រាជធានីភ្នំពេញ ៖ និយាយក្នុងបទសម្ភាសន៍មួយ កាលពីពេលថ្មីៗនេះ តារាចម្រៀងអ្នកនាង សុភ័ក្ត្រ កុសុម៉ា បានធ្វើការនឹកគុណទៅកាន់ពិធីករ លោក តាប៊ុយ…
រាជធានីភ្នំពេញ ៖ និយាយក្នុងបទសម្ភាសន៍មួយ កាលពីពេលថ្មីៗនេះ តារាចម្រៀងអ្នកនាង
សុភ័ក្ត្រ កុសុម៉ា បានធ្វើការនឹកគុណទៅកាន់ពិធីករ លោក តាប៊ុយ ដែលបានផ្ចុងផ្តើម និងផ្តល់ឱកាសអោយនាងធ្វើជាពិធីការិនីដំបូង រហូតអោយនាងជោគជ័យក្នុងអាជីពសិល្បៈជាបន្តបន្ទាប់ បើទោះបីកន្លងអ្នកទាំងពីរធ្លាប់មានពាក្យសំដីរកាំរកូសជាមួយគ្នាក៏ដោយ ។
គេនៅចាំថា កន្លងទៅ សុភ័ក្ត្រ កុសុម៉ា និងលោកតាប៊ុយ បានប៉ះសំដីគ្នាស្ទើរមើលគ្នាមិនចំ បន្ទាប់ពី សុភ័ក្ត្រ កុសុម៉ា បានចាត់ទុកការលេងសើចតាមរយៈសំណេរបង្ហោះលើបណ្តាញសង្គមរបស់តាប៊ុយ ហាក់ជ្រុល នៅមុនពេលដែលនាងរៀបការមានស្វាមី ។
អំឡុងពេលនោះ ពិធីករលោក តាប៊ុយ បានបង្ហោះសំណេរដោយភ្ជាប់ជាមួយរូបភាព សុភ័ក្ត្រ កុសុម៉ា ថត Pre-wedding ថា លើកឡើងថា «តាមពិតកូនកំលោះសន្សំលុយមិនទាន់គ្រប់ តែខាងកូនក្រមុំថែមលុយការប្តី»។
តាមរយៈសំណេរនេះ ធ្វើឱ្យ សុភ័ក្ត្រ កុសុម៉ា ហាក់សម្តែងការមិនពេញចិត្ត ដោយក្នុងនោះ នាងចាត់ទុកពាក្យសម្តីរបស់តាប៊ុយ នាពេលនេះ ហាក់មិនអោយតម្លៃដល់រូបនាង និងស្វាមី ។យ៉ាងណា រឿងរ៉ាវនេះបានរលត់កំដៅវិញ បន្ទាប់ពីតាប៊ុយ បានចេញមុខសុំទោស សុភ័ក្ត្រ កុសុម៉ា ជាសាធារណៈ ។
ទោះជាយ៉ាងណា បើទោះបីជាធ្លាប់មានរឿងរកាំរកូសពាក្យសម្តីជាមួយគ្នាខាងលើនេះក៏ដោយ រហូតទល់ពេលនេះ សុភ័ក្ត្រ កុសុម៉ា នៅតែរលឹកដឹងគុណទៅដល់ តាប៊ុយ ដែលបានផ្តល់ឱកាស និងជួយអោយនាងទទួលបានជោគជ័យលើអាជីពសិល្បៈរហូតមកដល់ពេលលនេះ ។
សុភ័ក្ត្រ កុសុម៉ា បានលើកឡើងថា តាមពិតនាងតែចាត់ទុកតាប៊ុយ នៅតែជាមនុស្សដែលមានគុណសម្រាប់នាងម្នាក់ដែរ ដោយសារគាត់បានផ្តល់ឱកាសអោយនាងបានធ្វើការងារជាពិធីករជាលើកដំបូង ។ នាងថា អំឡុងពេលមួយគាត់បានហៅនាង និងអ្នកសិល្បៈ២នាក់ទៀតទៅធ្វើតេស្តន៍សាកល្បង ប៉ុន្តែគឺមានតែនាងម្នាក់ដែលជាប់ ។
នាងបន្តថា នៅក្នុងពេលដែលនាងបានធ្វើជាពិធីការិនីដំបូង នៅក្នុងកម្មវិធីពេញចិត្តឫអត់នោះគឺ Show មានការផ្ទុះខ្លាំង ដោយមានអ្នកមើលច្រើន ។ចាប់តាំងពីពេលនោះមក រូបនាងក៏មានទស្សនិកជនស្គាល់ច្រើនតាមរយៈការនិយាយបែបកំប្លុកកំប្លែង និងកាយវិការប្លែក ដើម្បីអោយទស្សនិកជនបានសប្បាយរីករាយ ។
នាងបញ្ជាក់ថា តាំងពីដើមមក នាងគឺជាតារាចម្រៀងទេ ប៉ុន្តែពេលដែលមហាជនស្គាល់នាងខ្លាំង គឺតាមរយៈពិធីការិនីនៃកម្មវិធីពេញចិត្តឫអត់ ។
បើតាមសុភ័ក្ត្រ កុសុម៉ា ចាប់តាំងពីពេលនោះមក នាងក៏ចាប់មានទីផ្សារសិល្បៈជាបន្តបន្ទាប់ ដែលចំណុចនេះ នាងសូមអរគុណដល់លោកតាប៊ុយ ដែលផ្តល់ឱកាសដំបូងរហូតអោយនាងជោគជ័យមកដល់នាពេលនេះ បើទោះបីជាពេលខ្លះពួកយើងមានភាពរកាំរកូសជាមួយក៏ដោយ ប៉ុន្តែនាងនៅតែស្រឡាញ់ និងដឹងគុណគាត់ជានិច្ច ៕
ចែករំលែកព័តមាននេះ