ខេត្តតាកែវ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងប្រកាសថា ការនាំចេញ-នាំចូលរបស់ប្រទេសកម្ពុជានាពេលបច្ចុប្បន្ន បានកើនឡើងដល់៥២ពាន់លានដុល្លារផងដែរ។ ការលើកឡើងរបស់សម្តេចតេជោ ក្នុងពិធីសំណេះសំណាលជាមួយកម្មករ កម្មការិនីសរុបជិត២ម៉ឺននាក់មកពីរោងចក្រ សហគ្រាសចំនួន១២ ក្នុងស្រុកត្រាំកក់ ខេត្តតាកែវ ដែលពិធីនេះធ្វើឡើងនៅរោងចក្រ គ័នថេក ខេមបូឌា អ៊ិនធើណេសិនណល (KUANTECH CAMBODIA INTERNATIONAL) នាព្រឹកថ្ងៃទី១១ ខែមិថុនា ឆ្នាំ២០២៣។
នៅចំពោះកម្មករ សម្ដេចតេជោ ហ៊ុន សែន បានឲ្យដឹងថា ឆ្នាំនេះ សេដ្ឋកិច្ចកម្ពុជា ព្យាករថា នឹងសម្រេចក្នុងកំណើនរង្វង់៥.៦% ទោះបីកំពុងហ៊ុមព័ទ្ធដោយភាពមិនប្រាកដប្រជា និងបញ្ហាប្រឈមមួយចំនួនក៏ដោយ។ សម្ដេចតេជោ បន្ដថា ការកើនឡើង នៃទំហំពាណិជ្ជកម្មរបស់កម្ពុជា គឺបានបង្ហាញពីអនុវត្តន៍ត្រឹមត្រូវនៃគោលនយោបាយពាណិជ្ជកម្ម។
សម្ដេចតេជោនាយករដ្ឋមន្ត្រី បានគូសបញ្ជាក់ថា «ទំហំនាំចេញ កាលពីឆ្នាំ១៩៩៧ តែជាង ២០០លានដុល្លារទេ។ ឥឡូវទំហំនាំចេញផ្នែកវិស័យកាត់ដេរ គឺមានរហូតដល់ ១៣ពាន់លានដុល្លារ ហើយសរុបទាំងអស់ នៃទំហំការនាំចេញពីកម្ពុជា ចេញទៅប្រទេសក្រៅ ឆ្នាំកន្លងទៅ យើងនាំចេញទៅដល់២៩ពាន់លានដុល្លារ ហើយបើគិតពីការនាំចេញ នាំចូល សរុបយើង ៥២ពាន់លានដុល្លារ»។
ជាមួយគ្នានោះដែរ សម្ដេចតេជោ បន្ដថា ជាក់ស្ដែង កម្មករ-កម្មការិនី ទទួលផលនេះ មិនមែនបានមកពីក្រុមប្រឆាំងណាមួយនោះទេ គឺបានមកពីការដឹកនាំរបស់គណបក្សប្រជាជនកម្ពុជា និងរាជរដ្ឋាភិបាល ពួកប្រឆាំង បានត្រឹមប្រាប់ពួកបរទេសថា «កុំមកវិនិយោគនៅកម្ពុជា កុំទិញទំនិញពីកម្ពុជា និងដាក់ទណ្ឌកម្មលើកកម្ពុជា» ដូច្នេះនៅកម្ពុជា ត្រូវកម្ចាត់ចោលភាពជ្រុលនិយម ដែលមកបំផ្លាញជាតិសាសន៍ខ្លួនឯង។
លើសពីនេះ សម្ដេចនាយករដ្ឋមន្ដ្រី ក៏បានអំពាវនាវកម្មករ កម្មការិនីឱ្យរួមគ្នាថែរក្សាសុខសន្តិភាព ព្រោះបើគ្មានសុខសន្តិភាពអ្វីៗនឹងត្រូវបំផ្លាញ។ សម្តេចក៏បានអំពាវនាវដល់កម្មករទាំងអស់ សូមអញ្ជើញទៅបោះឆ្នោតជ្រើសតាំងអ្នកតំណាងរាស្ត្រអាណត្តិទី៧ នៅថ្ងៃទី២៣ ខែកក្កដា ឆ្នាំ២០២៣ ឲ្យបានគ្រប់គ្នា៕
ចែករំលែកព័តមាននេះ