ខេត្តបន្ទាយមានជ័យ ៖ នារីម្នាក់បានមកដាក់ពាក្យបណ្ដឹងម្ចាស់ប្រាក់កម្ចីតាមអនឡាញម្នាក់ ក្រោយពីបង្ហោះរូបគាត់ជាសាធារណៈនៅលើបណ្ដាញសង្គមហ្វេសប៊ុក ដោយបរិហា.រកេរ្តិ៍ និងគំរា.មកំហែងទៀតផង កាលពីវេលាម៉ោង១៦និង៣០នាទីរសៀល នៅថ្ងៃទី២១ ខែមិថុនា ឆ្នាំ២០២៣ នៅការិយាល័យជំនាញប្រឆាំងបទល្មើសបច្ចេកវិទ្យា ពាក់ព័ន្ធករណីវិវា.ទចងការប្រាក់តាមអនឡាញ។
នារីរងគ្រោះខាងលើនេះមានឈ្មោះ ធាន សាមួន ភេទស្រី អាយុ២៣ឆ្នាំ រស់នៅភូមិផ្គាំ ឃុំផ្គាំ ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ទោ សោម សារុន នាយការិយាល័យ នគរបាលប្រឆាំងបទល្មើសបច្ចេកវិទ្យា បានឲ្យដឹងថា ៖ យោងតាមពាក្យបណ្តឹងនារីរងគ្រោះបានរៀបរាប់ថា នៅថ្ងៃទី២២ ខែមីនា ឆ្នាំ២០២៣ ខ្លួនបានកម្ចីប្រាក់តាមអនឡាញ ដែលមានឈ្មោះថា «ត្រូវការលុយបង្វិល Online» ចំនួន៥០ដុល្លារ តែខាងកម្ចីឲ្យតែ៣២ដុល្លារប៉ុណ្ណោះ ហើយក្នុងរយៈពេល១សប្តាហ៍ត្រូវសងចំនួន៥០ដុល្លារ ។ លុះដល់ថ្ងៃត្រូវសង ខ្លួនគ្មានលទ្ធភាពសងឡើយ ពេលនោះក៏ស្រាប់តែមានខាងកម្ចីអនឡាញម្នាក់ទៀតបានទូរស័ព្ទមកផ្តល់កម្ចី៥០ដុល្លារ ហើយលក្ខខណ្ឌត្រូវសងដូចកម្ចីលើកមុនដែរ។ ព្រោះតែខ្លួនគ្មានលទ្ធភាពសង ខ្លួនក៏បានកម្ចីតាមអនឡាញផ្សេងៗបន្ថែមទៀត រហូតដល់ទៅ១៤លើក សរុបប្រាក់ដើមដល់ទៅ ៣០០០ ដុល្លារឯណោះ។
យោងតាមពាក្យបណ្តឹងនារីរងគ្រោះរៀបរាប់បន្តថា រហូតដល់ថ្ងៃទី២០ ខែមិថុនា ឆ្នាំ២០២៣ ខ្លួនក៏បានទំនាក់ទំនងជួបជាមួយខាងកម្ចី ដើម្បីសុំសងតែដើមចំនួន៣០០០ដុល្លារ តែខាងកម្ចីមិនព្រមឡើយ បន្ទាប់មកខាងកម្ចីក៏យករូបភាពក្រុមគ្រួសារ បងប្អូន មិត្តភក្តិរបស់ខ្លួនមកធ្វើការបង្ហោះ រួចបរិហា.រកេរ្តិ៍ និងគំរា.មគំហែងតែម្តង។ លុះថ្ងៃទី២១ ខែមិថុនា ឆ្នាំ២០២៣ វេលាម៉ោង១២និង៣០នាទីរសៀល ខាងបងប្អូន មិត្តភក្តិ ក៏ឲ្យខ្លួនទាក់ទងទៅសារព័ត៌មាន «អាបងស្អាត» ដើម្បីឡាយក្នុងហ្វេសប៊ុក ធ្វើការបកស្រាយអំពីកម្ចីតាមអនឡាញថា មិនជាប់ពាក់ព័ន្ធជាមួយនឹងបងប្អូន និងមិត្តភក្តិទេ គឺខ្លួនធ្វើការកម្ចីតែម្នាក់ឯងតែប៉ុណ្ណោះ គឺមិនបានយកឈ្មោះបងប្អូន និងមិត្តភក្តិមកធានានោះឡើយ។
លោកនាយការិយាល័យ បានបញ្ជាក់ទៀតថា ដោយអនុវត្តន៍យ៉ាងម៉ឺងម៉ាត់តាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ លោកក៏បានដឹកនាំកម្លាំងការិយាល័យជំនាញប្រឆាំងបទល្មើសបច្ចេកវិទ្យា បើកការស្រាវជ្រាវដោយយកចិត្តទុកដាក់ជុំវិញករណីបរិហា.រកេរិ៍ជាសាធារណៈ និងគំរា.មគំហែងខាងលើនេះ ដើម្បីយកមកចាត់ការតាមនីតិវិធីនៃច្បាប់៕
ចែករំលែកព័តមាននេះ