចំណុះប្រមាណ30តោន ត្រូវបានសមត្ថកិច្ចចម្រុះ មានកងរាជអាវុធហត្ថ ខេត្ត សហការជាមួយនិងមន្ត្រីជំនាញធ្វើការស្ទាក់ចាប់បាន កាលពីវេលារំលងអធ្រាត្រ ឈានចូលថ្ងៃទី23 មិថុនា…
ខេត្តកំពង់ឆ្នាំង ៖ រថយន្តដឹកលៀសធុនធ្ងន់ចំណុះប្រមាណ30តោន ត្រូវបានសមត្ថកិច្ចចម្រុះ មានកងរាជអាវុធហត្ថ ខេត្ត សហការជាមួយនិងមន្ត្រីជំនាញធ្វើការស្ទាក់ចាប់បាន កាលពីវេលារំលងអធ្រាត្រ ឈានចូលថ្ងៃទី23 មិថុនា ឆ្នាំ2023 នៅតាមបណ្ដោយផ្លូវជាតិលេខ5ត្រង់ចំណុចភូមិជ្រៃបាក់ ឃុំជ្រៃបាក់ ស្រុករលាបៀរ ខណៈដែលអាជីវករដឹកលៀសយ៉ាងសម្បើមមួយនេះលោតឆត្រដឹកគ្មានច្បាប់អនុញ្ញាត ។
សមត្ថកិច្ចកងរាជអាវុធហត្តខេត្តដែលបានចូលរួមកិច្ចប្រតិបត្តិការខាងលើ បានបញ្ជាក់ឲ្យដឹងថា ក្រោយពីប្រទះឃើញរថយន្តដឹកលៀសយ៉ាងធំជារថយន្តប្រភេទកង់10 ពាក់ស្លាកលេខភ្នំពេញ3B-8100ធ្វើដំណើរឆ្លងកាត់ខេត្តកំពង់ឆ្នាំង ដែលតាមប្រភពទទួលបានលៀសខាងលើនេះ បានដឹកចេញពីមាត់កំពង់ទឹក ភូមិកំពង់ហ្លួង ក្នុងស្រុកក្រគរ ខេត្តពោធិ៍សាត់ ឆ្ពោះទៅកាន់រាជធានីភ្នំពេញ និងបន្តទៅប្រទេសវៀតណាម ទើបធ្វើការស្ទាក់ចាប់ឃាត់តែម្ដង ។
ប្រភពដដែលក៏បានបញ្ជាក់ថា ពេលដែលសមត្ថកិច្ចចាប់ម្ចាស់រថយន្តនិងម្ចាស់អាជីវករដែលដឹកលៀសគ្មានច្បាប់អនុញ្ញាតមិនព្រមសហការភ្លាមៗនោះទេ ។ រហូតដល់មានការប្រកែកគ្នាទៅវិញទៅមក ហើយមន្ត្រីជំនាញលើកហេតុផលពីច្បាប់ស្ដីពីជលផល ការដឹកជញ្ជូនផលនេសាទដែលគ្មានច្បាប់អនុញ្ញាត ជាអំពើដោយខុសច្បាប់ ទើបម្ចាស់អាជីវកម្មដឹកលាសព្រមប្រគល់ឱ្យយករថយន្តដឹកលៀស មកដោយសារទុកនៅក្នុងមន្ទីរកសិកម្មរុក្ខាប្រមាញ់និងនេសាទខេត្តកំពង់ឆ្នាំង ។
យ៉ាងនេះក្តី ប្រភពពីមន្ត្រីជលផលដែលធ្វើការងារនេះបានឲ្យដឹងថា ម្ចាស់អាជីវកម្មដឹកលៀសព្រមទទួលកំហុសនិងបង់ប្រាក់ផាកពិន័យជាទឹកប្រាក់ចំនួន12លានរៀល ហើយមន្ត្រីជំនាញបានរៀបចំធ្វើកំណត់ហេតុប្រគល់រថយន្តនិងលៀសឱ្យបន្តដំណើរទៅមុខទៀត ។
គួររំលឹកដែរថា នៅមាត់កំពង់ទឹក ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ក៏មានការដឹកជញ្ជូនលៀសជារៀងរាល់ថ្ងៃដូចគ្នានេះដែរ ប៉ុន្តែសមត្ថកិច្ច និងមន្ត្រីជំនាញមិនបានបង្ក្រាបនោះទេ ដែលលៀសទាំងនោះត្រូវបានឈ្មួញដឹកចេញជារៀងរាល់ថ្ងៃមានចំនួនជាច្រើនតោននិងច្រើនរថយន្តផងដែរ ។
ចែករំលែកព័តមាននេះ