រាជធានីភ្នំពេញ ៖ តារាពហុជំនាញ អ្នកនាង ខាត់ សុឃីម បានធ្វើការអំពាវឲ្យយុវជនជំនាន់ក្រោយ ចូលរួមថែរក្សាលើកស្ទួយ ឬក៏សិក្សារៀនសូត្រ ដើម្បីបន្តវេននូវទម្រង់សិល្បៈចម្រៀងអាយ៉ៃឆ្លើយឆ្លង…
រាជធានីភ្នំពេញ ៖ តារាពហុជំនាញ អ្នកនាង ខាត់ សុឃីម បានធ្វើការអំពាវឲ្យយុវជនជំនាន់ក្រោយ ចូលរួមថែរក្សាលើកស្ទួយ ឬក៏សិក្សារៀនសូត្រ ដើម្បីបន្តវេននូវទម្រង់សិល្បៈចម្រៀងអាយ៉ៃឆ្លើយឆ្លង ដើម្បីឲ្យមានការរីកចម្រើនទៅមុខបន្ថែមទៀត និងកុំឲ្យមានការបាត់បង់ ។
ការលើកឡើងពីតារាស្រីរូបនេះបានធ្វើឡើងឡើង បន្ទាប់ពីនាងមានឱកាសចាប់ដៃគូសម្តែងអាយ៉ៃឆ្លើយឆ្លងជាមួយលោក ដួង សុខគា នៅលើឆាកភូមិវប្បធម៌នៃកម្មវិធីនគរសង្ក្រាន្ត អបអរថ្ងៃបុណ្យចូលឆ្នាំប្រពៃណីជាតិខ្មែរ កាលពីពេលថ្មីៗនេះ។
ជាមួយនឹងការសម្តែងអាយ៉ៃឆ្លើយឆ្លង ហើយទទួលបានការគាំទ្រយ៉ាងច្រើនពីសំណាក់ប្រិយមិត្តទស្សនានោះ អ្នកនាង ខាត់ សុឃីម បានសម្តែងក្តីរំភើប និងអរគុណទៅកាន់មហាជន ខណៈពេលដែលអ្នកនាងក៏បង្ហាញនូវមោទនភាពចំពោះខ្លួនឯងផងដែរដែលអាចបម្រើអារម្មណ៍បងប្អូនក្នុងទម្រង់សិល្បៈមួយនេះ ។
ទន្ទឹមគ្នានេះដែរ អ្នកនាងក៏បានធ្វើការអំពាវនាវទៅដល់យុវជនជំនាន់ក្រោយឲ្យចូលរួមគាំទ្រ និងថែរក្សា ឬក៏អាចសិក្សាក្លាយជាអ្នកបន្តវេនទៅលើទម្រង់សិល្បៈអាយ៉ៃនេះ ដើម្បីឲ្យមានការរីកចម្រើន និងកុំឲ្យមានការបាត់បង់ ។
តាមរយៈសំណេរបង្ហោះលើបណ្តាញសង្គម តារាពហុជំនាញអ្នកនាង ខាត់ សុឃីម បានលើកឡើងថា អរគុណសំរាប់ការគាំទ្រ ការច្រៀងអាយ៉ៃ ឆ្លើយឆ្លង កាលពីម្សិលមិញ នាងខ្ញុំពិតជាមាន សេចក្តីរំភើបក្រៃលែង ដែលបានបំរើអារម្មណ៍បងប្អូនក្នុងទំរង់មួយនេះ ជឿជាក់ថា កូនក្មួយនឹងជួយថែក្សា រឺក៏បន្តវេន អោយទំរង់អាយ៉ៃមួយនេះ ការតែរីកចម្រើន ទៅមុខទៀត ។
ជាការកត់សម្គាល់ បើនិយាយពីទម្រង់សិល្បៈចម្រៀងអាយ៉ៃនេះ គេតែងតែនឹកដល់លោក ព្រហ្ម ម៉ាញ និងអ្នកស្រី នួន សារី ហៅយាយយយ ដែលជាសិល្បៈករជើងចាស់ដ៏ល្បីល្បាញនៅក្នុងអាជីពសិល្បៈមួយនេះ ខណៈពេលដែលអ្នកទាំងពីរក៏ជាដៃគូដ៏ស័ក្តិសមបំផុតនៅក្នុងការសម្តែងរួមគ្នា ហើយផ្តល់សំណើច សម្រាប់ទស្សនិកជនទស្សនាផងដែរ ។
កន្លងមក នៅមុនពេលដែលលោកព្រហ្ម ម៉ាញ មិនទាន់ធ្លាក់ខ្លួនជរានោះ លោកក៏ធ្លាប់បើកបង្រៀនផ្នែកអាយ៉ៃនេះ ដោយមិនយកប្រាក់ផងដែរ ក្នុងពេលដែលថ្នាក់រៀនរបស់ខ្លួនក៏មានសិស្សចូលរៀនជាបន្តបន្ទាប់ផងដែរ ។
ការសម្រេចបើកបង្រៀនអាយ៉ៃពីលោក ព្រហ្ម ម៉ាញ នាពេលនេះ ត្រូវបានលោកគូសបញ្ជាក់ថា លោកមានគោលបំណងចង់បណ្ដុះឲ្យកូនខ្មែរជំនាន់ក្រោយមានទឹកចិត្តស្រឡាញ់ ក៏ដូចជាចូលរួមថែរក្សាឲ្យគង់វង្ស និងលើកស្ទួយសិល្បៈដ៏ចំណាស់មួយនេះរបស់ខ្មែរ និងឲ្យមានការរីកចម្រើន ជាពិសេស សិល្បៈអាយ៉ៃ ដែលមិនសូវមានអ្នកចេះច្រើននោះឡើយ ។
លោកបញ្ជាក់ថា លោកនឹងខិតខំផ្ទេរចំណេះដឹងដែលលោកមានលើសិល្បៈអាយ៉ៃនេះដល់អ្នកជំនាន់ក្រោយឲ្យបានចេះចាំ ដើម្បីបន្សល់ទុកជាស្នាដៃ និងអភរិក្សសិល្បៈមួយនេះឲ្យបានស្ថិតស្ថិរគង់វង្សជាច្រើនឆ្នាំបន្តទៀត មុនពេលដែលលោកលាចាកលោកនេះទៅ ៕
ចែករំលែកព័តមាននេះ