រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ឲ្យដឹងថា សម្រាប់កម្ពុជាធ្វើជាម្ចាស់ផ្ទះរៀបចំព្រឹត្តិការណ៍ស៊ីហ្គេមលើកទី៣២ កន្លងមកនេះ មានកងអង្គរក្ស ២ពាន់នាក់ត្រូវបានរៀបចំហ្វឹកហាត់រៀបចំបានយ៉ាងល្អក្នុងការត្រៀមសម្រាប់ការពារសន្តិសុខ…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ឲ្យដឹងថា សម្រាប់កម្ពុជាធ្វើជាម្ចាស់ផ្ទះរៀបចំព្រឹត្តិការណ៍ស៊ីហ្គេមលើកទី៣២ កន្លងមកនេះ មានកងអង្គរក្ស ២ពាន់នាក់ត្រូវបានរៀបចំហ្វឹកហាត់រៀបចំបានយ៉ាងល្អក្នុងការត្រៀមសម្រាប់ការពារសន្តិសុខ ដោយអ្នកខ្លះមិនដឹងនោះទេ ។
ការទម្លាយពីការដាក់កម្លាំងសម្ងាត់ក្នុងព្រឹត្តិការណ៍ស៊ីហ្គេមនេះ ត្រូវបានសម្តេចតេជោ ទម្លាយឲ្យដឹងនៅក្នុងពិធីសម្ពោធទីតាំងថ្មីនៃសាកលវិទ្យាល័យភូមិន្ទវិចិត្រសិល្បៈ ដែលស្ថិតក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ និងពិធីប្រគល់សញ្ញាបត្រជូនដល់និស្សិតនៃសាកលវិទ្យាល័យភូមិន្ទវិចិត្រសិល្បៈ នាព្រឹកថ្ងៃទី២៤ ខែឧសភា ឆ្នាំ២០២៣ ។
សម្តេចតេជោ ក៏បានលើកឡើងថា នៅរយៈពេល១០ថ្ងៃទៀតការរៀបចំបារ៉ាហ្គេមនឹងមកដល់ដែលកម្ពុជាធ្វើម្ចាស់ផ្ទះ ខណៈការរៀបចំស៊ីហ្គេមទទួលបានជោគជ័យ ។ សម្តេចបានគូសបញ្ជាក់ថា ៖«ខ្ញុំសូមនិយាយរឿងនេះ សូមអរគុណលោកជំទាវរដ្ឋមន្ត្រីក្រសួងវប្បធម៌ ក៏ដូចជាថ្នាក់ដឹកនាំក្រសួងដែលបានចូលរួម និងរៀបចំស៊ីហ្គេមកន្លងទៅ! សូមអរគុណសិល្បៈករសិល្បៈការិនីដែលបានហ្វឹកហ្វាត់រាប់ខែ ហើយខ្ញុំពិតជារកឃើញកន្លែងទាស់មិនឃើញសោះ ព្រោះចលនារបស់មនុស្សផ្សាភ្ជាប់គ្នាអត់ដាច់រយៈនោះទេ» ។
សម្រាប់ការរៀបចំស៊ីហ្គេមកន្លងមកនេះ សម្តេចតេជោក៏បានគូសបញ្ជាក់ថា ៖«អង្គរក្សខ្ញុំ២ពាន់នាក់បានយកមកហ្វឹកហាត់ ហើយបម្រើឲ្យសិល្បៈនៅទីនោះផង ប៉ុន្តែមានការចលាចលណាមួយកើតឡើង គឺអង្គរក្សនៅទីនោះនឹងគ្រប់គ្រងសភាពការណ៍នោះតែម្តង ។ នេះនិយាយឲ្យបានដឹងតិចចុះថា ជូនកាលអង្គរក្សគេឈរនៅជាមួយអ្នកនេះ អ្នកនោះ តែគេជាអង្គរក្សទេអាហ្នឹងត្រូវប្រយ័ត្នប្រយែង» ។
សម្តេចតេជោ បានបន្តថា អ្នកខ្លះមានមុខងារកាន់ភ្លើងគុបរត់នោះទេ ប៉ុន្តែបើមានបញ្ហាអ្វីកើតឡើង គឺអ្នកនោះក៏ត្រូវដោះស្រាយ ឧទាហរណ៍៖ ការសង្គ្រោះបន្ទាន់ ឬហេតុការណ៍កើតណាដោយប្រការណាមួយកម្លាំងជាង២ពាន់នាក់នោះបូកជាមួយកម្លាំងអន្តរាគមន៍ដទៃទៀតអាច ដោះស្រាយបញ្ហាបាន ៕
ចែករំលែកព័តមាននេះ