នារីជនជាតិវៀតណាមម្នាក់រស់នៅក្នុងទីក្រុងហាយហ្វុង (Hai Phong) ប្រទេសវៀតណាមខាងជើង បានដាច់ខ្យល់ស្លាប់នៅក្នុងឡានកាំម្រីស៊េរីចាស់១គ្រឿង។ ក្រៅពីនេះ, ប្អូនប្រុសជនរងគ្រោះ រួមជាមួយលោកប៉ា ក៏មានបញ្ហាសុខភាពផងដែរ។ អ្នកទាំង៣ត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ។…
នារីជនជាតិវៀតណាមម្នាក់រស់នៅក្នុងទីក្រុងហាយហ្វុង (Hai Phong) ប្រទេសវៀតណាមខាងជើង បានដាច់ខ្យល់ស្លាប់នៅក្នុងឡានកាំម្រីស៊េរីចាស់១គ្រឿង។ ក្រៅពីនេះ, ប្អូនប្រុសជនរងគ្រោះ រួមជាមួយលោកប៉ា ក៏មានបញ្ហាសុខភាពផងដែរ។
អ្នកទាំង៣ត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ។ សាក្សីនិយាយថាអ្នកទាំងបីបានទៅគេងនៅក្នុងឡានកាំម្រីខាងលើនេះបន្ទាប់ពីផ្ទះរបស់ពួកគេដាច់ភ្លើងកាលពីយប់ថ្ងៃព្រសហ្បតិ៍។ ដូច្នេះ អាកាសធាតុនៅក្នុងផ្ទះពោរពេញដោយសភាពក្ដៅហួតហែងខ្លាំងពេក។ គេងនៅក្នុងឡានក៏មិនងាយស្រួលប៉ុន្មានទេ។ ប៉ុន្តែយ៉ាងហោចណាស់ពួកគេរំពឹងថាវាមានម៉ាស៊ីនត្រជាក់។
ប្រភពខ្លះអះអាងថានៅពេលផ្ទះដាច់ភ្លើងបែបនេះ, ស្ត្រីរងគ្រោះឈ្មោះផាំមីងហាង (Pham Minh Hang) វ័យម្ភៃឆ្នាំ រួមជាមួយលោកប៉ាអាយុ៤៩ឆ្នាំ និងប្អូនប្រុសអាយុ១៥ឆ្នាំ ក៏សម្រេចចិត្តថាទៅគេងនៅក្នុងឡានដែលចតទុកចោលនៅក្នុងការ៉ាស់។ នៅម៉ោងប្រហែល៣:១៥ជិតភ្លឺ, ម្ដាយរបស់នារីរងគ្រោះ (ដែលគេងនៅក្នុងផ្ទះ) ដើរទៅពិនិត្យមើលកូនៗ និងស្វាមីរបស់ខ្លួន។
ពេលទៅដល់ឃើញពួកគេសន្លប់បាត់មាត់ បាត់ក ទាំង៣នាក់។ ដោយសារមើលឃើញស្ថានភាពបែបនេះ, គាត់ក៏ប្រកូកប្រកាសប្រាប់គេឯងដើម្បីជួយដឹកអ្នកទាំងបីទៅសង្គ្រោះបន្ទាន់។ ប៉ុន្តែមិនយូរប៉ុន្មាន គ្រូពេទ្យប្រាប់ថានាងផាំមីងហាង វ័យម្ភៃឆ្នាំនោះ បានដាច់ខ្យល់ស្លាប់ហើយ។ សំណាងល្អ, បុរសជាឪពុក និងប្អូនប្រុសអាចដឹងខ្លួនពីសន្លប់ បន្ទាប់ពីគ្រូពេទ្យជួយសង្គ្រោះបឋម។
សូមជម្រាបថាឡានដែលអ្នកទាំង៣បានចូលទៅដេកនោះជាប្រភេទឡានកាំម្រីស៊េរីចាស់ដែលចេញតាំងពីជំនាន់ជាង៣០ឆ្នាំមុន។ សមត្ថកិច្ចវៀតណាមកំពុងបើកការស៊ើបអង្កេតសំណុំរឿងនេះ និងសន្និដ្ឋានជំហានដំបូងថាការស្លាប់របស់នាងផាំមីងហាងទំនងជាបណ្ដាលមកពីការខ្វះខ្យល់អុកស៊ីហ្សែនសម្រាប់ដកដង្ហើម។ ទីក្រុងហាយហ្វុង និងតំបន់១ចំនួនទៀតនៅវៀតណាមខាងជើងកំពុងទទួលរងរលកកម្ដៅនៃបាតុភូតអែលនីញ៉ូ(El Niño) ដែលធ្វើឱ្យសីតុណ្ហភាពហក់ឡើងខ្ពស់ដល់៤០អង្សា ឬលើសនេះ។
យោងតាមការចុះផ្សាយរបស់កាសែតយុវជនវៀតណាម ទួយទ្រី (Tuoi Tre), នៅពេលភ្លើងអគ្គិសនីមានឡើងវិញ, ស្ត្រីជាម្ដាយរបស់ជនរងគ្រោះក៏ងើបទៅដាស់អ្នកដេកក្នុងឡានទាំង៣នាក់នោះដើម្បីវិលទៅដេកនៅក្នុងផ្ទះវិញ។ ពេលទៅដល់ឃើញពួកគេសន្លប់បាត់មាត់ បាត់ក ទាំងអស់គ្នា។ គេក៏ប្រញាប់ដឹកជញ្ជូនអ្នកទាំងបីទៅមន្ទីរពេទ្យកៀនអាន (Kien An)។
គ្រូពេទ្យសូមផ្ដែផ្ដាំឱ្យមានការប្រុងប្រយ័ត្នខ្ពស់ចំពោះអ្នកដែលបើកម៉ាស៊ីនត្រជាក់គេងនៅក្នុងឡាន និងបិទកញ្ចក់ជិត។ ពេលខ្លះ, ខ្យល់អុកស៊ីហ្សែនដែលបញ្ចេញពីម៉ាស៊ីនត្រជាក់នោះមិនគ្រប់គ្រាន់ទេ ហើយធ្វើឱ្យឧស្ម័នកាបោនអុកស៊ីតនៃខ្យល់ដង្ហើមដែលបញ្ចេញមកវិញចាប់ផ្ដើមកើនឡើងជាលំដាប់។ ដូចនេះ អ្នកគេងនៅក្នុងឡាននឹងថប់ដង្ហើមស្លាប់បន្ទាប់ពីស្រូបយកខ្យល់ពុល៕
ប្រភព៖ កាសែត Vietnam Express និង Tuoi Tre
https://e.vnexpress.net/news/news/woman-dies-sleeping-in-car-4612862.html
https://tuoitrenews.vn/news/society/20230602/1-dead-2-hospitalized-in-northern-vietnam-after-sleeping-in-car-with-ac-on/73548.html
ចែករំលែកព័តមាននេះ