តារាសម្តែង និងពិធីការិនីនាង ណា សាឌី បានទម្លាយនូវរឿងរ៉ាវដែលនឹកស្មានមិនដល់មួយ ដោយនាងបានបាត់ចិញ្ជៀនដែលខ្លួនស្រឡាញ់បំផុត និងមានតម្លៃប្រមាណជាង២ម៉ឺនដុល្លារ ព្រោះតែមនុស្សជំនិត និងនៅក្បែរនាងរាល់ថ្ងៃ
រាជធានីភ្នំពេញ ៖ តារាសម្តែង និងពិធីការិនីនាង ណា សាឌី បានទម្លាយនូវរឿងរ៉ាវដែលនឹកស្មានមិនដល់មួយ ដោយនាងបានបាត់ចិញ្ជៀនដែលខ្លួនស្រឡាញ់បំផុត និងមានតម្លៃប្រមាណជាង២ម៉ឺនដុល្លារ ព្រោះតែមនុស្សជំនិត និងនៅក្បែរនាងរាល់ថ្ងៃ។
តាមរយៈសំណេរដ៏វែងមួយបង្ហោះតាមបណ្តាញសង្គម ស្រីស្អាត ណា សាឌី បានលើកឡើងនូវរឿងរ៉ាវមួយនេះថា « មិនគួរណាកើតរឿងនេះមកលើខ្ញុំទេ ញើសឈា.មខ្ញុំដែលមិនបានសម្រាក ខិតខំធ្វើការត្រុកៗរាល់ថ្ងៃ មិនដែលស្គាល់ពាក្យថាទំនេរនឹងគេនោះទេ។ ខ្ញុំខំណាស់ព្រោះខ្ញុំមានឱកាស ខ្ញុំត្រូវតែស៊ូ ដើម្បីគ្រួសារ ខ្លួនឯង និងទិញអ្វីដែលខ្ញុំចង់បាន»។
នាងបានបញ្ជាក់ថា «ថ្ងៃទី១ ខែ៦ ខ្ញុំបានសន្សំលុយទិញរបស់ដែលខ្ញុំស្រលាញ់ តម្លៃរបស់វាជាង 2xxxx$ ខ្ញុំខំសន្សំ ព្រោះវាជាការលើកទឹកចិត្តដែលខ្ញុំខិតខំធ្វើការគ្មានថ្ងៃសម្រាក ព្រឹកចេញទៅធ្វើការ យប់ជ្រៅត្រឡប់មកផ្ទះវិញ។ ប៉ុន្តែរឿងអាក្រក់ដ៏ធំមួយក៏បានកើតឡើងលើរូបនាងខ្ញុំ»។
នាងបន្តថា «នៅថ្ងៃទី3.06.2023 ខ្ញុំបានពាក់ចិញ្ចៀនរបស់ខ្ញុំលើកទី១ ទៅធ្វើការ event អោយគេ ហើយពេលចប់ក៏ត្រឡប់មកផ្ទះវិញធម្មតា។ មុនពេលចូលគេង ខ្ញុំក៏បានរៀបចំដាក់ចិញ្ចៀនរបស់ខ្ញុំចូលក្នុងប្រអប់ធម្មតា។ ថ្ងៃទី05.6.2023 ខ្ញុំបានប្រាប់ប្អូនស្រីដែលគាត់ជាអ្នកមើលថែខ្ញុំផ្ទាល់ រៀបចំគ្រប់យ៉ាងអោយខ្ញុំ បោសបន្ទប់ រៀបសម្លៀកបំពាក់ទៅថត និងទុកដាក់គ្រឿងអលង្ការអោយខ្ញុំផ្ទាល់ គាត់ជាមនុស្សម្នាក់ដែលខ្ញុំទុកចិត្តបំផុត ហើយក៏ផ្តល់សិទ្ធិអោយគាត់ចេញចូលបន្ទប់ខ្ញុំដោយសេរី ក៏ព្រោះតែពាក្យថា ស្រលាញ់ ទុកចិត្ត និងផ្តល់តម្លៃអោយគាត់»។
នាងបន្ថែមថា «បន្ទប់គេងខ្ញុំមិនបានចាក់សោរ ហើយខ្ញុំក៏គ្មានទូដែកដែរ ព្រោះខ្ញុំទុកចិត្តអ្នកនៅក្នុងផ្ទះ និង assistant របស់ខ្ញុំណាស់ ហើយក៏មិនដែលបាត់របស់ធំដុំដែរ (អត្តចរិតគាត់ ស្លូត មិនចេះមាត់.ក សុភាពរាបសា ហើយឧស្សាហ៍ណាស់)»។
ស្រីស្អាត ណា សាឌី បានលើកឡើងបន្តថា «ថ្ងៃកើតហេតុ ទី 06.6.2023 ខ្ញុំបានឆាតឲ្យគាត់ចូលសម្អាតបន្ទប់ខ្ញុំផង ហើយស្របពេលដែលម៉ាក់ខ្ញុំមិននៅផ្ទះ, ខ្ញុំក៏បានចេញក្រៅតាំងពីព្រឹក មានតែជីដូនខ្ញុំនៅផ្ទះជាមួយគាត់ ខ្ញុំផ្តាំគាត់ថា មើលម៉ាក់យាយផង ព្រោះគាត់ទើបតែឈឺធ្ងន់ និងវះកាត់ពោះវៀនកាលពីឆ្នាំមុន ហើយគាត់អាយុច្រើនហើយ។ នៅថ្ងៃទី10.06.2023 ម៉ាក់ឆាតមកខ្ញុំទាំងយប់ថា ខ្ញុំមានពាក់ចិញ្ចៀនទៅក្រៅអត់? ខ្ញុំភ្ញាក់មែនទែន ព្រោះខ្ញុំមិនបានឆែកមើល និងប៉ះចិញ្ចៀនតាំងពីថ្ងៃទី 03.6.2023 មកម្ល៉េះ»។
នាងបន្តថា «ខ្ញុំភ័យណាស់ ក៏ប្រញាប់បើកឡានទៅផ្ទះ ដោយមានគាត់នៅជាមួយខ្ញុំដែរ។ នៅតាមផ្លូវខ្ញុំសួរគាត់រហូត អូនមានឃើញរបស់ចែទេ? ខ្ញុំសួរគាត់ច្រើនលើកច្រើនសារណាស់ តែគាត់ឆ្លើយថា មិនបានឃើញ មិនដឹងទេ។ ខ្ញុំមកដល់ផ្ទះភ្លាម ក៏បានរកមើលគ្រប់កន្លែងនៃផ្ទះរបស់ខ្ញុំ ទាំងប៉ា ម៉ាក់ ខ្ញុំ ហើយគាត់ក៏ជួយរកនៅតែមិនឃើញសោះ។ ខ្ញុំក៏ចាប់ផ្តើមសង្ស័យគាត់ ព្រោះមានតែគាត់ម្នាក់គត់ដែលមើលថែគ្រប់យ៉ាងដែលជារបស់ខ្ញុំ។ ខ្ញុំបានសួរគាត់ទាំងយំថា អូន បើអូនឯងយកអោយបងវិញមក បងអត់ខឹងប្រកាន់ទេ បងសុំតែរបស់បងមកវិញទេ វាថ្លៃណាស់សម្រាប់បង បងខំសន្សំលុយដើម្បីធ្វើវាទំរាំបាន ប៉ុន្តែចម្លើយនៅតែដដែល មិនដឹងទេចែ»។
នាងបញ្ជាក់ថា «ខ្ញុំព្យាយាមគ្រប់វិធីអស់ហើយ ខ្ញុំរកពេញផ្ទះ ឆែកគ្រប់សព្វ គ្រប់កន្លែង ហើយខ្ញុំក៏បានប្រាប់គាត់ថា បើរកចិញ្ចៀនឃើញ បងអោយអូន 1000$ ព្រោះបងនឹងលក់វាចេញវិញមិនទុកទេ ហើយបើអូនចង់ចេញពីទីនេះ ប្អូនចេញចុះបងជូនទៅផ្ទះវិញ គាត់បានឆ្លើយថាចា៎»។
បើតាមស្រីស្អាត ណា សាឌី ថា «ហេតុផលដែលខ្ញុំនិយាយថាគាត់ចង់ចេញ គឺខ្ញុំបានចាប់ឆែកទូរស័ព្ទគាត់តាំងពីថ្ងៃខ្ញុំបាត់ចិញ្ចៀនម្ល៉េះ គឺខ្ញុំចង់គាំងបេះដូង គាត់បានឆាតទៅមិត្តភកិ្ត បងប្អូនគាត់ និងអ្នកដែលគាត់ចង់ទៅនៅជាមួយថ្មី គាត់និយាយថា ចង់ចេញពីផ្ទះខ្ញុំហើយ ប៉ុន្តែដល់ខែ7 បានចេញ ពីព្រោះគាត់នៅជំពាក់លុយម៉ាក់ខ្ញុំមិនទាន់អស់ (ខ្ញុំអោយគាត់ខ្ចីលុយ ដើម្បីធ្វើផ្ទះឲ្យម្តាយនៅស្រុក) ហើយឆាតខ្លះគាត់បានលួចជេរខ្ញុំពីក្រោយខ្នងទៀត ព្រោះគាត់ខឹងខ្ញុំស្តីបន្ទោស»។
នាងថា «រឿងជេរខ្ញុំនឹងមិនមែនលឺតែតាមឆាតទេ នៅផ្ទះក៏ម៉ាក់យាយខ្ញុំលឺដែរ ប៉ុន្តែគាត់អត់មាត់ ព្រោះគិតថាវាក្មេង ហើយមិនចង់បង្ករឿងក្នុងផ្ទះ។ អ្នកផ្ទះខ្ញុំអស់សង្ឃឹមក្នុងការរកចិញ្ចៀន ហើយពួកយើងក៏ដឹងថា ប្អូនខ្ញុំយក ប៉ុន្តែមិនដឹងយកទៅណា អោយអ្នកណា ឬលក់នៅកន្លែងណា។ បងប្អូនដែលកំពុងអានអើយ បន្ទាប់ពីថ្ងៃបាត់របស់ខ្ញុំមក ខ្ញុំហាមឃាត់មិនអោយគាត់ចេញទៅណាទេ ព្រោះគាត់គឺជាជនសង្ស័យហើយ ខ្ញុំទុកគាត់នៅផ្ទះសិន។ សួរនាំយ៉ាងណាក៏មិនឆ្លើយ ខ្ញុំយំនៅមុខគាត់ ម្តាយខ្ញុំអង្វរផង ខ្ញុំអង្វរផង នៅតែគ្មានចម្លើយ»។
នាងបន្តទៀតថា រហូតដល់ថ្ងៃទី18.06.2023 គាត់បានសារភាពថា គាត់បានយកចិញ្ចៀនហ្នឹងមែន ប៉ុន្តែគាត់មិនបានយកទៅណាទេ គាត់មិនបានលក់ ឬអោយមិត្តភកិ្តណាម្នាក់ទេ គឺគាត់បានយកវាទៅបោះចោលក្នុងធុងសំរាមតាំងពីថ្ងៃទី06.06.2023 មកម្ល៉េះ គឺពេលដែលគាត់មកសម្អាតបន្ទប់ខ្ញុំតែម្តង ហើយនៅក្នុងថ្ងៃនោះដែរ គាត់បានឆែកឆេរកាបូបខ្ញុំ មួកខ្ញុំយកពាក់លេង ថតពេញហ្នឹង ធ្វើដូចជាគ្រប់យ៉ាងជារបស់គាត់»។
នាងបន្តថា «ខ្ញុំសឹងតែគាំងបេះដូង ខ្ញុំញ័រមាត់ ធ្វើអីលែងចេញ ម្នាក់ៗលឺហើយហួសចិត្តណាស់។ ក្មេងស្រីអាយុ១៦ឆ្នាំ ហ៊ានបំផ្លាញខ្ញុំ ព្រោះដឹងថា ខ្ញុំស្រលាញ់របស់ហ្នឹងខ្លាំង។ ខ្ញុំបានសួរសំណួរគាត់ ២សំណួរគត់ ព្រោះខ្ញុំគាំងហើយ។ សំណួរទី១ ៖ ហេតុអីអូនឯងធ្វើចឹងដាក់បង? ចម្លើយ ៖ ខ្ញុំគុំជាមួយចែឯង ខ្ញុំខឹងចែថាអោយខ្ញុំ ខ្ញុំស្អប់ចែ ខ្ញុំចង់ឃើញចែពិបាកចិត្ត។ សំណួរទី២ ៖ គ្រឿងអលង្ការ បងផ្សេងៗក៏មាន ហេតុអីអូនរើសយកចិញ្ចៀនថ្មីហ្នឹង? បងពាក់បានតែម្តងគត់? ចម្លើយ ៖ ខ្ញុំដឹងថា របស់ហ្នឹងថ្លៃជាងគេ ណាមួយវាតូច ចឹងខ្ញុំស្រួលបោះចោល ខ្ញុំមិនចង់អោយបងមានរបស់ដែលបងស្រលាញ់ ខ្ញុំចង់អោយបងពិបាក ព្រោះខ្ញុំដឹងថា វាសំខាន់ណាស់សម្រាប់បង»។
នាងបញ្ជាក់ថា «គ្រប់ពាក្យពេចន៍ដែលគាត់និយាយមក ខ្ញុំសឹងតែដួលលើដី ដោយសាការគុំកួនគាត់ហ៊ានធ្វើបែបនេះ។ គាត់មកនៅជាមួយខ្ញុំ ៦ឆ្នាំហើយ តាំងពីគាត់នៅក្មេង គាត់ដើរជាមួយខ្ញុំយូរហើយ។ ពេលទៅណាមកណីខ្ញុំមិនដែលប្រាប់គេថា គាត់អ្នកនៅជាមួយខ្ញុំ ឬអ្នកដទៃទេ ខ្ញុំប្រាប់គេថា គាត់ប្អូនខ្ញុំ។ ខ្ញុំមិនបានកុហកទេ អ្នកដែលស្គាល់ខ្ញុំគាត់ដឹងហើយ។ ខ្ញុំហូបអី គាត់ហូបហ្នឹង។ គេងនៅលើពូក ក៏គាត់គេងក្បែរខ្ញុំ និយាយរួមមិត្តភកិត្តខ្ញុំ អ្នកដែលស្គាល់ខ្ញុំទាំងអស់ គឺស្រលាញ់គាត់ និងទុកគាត់ដូចប្អូនទាំងអស់។ ខ្ញុំមិនដែលវ៉ៃគាត់មួយដៃទេ តែបើស្តីបន្ទោសខ្ញុំថាអោយគាត់ ព្រោះគាត់ធ្វើខុស បាត់របស់ខ្ញុំ ឬភ្លេចច្រើន ប៉ុន្តែខ្ញុំមិនដែលខឹងយូរទេ ខ្ញុំលួងវិញហើយ ហៅប្អូនៗពេញៗមាត់ ហើយអោយលុយគាត់ចាយមិនដែលខាតទេ»។
នាងបញ្ជាក់បន្តថា «គ្រួសារខ្ញុំស្រលាញ់គាត់ណាស់ មិនដែលទុកគាត់ជាអ្នកក្រៅទេ។ ហេតុអីប្អូនឈា.មត្រជាក់ម្ល៉េស? គាត់ប្រាប់ថា គាត់ធ្វើរឿងហ្នឹងហើយ គាត់បានត្រៀមចិត្តទទួលគ្រប់យ៉ាង។ គាត់ដឹងគ្រប់យ៉ាងពីខ្ញុំថា ពេលនេះខ្ញុំកំពុងមានបញ្ហាច្រើន គេជំពាក់លុយផង ការងារក៏មិនសូវមាន ម៉ាក់ទើបវះ ហើយថ្មីៗនេះ ខ្ញុំតែម្នាក់ឯងរ៉ាប់រងគ្រប់យ៉ាងក្នុងផ្ទះ ព្រោះពាក្យថា បង្គោលគ្រួសារ និងទំនួលខុសត្រូវ។ គាត់បានសំពះសុំទោសខ្ញុំនៅថ្ងៃចុងក្រោយដែលខ្ញុំដឹងចម្លើយ ខ្ញុំថាហួសពេលហើយអូន បងទុកពេលអោយអូនឯងសារភាព ហើយហេតុអីមិននិយាយ? ហេតុអីមិនគិតវែងឆ្ងាយជាងនេះ? ហេតុអីចង់បំផ្លាញបងដល់ថ្នាក់នេះ? អ្វីៗមិនអាចបកក្រោយបានទេ មានតែទៅមុខទេ»។
នាងបន្ថែមថា «នេះជាមេរៀនសម្រាប់អ្នកគ្រប់គ្នាដែលមានមនុស្សជំនិត និងអ្នកដើរតាម សូមកុំទុកចិត្តអ្នកណាអោយសោះក្រៅពីខ្លួនឯង។ កុំស្រលាញ់ ទុកចិត្ត អ្នកណាខ្លាំងពេក ព្រោះពេលខ្លះគេមិនបានស្រលាញ់យើង ដូចយើងស្រលាញ់គេនោះទេ មិនថានៅជាមួយគ្នាយូរឆ្នាំក៏ដោយ។ ខ្ញុំឈឺចិត្តណាស់ ព្រោះបានបាត់របស់ដែលខ្ញុំស្រលាញ់ ប៉ុន្តែខ្ញុំរឹតតែឈឺខ្លាំង ព្រោះមនុស្សក្បែរខ្លួនក្បត់ខ្ញុំ ធ្វើអោយផ្លូវចិត្តខ្ញុំមិនស្រួលទេ ខ្ញុំមានជំងឺផ្លូវចិត្តទៀត។ ពេលនេះ ប្អូនសាងអី ប្អូនទទួលបានហើយ។ បងសុំអហោសិកម្មអោយប្អូនដូចគ្នា។ បើសិនជាចិញ្ចៀនបាត់មែន ឬនៅលើដៃអ្នកណាគេម្នាក់ សង្ឃឹមថានឹងបានជួយសម្រួលទុក្ខលំបាកដល់អ្នកចុះ បើអ្នកនៅទុកពាក់ សូមជួយថែរក្សាជំនួសខ្ញុំផងចុះ ព្រោះវាទៅបាត់ហើយ គេមិនចង់នៅជាមួយខ្ញុំទេ»៕
ចែករំលែកព័តមាននេះ