ខេត្តបន្ទាយមានជ័យ ៖ ក្រោយពីមានករណីបាត់នារីស្រស់ស្អាតម្នាក់ ជាអ្នកលក់ក្រឡាន នៅតាមបណ្តោយផ្លូវជាតិលេខ៥ ក្នុងភូមិសាស្ត្រឃុំបន្ទាយនាង ស្រុកមង្គលបូរី ហើយត្រូវបានអ្នកសារព័ត៌មាន ក៏ដូចជាបណ្តាញសង្គមហ្វេសប៊ុកមួយចំនួន បានផ្សព្វផ្សាយយ៉ាងកក្រើកថាមានជនមិនស្គាល់មុខ…
ខេត្តបន្ទាយមានជ័យ ៖ ក្រោយពីមានករណីបាត់នារីស្រស់ស្អាតម្នាក់ ជាអ្នកលក់ក្រឡាន នៅតាមបណ្តោយផ្លូវជាតិលេខ៥ ក្នុងភូមិសាស្ត្រឃុំបន្ទាយនាង ស្រុកមង្គលបូរី ហើយត្រូវបានអ្នកសារព័ត៌មាន ក៏ដូចជាបណ្តាញសង្គមហ្វេសប៊ុកមួយចំនួន បានផ្សព្វផ្សាយយ៉ាងកក្រើកថាមានជនមិនស្គាល់មុខ ចាប់នារីអ្នកលក់ក្រឡានដាក់បញ្ចូលក្នុងរថយន្ត ធ្វើឱ្យមានការភ្ញាក់ផ្អើល និងចាប់រាម្មណ៍ជាទូទៅនោះ ដើម្បីរកឲ្យឃើញការពិត លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាយ៉ាងម៉ឺងម៉ាត់ដល់កម្លាំងនគរបាល នៃអធិការដ្ឋាន ស្រុកមង្គលបូរី និងកម្លាំងនគរបាលការិយាល័យជំនាញឲ្យស្រាវជ្រាវជុំវិញករណីនេះ រហូតឈានដល់មានការបំភ្លឺពីស្ត្រីឈ្មោះ ឆប គឹមឡាង ជាម្តាយនារីដែលថា បាត់ខ្លួននោះថា រឿងបាត់ខ្លួនកូនស្រីរបស់គាត់ គឺជារឿងមិនពិតនោះទេ ។
រឿងបាត់ខ្លួនកូនស្រីរបស់គាត់ តាមពិតនោះ គឺជារឿងស្នេហា ។ ដើម្បីបញ្ជាក់ឲ្យកាន់តែច្បាស់ជុំវិញករណីនោះ នៅថ្ងៃទី២៨ ខែឧសភា ឆ្នាំ២០២៣ កម្លាំងនគរបាលស្រុកមង្គលបូរី បានស្រាវជ្រាវ និងរកឃើញនារីនោះ ព្រមទាំងឲ្យនារីនោះមកបំភ្លឺជុំវិញករណី ដែលនាងបាត់ខ្លួននេះដោយផ្ទាល់តែម្តង ។
តាមការបំភ្លឺរបស់នាងគឺថា កាលពីថ្ងៃទី១៩ ខែឧសភា ឆ្នាំ២០២៣ មានព័ត៌មានក៏ដូចជាបណ្តាញព័ត៌មានសង្គមហ្វេសប៊ុក បានបង្ហោះផ្សព្វផ្សាយថា មានជនមិនស្គាល់មុខចាប់ខ្លួននាង ដែលកំពុងលក់ក្រឡាននោះនាងថា គឺជារឿងមិនពិតទេ តាមពិតនោះ គឺរឿងនាង និងបុរសជាសង្សារនោះ បានព្រមព្រៀងរត់តាមគ្នាទេ គ្មានអ្នកណាចាប់នាងទេ គឺនាងស្ម័គ្រចិត្តរត់តាមគ្នា ព្រោះនាង និងបុរសនោះស្រឡាញ់គ្នាណាស់ ។
សូមផ្សាយរំលឹកឡើងវិញថា ប៉ុន្មានថ្ងៃចុងក្រោយនេះ មានប្រជាពលរដ្ឋ និងអ្នកនិយមលេងបណ្តាញសង្គមហ្វេសប៊ុកជាច្រើន បានបង្ហោះព័ត៌មានពីករណីបាត់កូនៗ និងករណីក្រុមមនុស្សជិះរថយន្ត ឬម៉ូតូដើរចាប់ក្មេងៗ ដើម្បីវះយកសរីរាង្គជាដើម។ ទន្ទឹមគ្នានឹងការភ័យខ្លាចរឿងចាប់ក្មេងដាក់រថយន្តនេះ នៅខេត្តបន្ទាយមានជ័យ ក៏មានគណនីហ្វេសប៊ុកមួយឈ្មោះ Maly kubota កាលពីវេលាម៉ោង១៤និង៣០នាទីថ្ងៃទី១៩ ឧសភា ២០២៣ បានបង្ហោះសារថា «មានក្មេងប្រុសមួយក្រុមជិះឡានម៉ាកឡិចស៊ីស និងហាយឡែនឌ័រ ពណ៌ទឹកប្រាក់ បានចាប់ក្មួយស្រីរបស់ខ្ញុំ ឡើងឡានពេលកំពុងតែអង្គុយលក់ក្រឡាន នៅបណ្ដោយផ្លូវជាតិលេខ៥ មានទិសដៅប្រហែលទៅផ្លូវប៉ោយប៉ែត ។ សូមបងៗ ប៉ូលិសជួយចាប់ និងធ្វើអន្តរាគមន៍ផង» ។
ទាក់ទិននឹងព័ត៌មានបង្ហោះតាមបណ្តាញសង្គមនេះ មន្ត្រីនគរបាលចុះស្រាវជ្រាវ និងចុះដល់លំនៅឋាន ដោយយោងការបំភ្លឺរបស់ស្ត្រីឈ្មោះ ឆប គឹមឡាង ដែលត្រូវជាម្ដាយកូនស្រី ដែលបាត់ខ្លួននោះ បានអះអាងថា ពុំមានករណីជនណា ចាប់ជម្រិត ឬចាប់កូនស្រីគាត់វះយកសរីរាង្គទេ តែថា គឺជារឿងស្នេហារបស់កូនៗគាត់ប៉ុណ្ណោះ សូមសាធារណជនកុំមានការយល់ច្រឡំ ។
តាមការបំភ្លឺរបស់ម្តាយក្មេងស្រី ដែលបាត់ខ្លួន បានឱ្យដឹងថា រយៈពេលកន្លងមកកូនស្រី ដែលត្រូវគេចាប់យកទៅនោះ មានការទំនាស់ស្នេហាជាមួយបុរសម្នាក់ នៅក្រុងប៉ោយប៉ែត ហើយកូនស្រីគាត់ បានសុំដកខ្លួនវិញ ដោយដឹងថា ខាងប្រុសមានប្រពន្ធ និងកូនហើយ នាងក៏បានសម្រេចចិត្តយកប្តី និងមានកូនម្នាក់ ជាមួយគ្នា ។
ស្ត្រីជាម្តាយបានបញ្ជាក់ថា តែរយៈពេលថ្មីនេះ ស្រាប់តែបុរសម្នាក់ ដែលធ្លាប់មានទំនាក់ទំនងស្នេហាជាមួយកូនស្រីគាត់ បានសុំជួបគ្នាវិញ ហើយមកជួបម្តងទៅ២ដងហើយ ដោយគេនិយាយថា គេបានលែងលះគ្រួសារគេ ហើយសុំជួបគ្នាវិញ តែនាងបដិសេធថា នាងមានប្តី និងកូនម្នាក់ហើយ មិនអាចទៅរួចទេ ។ ករណីនេះ ត្រូវបានបុរសនិងបក្ខពួកមានរថយន្ត ២គ្រឿង ម៉ាកឡិចស៊ីស១គ្រឿង និងហាយឡែនឌ័រ១គ្រឿង មកចាប់នាងដាក់រថយន្ត បើកចេញទៅទិសប៉ោយប៉ែតបាត់ កាលពីថ្ងៃទី១៩ ខែឧសភា ឆ្នាំ២០២៣ នៅចំណុចមុខសាលាឃុំបន្ទាយនាង ស្ថិតភូមិបន្ទាយនាង ឃុំបន្ទាយនាង ស្រុកមង្គលបូរី ។
ក្រោយមានការចាប់យកទៅបាត់ ប្តីរបស់នាង និងសាច់ញាតិ បានបង្ហោះតាមបណ្តាញសង្គមឱ្យសមត្ថកិច្ចជួយអន្តរាគមន៍ស្រាវជ្រាវចាប់ខ្លួនអ្នកចាប់កូនស្រីឡើងរថយន្តយកទៅបាត់ យកមកផ្តន្ទាទោសតាមច្បាប់ ។
ពាក់ព័ន្ធករណីខាងលើ ពិតជាធ្វើឱ្យមានការឆោឡោ ក្អែក១ក្អែក១០ ស្តីពីព័ត៌មានបាត់ក្មេងជាបន្តបន្ទាប់តាមខេត្តមួយចំនួន ហើយសមត្ថកិច្ច ក៏កំពុងស្រាវជ្រាវផងដែរ ជុំវិញប្រភពព័ត៌មាន ដែលកំពុងចែកចាយតាមបណ្តាញសង្គមទាំងនេះ ដើម្បីស្វែងរកការពិត ៕
ចែករំលែកព័តមាននេះ