ចាប់ម៉ូតូគ្មានពន្ធដែលពលរដ្ឋប្រើប្រាស់ចំនួន១៣គ្រឿងផ្អើលនៅក្រុងប៉ោយប៉ែត(វីដេអូ)
- បន្ទាយមានជ័យ
មន្ត្រីគយ និងរដ្ឋាករបានចាប់ម៉ូតូគ្មានពន្ធនាំចូលដែលប្រជាពលរដ្ឋប្រើប្រាស់បានចំនួន១៣គ្រឿង
ខេត្តបន្ទាយមានជ័យ ៖ មន្ត្រីគយ និងរដ្ឋាករបានចាប់ម៉ូតូគ្មានពន្ធនាំចូលដែលប្រជាពលរដ្ឋប្រើប្រាស់បានចំនួន១៣គ្រឿង នៅថ្ងៃទី២១ ខែមិថុនា ឆ្នាំ២០២៣ តាមផ្លូវមុខភោជនីយដ្ឋានប៊ូសោភ័ណ ស្ថិតភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ។
មន្ត្រីគយ និងរដ្ឋាករផ្នែកស្រាវជ្រាវបង្ការ និងបង្ក្រាបបទល្មើសសាខាខេត្តបន្ទាយមានជ័យ បានប្រាប់ថា តាមការណែនាំពីអគ្គនាយកដ្ឋានគយ និងរដ្ឋាករកម្ពុជា ហើយមន្ត្រីគយ និងរដ្ឋាករសាខាខេត្តបន្ទាយមានជ័យប្រចាំផ្លូវ៥០ ក្រុងប៉ោយប៉ែត បានដាក់ចល័តឆែកចាប់ម៉ូតូបានចំនួន១៣គ្រឿង ក្នុងមានប្រភេទម៉ូតូម៉ាក ៖ ភីស៊ីអ៊ិច ស៊ូម័រអ៊ិច ឃ្លិច ស្គូពី ជាម៉ូតូដែលប្រជាពលរដ្ឋកំពុងប្រើប្រាស់គ្មានពន្ធ ។
មន្ត្រីគយ និងរដ្ឋាករបានបញ្ជាក់ថា ក្រោយចាប់បានម៉ូតូទាំង១៣គ្រឿងបានដឹកទៅរក្សាទុកនៅស្នាក់ការគយ និងរដ្ឋាករផ្លូវ៥០ ក្រុងប៉ោយប៉ែត ដើម្បីឱ្យម្ចាស់ជាអ្នកប្រើប្រាស់យកឯកសារមកបញ្ជាក់ បើគ្មានពន្ធត្រូវបង់ពន្ធជូនរដ្ឋ ។
មន្ត្រីគយ និងរដ្ឋាករថា នឹងបន្តអនុវត្តជាប្រចាំស្រាវជ្រាវបង្ការ និងបង្ក្រាបបទល្មើសគេចពន្ធ រហូតអ្នកប្រើប្រាស់ភ្ញាក់រលឹកងាកមកប្រើប្រាស់យានយន្តត្រឹមត្រូវ ដែលជាការរកចំណូលរដ្ឋផងដែរ ។
ប្រជាពលរដ្ឋបានលើកឡើងថា មន្ត្រីជំនាញដែលចាប់ម៉ូតូគ្មានពន្ធជាតួនាទីភារកិច្ចមន្ត្រីជំនាញដែលត្រូវប្រមូលពន្ធជូនរដ្ឋ តែម៉ូតូដែលមន្ត្រីជំនាញចាប់ គឺជាម៉ូតូដែលទិញពីស្តង់លក់ម៉ូតូនៅក្រុងប៉ោយប៉ែត មិនបានទៅទិញម៉ូតូនៅតាមបន្ទាត់ព្រំដែនដោយខុសច្បាប់នោះទេ ។ ទោះបីជាបែបណាក៏នៅតែមានកំហុសដែរ ព្រោះម៉ូតូអត់ពន្ធដែលគេលួចលាក់លក់ ។
ប្រជាពលរដ្ឋខ្លះថា ដោយសារគ្មានលុយទិញម៉ូតូមានពន្ធក្នុងតម្លៃថ្លៃ ទើបសុខចិត្តទិញម៉ូតូគ្មានពន្ធដែលមានតម្លៃថោកតាមលទ្ធភាពទិញបានប្រើប្រាស់ ដូច្នេះសុំឱ្យមន្ត្រីគយ ត្រូវទប់ស្កាត់ម៉ូតូនាំចូលពីប្រទេសជិតខាង និងបង្ក្រាបម៉ូតូគ្មានពន្ធតាមស្តង់លក់ម៉ូតូក្នុងខេត្តបន្ទាយមានជ័យ និងក្រុងប៉ោយប៉ែតនោះ ទើបសមហេតុសមផលជាង មិនត្រូវចាប់ម៉ូតូដែលគេកំពុងជិះបែបនេះទេ ។
ចែករំលែកព័តមាននេះ