ហេតុការណ៍ដ៏រន្ធត់មួយបានកើតឡើងនៅប្រទេសថៃ រវាងម្ចាស់ផ្ទះជាមួយនិងអ្នកទិញក្រោយ ដោយបុរសម្នាក់ជាម្ចាស់ផ្ទះនោះ បានយកកាំភ្លើងបាញ់ប្រហារលើស្ត្រីជាអ្នកទិញផ្ទះគាត់ស្លាប់យ៉ាងអាណោចអាធ័មបំផុត ខណៈស្ត្រីរូបនោះប្រាប់ឱ្យគាត់រើអីវ៉ាន់ចេញ ។
ជាក់ស្តែង កាលពីថ្ងៃអង្គារថ្ងៃទី៣០ ឧសភា កន្លងមក ស្ត្រីដែលរងគ្រោះ មានឈ្មោះកាម៉ុល ផន ដនថង (Kamolporn Donthong) អាយុ៥២ឆ្នាំ (ម្ចាស់ផ្ទះក្រោយ) បានរងការបាញ់ប្រហារពីសំណាក់ជនដៃដល់ឈ្មោះដេឆា (ម្ចាស់ផ្ទះមុន) ខណៈស្ត្រីរងគ្រោះបានទៅជួប និងឱ្យជនសង្ស័យនោះរើឥវ៉ាន់ចេញ ខណៈមានការបញ្ជាក់ថា នេះមិនមែនជាលើកទី១ទេ ដែលស្ត្រីរងគ្រោះប្រាប់ឱ្យជនដៃដល់រើអីវ៉ាន់ចេញពីផ្ទះនេះ ។
ប្រភពបន្តថា នៅពេលស្ត្រីរងគ្រោះ ហៅជនសង្ស័យមកនិយាយគ្នានោះ ក៏ត្រូវជនសង្ស័យដកកាំភ្លើងបាញ់៥គ្រាប់ ត្រូវចំក្បាល និងដងខ្លួន បណ្ដាលឱ្យស្លាប់ភ្លាមៗតែម្តង ។ ក្រោយកើតហេតុ មានកម្លាំងសមត្ថកិច្ចមកអន្តរាគមន៍ ដោយនាំស្ត្រីរងគ្រោះដឹកទៅសង្គ្រោះនៅមន្ទីរពេទ្យ តែស្ត្រីរងគ្រោះបានស្លាប់បាត់ទៅហើយ ។
ដោយឡែក ចំពោះជនដៃដល់វិញ ក្រោយបង្កហេតុ មិនចាកចេញទៅណាទេ គឺគាត់សំងំនៅក្នុងផ្ទះអស់រយៈពេលយ៉ាងយូរ ។ សមត្ថកិច្ចមូលដ្ឋានក៏ចាត់កម្លាំងចុះទៅកន្លែងកើតហេតុ នៅវេលាម៉ោង៣រសៀលថ្ងៃដដែល ដោយកម្លាំងបានដាក់ខ្សែហ៊ុមព័ទ្ធតំបន់នោះ និងស្នើសុំជំនួយពីកងអន្តរាគមន៍នៃស្នងការដ្ឋាននគរបាលខេត្តប៉ាធំថានី (Pathum Thani) ។
លុះវេលាម៉ោង៤និង៣០រសៀលថ្ងៃដដែល សមត្ថកិច្ចបានព្យាយាមនិយាយលួងលោមបញ្ចុះបញ្ចូលឱ្យគាត់លើកដៃសារភាព ប៉ុន្តែគាត់មិនព្រម ។ សមត្ថកិច្ចក៏បានទាក់ទងទៅកូនស្រីគាត់ ដើម្បីជួយនិយាយលួងលោមឪពុក, ប៉ុន្តែគាត់នៅតែមិនព្រមដដែល ។
នៅវេលាម៉ោង៥ល្ងាចថ្ងៃដដែល វត្តមានរបស់កងអន្តរាគមន៍ពិសេសរបស់ស្នងការដ្ឋាននគរបាលខេត្តប៉ាធំថានី (Pathum Thani) ចំនួន៦នាក់ ចុះទៅដល់កន្លែងកើតហេតុ ដោយពួកគេមានកាំភ្លើងគ្រប់ដៃ និងឧបករណ៍ការពារខ្លួន១កំផ្លេដូចជា៖ ខែល, មួក និងអាវក្រោះ។ នៅពេលនគរបាលមូលដ្ឋានខំនិយាយចរចារាប់ម៉ោងឥតប្រយោជន៍, កងអន្តរាគមន៍ក៏សាកល្បងដើរទៅជិតផ្ទះ និងបើកទ្វារ ពេលនោះ ជនសង្ស័យក៏បាញ់ប្រហារតដៃមួយប្រាវម្តងទៀត សំណាងល្អដែលកងអន្តរាគមន៍បានត្រៀមខ្លួនទុកជាមុន ។។
រហូតដល់ម៉ោង៧ និង៥៥យប់ដដែល ទើបគាត់សុខចិត្តលើកដៃចុះចាញ់តាមសម្រួល ហើយសមត្ថកិច្ចនាំយកគាត់ទៅដាក់ឃុំនៅអធិការដ្ឋាននគរបាលស្រុក ។
ទាក់ទងនឹងហេតុការណ៍ដែលបានកើតឡើងនេះ យោងតាមលទ្ធផលស៊ើបអង្កេតយ៉ាងដូច្នេះថាកន្លងមក ជនសង្ស័យបានរស់នៅផ្ទះនេះមានរយៈជាងម្ភៃឆ្នាំមកហើយ ។ គឺគាត់ទិញផ្ទះនេះ បង់រំលស់តាមកម្មវិធីរបស់រដ្ឋ ។ ប៉ុន្តែដោយសារគាត់អស់លុយបង់រំលស់តទៅទៀត ធនាគាររបស់រដ្ឋដែលជាស្ថាប័នទូទាត់សាច់ប្រាក់ ក៏សម្រេចចិត្តរឹបអូសផ្ទះនោះមកវិញ ហើយដាក់ពពាយនាយលក់ដេញថ្លៃទៅឱ្យអ្នកដទៃ ។
ប្រភពបន្តទៀតថា ជនសង្ស័យប្រហែលបានត្រឹមតែស្នាក់នៅក្នុងផ្ទះបង់រំលស់នោះមួយសំណើសិនតែប៉ុណ្ណោះ។ គាត់មិនទាន់ទទួលបានប័ណ្ណកម្មសិទ្ធិ ឬប្លង់រឹងនៅឡើយទេ។ អីចឹងហើយបានជានៅពេលធនាគារលក់ទៅឱ្យស្ត្រីរងគ្រោះ គឺមិនចាំបាច់ឆ្លងកាត់ការយល់ព្រមពីជនសង្ស័យទេ។ ការដាក់លក់ផ្ទះនេះធ្វើឡើងតាមរយៈ «នាយកដ្ឋាននីតិកម្ម» នៃក្រសួងយុត្តិធម៌។
សម្រាប់ស្ត្រីរងគ្រោះគឺបានទិញផ្ទះ និងបង់លុយពេញថ្លៃរយៈពេល១ឆ្នាំហើយ ប៉ុន្តែជនសង្ស័យមិនព្រមចេញ ។ បន្ទាប់មក តុលាការចេញសេចក្ដីសម្រេចឱ្យជនសង្ស័យចាកចេញពីផ្ទះ និងប្រគល់ឱ្យស្ត្រីរងគ្រោះជនសង្ស័យនៅតែមិនចេញ។
ចុងក្រោយ តុលាការចេញដីកាចុះថ្ងៃទី១០ ខែមេសា ឆ្នាំ២០២៣ បង្គាប់ឃុំខ្លួនជនសង្ស័យពីបទមានចេតនាប្រឆាំងនឹងដីកាតុលាការ ។ ទោះប្រើប្រាស់ចំណាត់ការអ្វីក៏ដោយ ក៏ជនសង្ស័យមិនព្រមចេញ។ គាត់សុខចិត្តតស៊ូស្លាប់រស់ មិនចេញពីផ្ទះនេះជាដាច់ខាត ៕
ប្រភព៖ Bangkok Post, The Strait Times, Thai Rath
ចែករំលែកព័តមាននេះ