មន្ត្រី ក.ប.ប សាខាខេត្តបានឱ្យដឹងថា អាជីវករលក់ដូរនៅតាមផ្សារក្នុងខេត្តបន្ទាយមានជ័យ មានការយល់ដឹងច្រើន នៅពេលឆ្មក់ចុះពិនិត្យឃើញមានទំនិញខូចគុណភាព និងហួសសុពលភាពតិចតួចណាស់ ដែលការចុះពិនិត្យនេះបានធ្វើឡើង
ខេត្តបន្ទាយមានជ័យ ៖ មន្ត្រី ក.ប.ប សាខាខេត្តបានឱ្យដឹងថា អាជីវករលក់ដូរនៅតាមផ្សារក្នុងខេត្តបន្ទាយមានជ័យ មានការយល់ដឹងច្រើន នៅពេលឆ្មក់ចុះពិនិត្យឃើញមានទំនិញខូចគុណភាព និងហួសសុពលភាពតិចតួចណាស់ ដែលការចុះពិនិត្យនេះបានធ្វើឡើងកាលពីថ្ងៃទី២៧ ខែឧសភា ឆ្នាំ២០២៣ នៅចំណុចផ្សារហុយឡេង ស្ថិតក្នុងក្រុងសិរីសោភ័ណ។
មន្ត្រីការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ហៅ ក.ប.ប សាខាខេត្តបន្ទាយមានជ័យ បានប្រាប់ឱ្យដឹងថា ដើម្បីពង្រឹងគុណភាណទំនិញគ្រឿងបរិភោគអោយមានគុណភាព ការពារសុខុមាលភាព បងប្អូនប្រជាពលរដ្ឋ មន្ត្រីជំនាញបានឆ្មក់ចុះពិនិត្យតាមផ្សារក្នុងក្រុងសិរីសោភ័ណរយៈពេល១ថ្ងៃ ហើយរកឃើញទំនិញដែលខូចគុណភាព និងហួសសុពលភាពមានតិចតួចណាស់ ដែលត្រូវដកហូត និងធ្វើការណែនាំ និងសន្យា។
មន្ត្រីជំនាញបានបញ្ជាក់ថា ក្រោយឆ្មក់ចុះពិនិត្យទំនិញនៅផ្សារក្នុងសិរីសោភ័ណរយៈពេល១ថ្ងៃពេញ ឃើញថា អាជីវករពិតជាមានការយល់ដឹងច្រើន និងចូលរួមសហការជាមួយមន្ត្រីជំនាញដែលចុះផ្សព្វផ្សាយ និងណែនាំដល់អាជីវករ ត្រូវចូលរួមទាំងអស់គ្នាការពារសុខភាពអ្នកទិញយកទៅប្រើប្រាស់ មិនត្រូវគិតតែប្រយោជន៍ផ្ទាល់ខ្លួន ត្រូវគិតពីសុខភាពប្រជាពលរដ្ឋ បើសិនរកឃើញមានលក់ទំនិញហួសសុពលភាព និងខូចគុណភាព ព្រមទាំងទំនិញហាមឃាត់នោះ ត្រូវណែនាំ ប៉ុន្តែបើនៅតែមិនស្តាប់ ត្រូវចាត់ការតាមច្បាប់។
មន្ត្រី ក.ប.ប បានបញ្ជាក់ថា ដោយឡែកខេត្តបន្ទាយមានជ័យ គឺជាខេត្តជាប់ព្រំដែនកម្ពុជា-ថៃ ហើយទំនិញត្រូវបាននាំចូលពីប្រទេសជិតខាង ដែលលួចនាំចូលទំនិញហាមឃាត់ និងខូចគុណភាពតាមច្រករបៀងល្មើសច្បាប់ ដែលបានត្រួតពិនិត្យត្រឹមត្រូវ ហើយមន្ត្រីជំនាញនៅតែបន្តឆ្មក់ពិនិត្យតាមទីផ្សារជាប់ជាយដែន ដែលជាមុខសញ្ញាយ៉ាងសំខាន់រកទំនិញហាមឃាត់និងខូចគុណភាពផងដែរ៕
ចែករំលែកព័តមាននេះ