សម្ដេចតេជោថា កូនចៅគណបក្សប្រឆាំង មិនភ្លើដូចមេខ្លួនទៀតឡើយ
- ភ្នំពេញ
សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា បានគូសបញ្ជាក់យ៉ាងច្បាស់ៗថា
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា បានគូសបញ្ជាក់យ៉ាងច្បាស់ៗថា នាពេលបច្ចុប្បន្ននេះ សមាជិក-សមាជិកា ឬកូនចៅរបស់គណបក្សប្រឆាំងមិនភ្លើដូចមេទៀតឡើយ ដោយសារពួកគេបានដកខ្លួនមកសុំរួមរស់ជីវភាពនយោបាយជាមួយគណបក្សប្រជាជនកម្ពុជា ជាបន្ដបន្ទាប់ផងដែរ។
ថ្លែងក្នុងពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម, វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នាថ្ងៃទី១៥ ខែឧសភា ឆ្នាំ២០២៣នេះ សម្ដេចតេជោ ហ៊ុន សែន បានឱ្យដឹងថា ដោយសារមេក្រុមប្រឆាំងល្ងង់ ខ្វះការយល់ដឹង ទើបអ្នកដើរតាមខ្លួនជាច្រើន បានមកសុំរួមរស់ជាមួយគណបក្សប្រជាជនកម្ពុជាវិញ។
សម្ដេចតេជោ បានគូសបញ្ជាក់ថា ៖ «ប៉ុន្ដែឥឡូវនេះ កូនមិនសូវជាភ្លើទេ កូនដកខ្លួនចូលបក្សប្រជាជន ហូរហែមកចឹង មេកាន់តែភ្លើ កូនគេអ្នកចេះដឹងដែរ គេដកខ្លួនមកជាមួយគណបក្សប្រជាជន។ មេឯង ពូកែធ្វើភ្លើទៀតទៅ ចាំតែអាញភ្លើជាមួយតើ»។
នៅចំពោះមុខនិស្សិតជាច្រើនរយនាក់ សម្ដេចតេជោ ហ៊ុន សែន ក៏បានប្រកាសស្វាគមន៍ចំពោះសមាជិក-សមាជិកា របស់គណបក្សនយោបាយនានា មករួមរស់ជាមួយគណបក្សប្រជាជនកម្ពុជា។ ប៉ុន្តែមានបុគ្គលម្នាក់ សម្ដេចមិនទទួលយកជាដាច់ខាចផងដែរ។
សម្ដេចនាយករដ្ឋ បានគូសបញ្ជាក់ទៀតថា ៖ «សមាជិក-សមាជិកាគណបក្សនានា ដែលបានផ្ដាច់ខ្លួន ហើយមកចូលរួមជីវភាពជាមួយគណបក្សប្រជាជនកម្ពុជា ខ្ញុំនៅតែបន្តស្វាគមន៍ មានតែមនុស្សម្នាក់គត់ដែលខ្ញុំអត់យក ក្រៅពីនោះខ្ញុំយកទាំងអស់ ឲ្យតែប្រកាសផ្ដាច់ខ្លួនចេញអាជ្រុលនិយមហ្នឹង គឺខ្ញុំទទួលយកទាំងអស់»។
សូមរំលឹកថា រយៈពេលប៉ុន្មានខែនេះ គេសង្កេតឃើញថា មានសមាជិក-សមាជិកា របស់អតីតគណបក្សប្រឆាំង និងបក្សនយោបាយផ្សេងទៀត ឬអង្គការនានា បានសុំរួមរស់ជីវភាពជាមួយ គណបក្សប្រជាជនកម្ពុជា ក្រោយពួកគេអស់ជំនឿជឿទុកចិត្តទៅលើមេរបស់ខ្លួន។ ការសុំចូលជីវភាពនយោបាយរបស់អតីតសមាជិកបក្សប្រឆាំង គេសង្កេតឃើញថា ក៏មានការផ្តល់តួនាទីក្នុងក្រសួងស្ថាប័នរដ្ឋនានាផងដែរ៕
ចែករំលែកព័តមាននេះ