ដោយសារតែទើសភ្នែក ធុញទ្រាន់ និងអត់ទ្រាំក្នុងការអំពាវនាវមិនបាន អ្នកនាំពាក្យក្រសួងការបរទេស និងកិច្ចការអឺរ៉ុបនៃប្រទេសបារាំង បានអំពាវនាវឱ្យប្រទេសថៃ និងប្រទេសកម្ពុជាឈប់បា.ញ់គ្នាជាបន្ទាន់ វិលត្រឡប់មករកការដោះស្រាយគ្នាដោយសន្តិវិធី គិតគូរពីអាយុជីវិតទាហាន និងពលរដ្ឋស៊ីវិល ព្រមទាំងសន្តិភាព-ការអភិវឌ្ឍន៍
ដោយសារតែទើសភ្នែក ធុញទ្រាន់ និងអត់ទ្រាំក្នុងការអំពាវនាវមិនបាន អ្នកនាំពាក្យក្រសួងការបរទេស និងកិច្ចការអឺរ៉ុបនៃប្រទេសបារាំង បានអំពាវនាវឱ្យប្រទេសថៃ និងប្រទេសកម្ពុជាឈប់បាញ់គ្នាជាបន្ទាន់ វិលត្រឡប់មករកការដោះស្រាយគ្នាដោយសន្តិវិធី គិតគូរពីអាយុជីវិតទាហាន និងពលរដ្ឋស៊ីវិល ព្រមទាំងសន្តិភាព-ការអភិវឌ្ឍន៍។ កាលពីថ្ងៃចន្ទ ទី២ ឧសភា ២០១១ ម្សិលមិញ អ្នកនាំពាក្យក្រសួងការបរទេស និងកិច្ចការអឺរ៉ុបនៃប្រទេសបារាំង បានចេញសេចក្តីថ្លែងការណ៍មួយដោយអំពាវនាវជាថ្មីឱ្យប្រទេសកម្ពុជា និងថៃបញ្ឈប់ជាបន្ទាន់នូវអរិភាព ភាពជាសត្រូវនឹងគ្នា ហើយបានជំរុញឱ្យប្រទេសទាំង២ធ្វើការអត់ធ្មត់ និងមានការទទួលខុសត្រូវ ។
សេចក្តីថ្លែងការណ៍ដដែលបានបញ្ជាក់ទៀតថា ប្រទេសបារាំងសុំឱ្យប្រទេសទាំង២ដោះស្រាយជម្លោះដោយសន្តិវិធីស្របទៅតាមច្បាប់អន្តរជាតិ ។ ជាមួយគ្នានេះ សេចក្តីថ្លែងការណ៍របស់អ្នកនាំពាក្យក្រសួងការបរទេសបារាំង ក៏បានគាំទ្រទាំងស្រុងចំពោះតួនាទីរបស់ប្រធានអាស៊ាន និងសង្ឃឹមថា អ្នកសង្កេតការណ៍ឥណ្ឌូណេស៊ី ដែលភាគីទាំង២បានព្រមព្រៀងក្នុងការដាក់ពង្រាយនឹងត្រូវបញ្ជូនមកកាន់ព្រំដែនក្នុងពេលឆាប់ៗខាងមុខ ។
សូមបញ្ជាក់ថា ចរចាគ្នាតាំងពីនៅតំបន់ប្រាសាទព្រះវិហារ រហូតមកដល់តំបន់ប្រាសាទតាក្របី និងតំបន់ប្រាសាទតាមាន់ធំ១១លើកទៅហើយថា ឈប់បាញ់! ឃើញស្រមោលអ្វីក៏ឈប់បាញ់! ឮកណ្តុររត់ក៏ត្រូវតែឈប់បាញ់ដែរ…ប៉ុន្តែអំបូរមិនថ្លៃថ្នូរ ទាហានសៀមនៅតែបាញ់ចូលទឹកដីកម្ពុជាដដែលជាដដែល ហើយពេលនេះកម្ពុជាអត់ទ្រាំមិនបានក៏បាញ់ផ្លោងតបវិញ ។
យប់មិញចាប់តាំងពីវេលាម៉ោងជាង៧ថ្ងៃទី២ ឧសភា ២០១១ ទាហានសៀមបានបាញ់កាំភ្លើងដៃ និងបោកគ្រាប់បែកចូលទឹកដីកម្ពុជាតំបន់ប្រាសាទតាក្របីយ៉ាងងងើល…រហូតដល់ម៉ោង១០យប់ថ្ងៃដដែល ទាហានសៀមផ្លោងកាំភ្លើងធុនធ្ងន់ និងកាំភ្លើងដៃចូលក្នុងទឹកដីកម្ពុជា និងសំដៅលេណដ្ឋានទាហានកម្ពុជា ហើយពេលនោះធ្វើឱ្យទាហានកម្ពុជាមិនអាចអត់ទ្រាំបានចំពោះភាពងងើលច្រំដែលៗរបស់ទាហានសៀមក៏បាញ់ផ្លោងតបវិញ គឺបាញ់ផ្លោងដាក់គ្នាទៅវិញទៅមក រហូតដល់ម៉ោង២រំលងអធ្រាត្រឈានចូលថ្ងៃទី៣ ឧសភា ២០១១ ទើបមេបញ្ជាការទាហានសៀមទាក់ទងចរចាមកមេបញ្ជាការទាហានកម្ពុជា ហើយឈានទៅដល់ការឈប់បាញ់កាំភ្លើងធំ…ប៉ុន្តែខណៈទាហានកម្ពុជាឈប់បាញ់កាំភ្លើងធំនោះ ទាហានសៀមនៅតែបាញ់កាំភ្លើងដៃ និងបោកគ្រាប់បែកចូលទឹកដីកម្ពុជារហូតដល់ម៉ោង៥ភ្លឺថែមទៀត។ ចំណែកនៅតំបន់ប្រាសាទតាមាន់ធំវិញ មិនមានការបាញ់ផ្លោងរបស់ទាហានសៀមចូលទឹកដីកម្ពុជានោះទេ ៕
ចែករំលែកព័តមាននេះ