នៅទីបំផុត តារាចម្រៀងលោក ហ្សូណូ ចេញមុខធ្វើការប្រឆាំងតបទៅកាន់អតីតភរិយាវិញហើយ គឺអ្នកនាង ចាន់ សុផានី ដែលបានលើកឡើងដោយស្នើឱ្យតារាចម្រៀងរូបនេះ ផ្តល់ការជួយឧបត្ថម្ភថវិកាខ្លះមកឱ្យកូនស្រី ត្បិតអ្នកនាង
រាជធានីភ្នំពេញ ៖ នៅទីបំផុត តារាចម្រៀងលោក ហ្សូណូ ចេញមុខធ្វើការប្រឆាំងតបទៅកាន់អតីតភរិយាវិញហើយ គឺអ្នកនាង ចាន់ សុផានី ដែលបានលើកឡើងដោយស្នើឱ្យតារាចម្រៀងរូបនេះ ផ្តល់ការជួយឧបត្ថម្ភថវិកាខ្លះមកឱ្យកូនស្រី ត្បិតអ្នកនាងកំពុងអស់លទ្ធភាពចិញ្ចឹម ក្រោយនាងមើលថែកូនស្រីជាង១០ឆ្នាំមកនេះ ដោយគ្មានវត្តមានលោកជួយជាអាហារកិច្ចនោះឡើយ។
ការលើកឡើងពីអ្នកនាង ចាន់ សុផានីថា ដែលជាអតីតភរិយាថា លោក ហ្សូណូ មិនដែលបានជួយទំនុកកូនស្រីរួមគ្នានោះ បានធ្វើឱ្យតារាចម្រៀងរូបនេះចេញមុខមកប្រឆាំងតប ដោយបដិសេធចោលទាំងស្រុង ត្បិតលោកតែងតែជួយទំនុកកូនស្រីជាបន្តបន្ទាប់។
តារាចម្រៀងលោក ហ្សូណូ បានបញ្ចេញលិខិតបំភ្លឺមេធាវីរបស់លោក ដោយអមជាមួយនឹងវិក័យប័ត្រដែលបានផ្ញើប្រាក់ទៅកាន់កូនស្រីជាបន្តបន្ទាប់ជាសាធារណៈនៅលើបណ្តាញសង្គម ដោយអមជាមួយនឹងសំណេរថា «ទំនួលខុសត្រូវលើកូនខ្ញុំនៅតែមាន ហើយក៏តែងតែមាន នេះជាលិខិតបំភ្លឺទៅសាធារណៈមហាជនដែលបានយល់ច្រឡំកន្លងមក»។ លោកបញ្ជាក់ថា «ខ្ញុំទ្រាំអស់១០ឆ្នាំ ព្រោះអាណិតក្មេង រក្សាកិត្តិយសកូន គ្មានឪពុកណាមិនស្រឡាញ់កូនខ្លួនឯងនោះទេ ហើយសុំកុំយកក្មេងមកពាក់ព័ន្ធទៀត»។
ដោយឡែកបើយោងតាមលិខិតបំភ្លឺរបស់មេធាវី លោក ហ្សូណូ ឆ្លើយតបទៅកាន់លោកស្រី ចាន់ សុផានី នោះ បានអះអាងថា «លោក កែ សុវណ្ណារ៉េត (ហ្សូណូ) សូមធ្វើការបដិសេធចោលទាំងស្រុងនូវការលើកឡើងពីអ្នកនាង ចាន់ សុផានី តាមរយៈបណ្តាញសង្គម និងបណ្តាសារព័ត៌មាននានា ពេលកន្លងមក»។
លិខិតដដែលបញ្ជាក់ថា «កន្លងមក លោក ហ្សូណូ មិនដែលតប.តទៅនឹងការលើកឡើងពីលោកស្រី ចាន់ សុផានី នោះឡើយ ដោយសារព្រោះមិនចង់ធ្វើអោយប៉ះពាល់អារម្មណ៍កូនស្រី។ រយៈពេលប្រមាណ១០ឆ្នាំមកនេះ លោក ហ្សូណូ តែងតែជួយទំនុកបម្រុងជីវភាពរស់នៅរបស់កូនស្រីជាបន្តបន្ទាប់ ដោយឱ្យកូនស្រីរៀនបន្ត រហូតដល់កម្រិតថ្នាក់បច្ចុប្បន្ន ខណៈពេលការឧបត្ថម្ភជាថវិកាតាមរយៈម្តាយជាអ្នកចាត់ចែងជារៀងរហូតមក»។
ទោះជាយ៉ាងណា បើតាមមេធាវីរបស់លោក ហ្សូណូ ថា ការលើកឡើង និងបកស្រាយរបស់លោកស្រី ចាន់ សុផានី តាមបណ្តាញសង្គម និងសារព័ត៌មានជាបន្តបន្ទាប់នោះ គឺជាការបំផ្លើសខុសការពិតទាំងស្រុង និងបានធ្វើអោយប៉ះពាល់ដល់កិត្តិយស ព្រមទាំងសេចក្តីថ្លៃថ្នូរដល់លោក ហ្សូណូ។ ក្នុងន័យនេះ មេធាវីលោក ហ្សូណូ ក៏បានធ្វើការព្រមានចាត់វិធានតាមផ្លូវច្បាប់ប្តឹងពីបទបរិ.ហារកេ្តរិ៍ទៅកាន់លោកស្រី ចាន់ សុផានី ប្រសិនបើលោកស្រីនៅតែបន្តសកម្មភាពបំពានមកលើលោក ហ្សូណូ ទៀត។
ដោយឡែក ក្រោយពីបានបង្ហោះលិខិតរបស់មេធាវីពីតារាចម្រៀងលោក ហ្សូណូ នៅលើបណ្តាញសង្គមនាពេលនេះ គេឃើញអ្នកនាង ចាន់ សុផានី បានចូលទៅធ្វើការខំមិនពីក្រោម ហើយឆ្លើយតបទៅការជជីកវែកញែកគ្នាពីមហាជនថា «ហេតុផល គាត់អោយទាំងប៉ុន្មានដែលគាត់ផុសមកនឹងជានាទីចុងក្រោយ មុននឹងមានរឿងនេះកើតឡើង ព្រោះកូនស្រីព្យាយាមសុំគាត់ម្តងហើយម្តងទៀត មុននឹងគាត់អោយលុយនេះមកកូន ធ្វើអោយកូនមានបញ្ហាផ្លូវចិត្តជាខ្លាំង»។
អ្នកនាង ចាន់ សុផានី បន្តថា «ក្នុងនាមខ្ញុំជាអាណាព្យាបាល ក៏មានបញ្ហាញឹកញាប់ដូចគ្នា ដោយសារតែទង្វើរខុសប្រក្រតីរបស់កូន ដូច្នេះហើយទើបខ្ញុំចេញមុខមកដោះស្រាយរឿងនេះ សុំអាហារកិច្ចពីហ្ស៊ូណូជាផ្លូវការ ដើម្បីកុំអោយកូនតាមសុំគាត់បែបនេះទៀត។ ហើយម្យ៉ាងទៀត រាល់ពេលដែលកូនមកប្រាប់ខ្ញុំ គឺគាត់ថា «ប៉ាជាអ្នកដាក់អោយ មិនមែនគាត់ជាអ្នកសុំនោះទេ»។ ជាក់ស្តែង ពេលដែលខ្ញុំចូលមើលឆាត ទើបខ្ញុំដឹងថា កូនជាអ្នកសុំគាត់ ហើយខ្ញុំអាណិតកូនណាស់ តែងតែប្រាប់កូនថា «កុំអោយសុំប៉ា» ប៉ុន្តែដោយសារតែគាត់យល់ពីស្ថានភាពរស់នៅរបស់គាត់ខ្វះខាត ទើបគាត់សុំ ព្រោះគិតថា ប៉ាក៏មានលទ្ធភាព»។
អ្នកនាង ចាន់ សុផានី បន្តទៀតថា «ហើយអ្វីដែល ហ្សូណូ យកឯកសារផ្ញើរលុយមកផុសបង្ហាញនេះ ត្រឹមនេះឯងមិនដូចអ្វីដែលហ្សូណូ និយាយថា ជួយមកជាងដប់ឆ្នាំនេះទេ»។ អ្នកនាងថា «ខ្ញុំហ៊ានស្ប.ថ ហើយសូមឱ្យ ហ្សូណូ មកស្ប.ថជាមួយខ្ញុំ បើមិនមែនការពិត សូមអោយអ្នកឯងវិនាសអន្តរាយ»។
គួររំលឹកថា ៖ ចាន់ សុផានី ព្យាយាមស្វែងរកការជួយផ្នែកច្បាប់ ក្រោយមិនមានការឆ្លើយតបពី ហ្សូណូ៕
ចែករំលែកព័តមាននេះ