ខេត្តត្បូងឃ្មុំ ៖ នៅលើដែនដីផ្ទៃឃុំកោះពីរ ស្រុកក្រូចឆ្មារ ដែលមានទំហំប្រមាណជាង១,០០០ហិកតា ហ៊ុមព័ទ្ធទៅដោយផ្ទៃទឹកទន្លេមេគង្គ ទាំងរដូវប្រាំង និងវស្សា ។ ប្រជាពលរដ្ឋនៅតំបន់នេះ…
ខេត្តត្បូងឃ្មុំ ៖ នៅលើដែនដីផ្ទៃឃុំកោះពីរ ស្រុកក្រូចឆ្មារ ដែលមានទំហំប្រមាណជាង១,០០០ហិកតា ហ៊ុមព័ទ្ធទៅដោយផ្ទៃទឹកទន្លេមេគង្គ ទាំងរដូវប្រាំង និងវស្សា ។ ប្រជាពលរដ្ឋនៅតំបន់នេះ បាននាំគ្នាអាស្រ័យផលដាំក្រូចថ្លុងនៅលើផ្ទៃដីប្រមាណ៣០ហិកតា ដើម្បីលក់ដូរឱ្យក្រុមឈ្មួញចុះមកទិញ ដើម្បីយកថវិកាដោះស្រាយជីវភាពគ្រួសារ។ មិនតែប៉ុណ្ណោះ ក្រូចថ្លុងនៅតំបន់នេះ មានភាពល្បីល្បាញថា មានរសជាតិផ្អែមឆ្ងាញ់ដោយអ្នកផងទាំងពួងចូលចិត្តពិសារ ។
អ៊ំស្រីឈិន អេងលាង អាយុ៦៨ឆ្នាំ រស់នៅភូមិបីពៃ បានឲ្យដឹងកាលពីព្រឹកថ្ងៃទី២៣ មិថុនា ឆ្នាំ២០២៣ ថា តាំងពីជំនាន់ជីដូនជីតារហូតមកដល់ឪពុកម្ដាយ លុះមកដល់រូបគាត់ដឹងក្តី នៅតែរក្សាមុខរបរដាំដុះក្រូចថ្លុងដដែលនៅបរិវេណក្រោយផ្ទះប្រមាណជិត១០០ដើម មានដើមតូចធំហុចផលជាបណ្ដើរៗពេលដែលក្រូចទុំត្រូវបានក្រុមឈ្មួញចុះប្រមូលទិញតាមភូមិតែម្ដង ។
អ៊ំស្រីអេង លាង មានប្រសាសន៍បន្តឲ្យដឹងទៀតថា ចំពោះក្រូចថ្លុងដែលគាត់ដាំនៅក្រោយផ្ទះមានពីប្រភេទ គឺក្រូចថ្លុងធម្មតានិងក្រូចខ្ទឹមដែលកំពុងផ្លែតូចធំបន្តបន្ទាប់គ្នា ។ តាមការកត់សម្គាល់ ក្រូចទាំងនេះត្រូវបានក្រុមឈ្មួញចុះប្រមូលទិញដឹកតាមរថយន្តយកទៅលក់នៅខេត្តព្រៃវែង និងរាជធានីភ្នំពេញ ហ្នឹងតាមតំបន់មួយចំនួនទៀត ។
មានពេលខ្លះ អ្នកភូមិរបស់គាត់បានដឹកក្រូចថ្លុងតាមជាលដាក់លើម៉ូតូជិះដើរលក់ដោយឆ្លងដ៏ទទឹងមកឃុំហាន់ជ័យ ស្រុកកំពង់សៀម ខេត្តកំពង់ចាម គឺជិះដើរលក់ពីតំបន់មួយទៅតំបន់មួយ ហើយក្រូចនៅកោះពីនេះមានរសជាតិផ្អែមឆ្ងាញ់ធ្វើឲ្យមនុស្សផងទាំងពួងចូលចិត្តហូបទៀតផង ។ ទោះបីជាគាត់ស្ថិតក្នុងវ័យចាស់បែបនេះក៏ដោយ គឺនៅតែបន្តថែរក្សាដាំដុះដំណាំក្រូចថ្លុង និងបន្តដល់កូនៗគឺមិនឱ្យបោះបង់របស់ដាំដុះទាំងនេះទេ ។ ក្នុងពេលដែលក្រូចហុចផល គាត់អាចលក់បានមួយឡូជាង៣ម៉ឺនរៀល ឬលើសនេះទៅតាមប្រភេទទំហំក្រូចតូចឬធំ ។
លោក ខូវ អ៊ មេឃុំកោះពីរមានប្រសាសន៍ដោយលើកឡើងផងដែរថា កោះនេះ មានផ្ទៃដី ១,០៧៧ហិកតា ចែកជា ៤ភូមិក្នុងនោះរួមមាន ភូមិកោះត្រែង ភូមិបីពៃ ភូមិជួរកណ្តាល និងភូមិម៉ឺននង់ មានប្រជាពលរដ្ឋរស់នៅ៦៣៧គ្រួសារ មនុស្សរាយ២,៤៥២នាក់ ។ កោះពីរនេះ មានបណ្តោយប្រវែង ៣២៥០ម៉ែត្រ និងទទឹងកោះផ្នែកដែលធំជាងគេប្រវែង ២,០១៥ម៉ែត្រ ។
កាលពីដើមឡើយ នៅលើកោះនេះ សំបូរទៅដោយដើមឫស្សីនិងដើមគរ ដែលមានភាពធុនទ្រាំទៅនឹងទឹកជន់លិចនិងការហូរច្រោះបាន ។ ក្រោយមក ក៏មានប្រជាពលរដ្ឋដាំក្រូចថ្លុង ហើយពិនិត្យឃើញថា មានការដុះលូតលាស់ល្អ ហើយផ្តល់រសជាតិផ្អែមស្រទន់ លាយជាតិជូរស្រាល ដែលទទួលបានការចាប់អារម្មណ៍ពីអ្នកបរិភោគ ទើបពេលនោះហើយ ប្រជាជនក្នុងភូមិ បាននាំគ្នាកាប់ឫស្សី រួចចាក់ដីបន្ថែម ដើម្បីដាំដំណាំក្រូចថ្លុង ។
មកដល់ឆ្នាំ២០១៩ ក្រូចថ្លុងដាំលើផ្ទៃដីប្រមាណ៣០ហិកតា ហើយមកដល់ពេលនេះ ក្រូចថ្លុង បានដាំស្ទើរពេញផ្ទៃកោះ ដោយប្រជាពលរដ្ឋបន្តកាប់ប្ញស្សីនិងគរ មកដាំក្រូចថ្លុងវិញ ។ ក្រូចថ្លុងដែលបានដាំលើកោះនេះ មាន៣ប្រភេទ គឺក្រូចថ្លុងកោះត្រែង (មានរសជាតិផ្អែម លាយជូរស្រាល) ក្រូចថ្លុងទទឹម(មានរសជាតិជូរជាងផ្អែម) និងក្រូចថ្លុងពូជពីកោះទ្រុង ខេត្តក្រចេះ ។
ក្រូចថ្លុងដែលទាក់ទាញអ្នកបរិភោគជាងគេនោះ គឺក្រូចថ្លុងកោះត្រែង ដែលរសជាតិផ្អែមលាយជូរស្រាល ទឹកច្រើន ហើយកំពិសរបស់វាទន់ល្មើយ បង្កើតនូវទឹកដមផ្អែមត្រជាក់បំពង់ក ។ រសជាតិដោយឡែកនេះហើយ ដែលមកដល់បច្ចុប្បន្ន ប្រជាពលរដ្ឋបានពង្រីកផ្ទៃដីដាំដុះរហូតដល់៩៥ហិកតា ហើយមានផ្ទៃដីកំពុងប្រមូលផលមានប្រមាណ៤១ហិកតា ។
ដូច្នេះ ហើយយើងសង្កេតឃើញលើកោះនេះ មានដំណាំចម្បងតែ៣ប្រភេទប៉ុណ្ណោះ គឺប្ញស្សី គរ និងក្រូចថ្លុង។ ក្នុងបរិវេណលំនៅឋានណាមួយ ក៏មានដើមក្រូចថ្លុងដែរ។ ចំណែកនៅរដូវប្រាំង កោះពីរ ព័ទ្ធជុំវិញទៅដោយខ្សាច់ពណ៌លឿងខ្ចី លាយជាមួយកំទេចកំទីភ្លិកភ្លេកពណ៌មាស និងប្រាក់។ ជាមួយគ្នានេះ ក៏មានដើមក្រូចថ្លុង២ដើម ដែលប្រជាជននៅលើកោះផ្តល់រហស្សនាមថា ជាដើមក្រូចថ្លុងដែលផ្តល់ផ្លែច្រើនដាច់គេ រហូតដល់៥០ឡូត៍ក្នុងមួយដើម និងមានអាយុកាលវែងជាងគេផងដែរ ។
លោកមេឃុំក៏បានអំពាវនាវដល់សាធារណៈជនទាំងអស់ អញ្ជើញមកកំសាន្តលើកោះពីរ ទាំងរដូវវស្សា និងរដូវប្រាំង ដើម្បីទស្សនានូវទិដ្ឋភាពពីរដាច់ដោយឡែក តែបានភ្លក់រសជាតិក្រូចថ្លុង ទស្សនាផ្ទះបុរាណ និងទទួលបានការគួរសមពីបងប្អូនប្រជាពលរដ្ឋលើកោះពីរ ។ ជាមួយនោះ ស្ពានបេតុងកាត់ទទឹងទន្លេប្រវែងជាង៤៥០ម៉ែត្រ ដែលចាប់ផ្ដើមស្ថាបនានៅក្នុងឆ្នាំ២០២៣នេះពីឃុំកំពង់ទ្រាស មកកោះពីរស្រុកក្រូចឆ្មារ កំពុងតែឈូសឆាយក្បាលស្ពាន។ ពេលដែលស្ពាននេះស្ថាបនាហើយក្រូចថ្លុងនៅតំបន់នេះនឹងឡើងថ្លៃ ព្រមទាំងបានជួយលើកស្ទួយដល់ជីវភាពរស់នៅរបស់ប្រជាពលរដ្ឋ ។
លោកហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំមន្ត្រីជំនាញសម្របសម្រួលរៀបចំបណ្តុំអាជីវកម្មក្រូចថ្លុង នៅឃុំកោះពីរ ស្រុកក្រូចឆ្មារ ដែលមានកសិករដាំក្រូចថ្លុង ៣៩គ្រួសារ ចូលរួមជាសមាជិក ក្រោមកម្មវិធីផ្សព្វផ្សាយបច្ចេកទេសកសិកម្មថ្មី ដែលធុនទៅនឹងការប្រែប្រួលអាកាសធាតុ នៃក្រសួងកសិកម្ម រុក្ខាប្រមាញ់ និងនេសាទ។
ចែករំលែកព័តមាននេះ