រាជធានីភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ សាលារាជធានីភ្នំពេញបាននិងកំពុងយកចិត្តទុកដាក់ជាខ្លាំង ក្នុងការរៀបចំប្រព័ន្ធបង្ហូរទឹកស្អុយក្រោមដី ដែលជាក្តីកង្វល់ក្នុងការរំដោះទឹកចេញក្រៅក្រុង បញ្ចៀសការជន់លិចដោយជំនន់ទឹកភ្លៀង ខណៈពេលដែលដំណើរការអភិវឌ្ឍន៍រាជធានី ពីមួយឆ្នាំទៅមួយឆ្នាំមានការចាក់ដីបំពេញ
រាជធានីភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ សាលារាជធានីភ្នំពេញបាននិងកំពុងយកចិត្តទុកដាក់ជាខ្លាំង ក្នុងការរៀបចំប្រព័ន្ធបង្ហូរទឹកស្អុយក្រោមដី ដែលជាក្តីកង្វល់ក្នុងការរំដោះទឹកចេញក្រៅក្រុង បញ្ចៀសការជន់លិចដោយជំនន់ទឹកភ្លៀង ខណៈពេលដែលដំណើរការអភិវឌ្ឍន៍រាជធានី ពីមួយឆ្នាំទៅមួយឆ្នាំមានការចាក់ដីបំពេញទីវាលទំនាប ឬបឹងប្រឡាយមេជាដើម ។ ដោយសារចំណុចនេះហើយទើបធ្វើឱ្យរាជធានីភ្នំពេញ ជួបបញ្ហាលំបាកជាខ្លាំងក្នុងការរំដោះទឹកចេញក្រៅក្រុង។
ចំពោះការរៀបចំប្រព័ន្ធលូក្នុងសម័យអាណានិគមបារាំង ពួកបារាំងធ្វើឡើងដោយនឹកស្មានមិនដល់ថា រាជធានីភ្នំពេញមានការអភិវឌ្ឍន៍ជឿនលឿនដូចសព្វថ្ងៃ ដែលកាលណោះគេគិតថាភ្នំពេញមានមនុស្សតែប្រមាណ៥ម៉ឺននាក់យ៉ាងច្រើនប៉ុណ្ណោះ ។ តែផ្ទុយទៅវិញ រាជធានីភ្នំពេញនៅជំនាន់សម្តេចតេជោហ៊ុន សែន មានប្រជាពលរដ្ឋរស់នៅប្រមាណ២លាននាក់ ដោយមិនគិតពីការធ្វើដំណើររបស់ប្រជាពលរដ្ឋចេញ-ចូលរកស៊ី ឬប្រកបការងារនៅភ្នំពេញរាល់ថ្ងៃនោះទេ ទើបធ្វើឱ្យមានបញ្ហាប្រឈមជាច្រើនដែលរាជរដ្ឋាភិបាលសម័យនេះ ត្រូវកែសម្រួល រៀបចំ និងស្ថាបនាថ្មីទាំងស្រុង ដូចជាប្រព័ន្ធលូចាស់នាសម័យបារាំង មកដល់ពេលនេះចាប់ផ្តើមពុកផុយជាបណ្តើរៗ និងខ្លះកំពុងបាក់ស្រុតជាបន្តបន្ទាប់ ដែលសព្វថ្ងៃលូសម័យបារាំងនៅសល់តែ២០%ប៉ុណ្ណោះ។
ដោយសារការខិតខំប្រឹងប្រែងរបស់អាជ្ញាធររាជធានីភ្នំពេញ ហើយទិសដៅឆ្នាំ២០១១ និង២០១២ ខាងមុខនេះ សាលារាជធានីភ្នំពេញជម្រុញឱ្យធ្វើការផ្លាស់ប្តូរ លូចាស់ចេញឱ្យអស់ ជំនួសដោយលូថ្មី ដើម្បីសម្រួលប្រព័ន្ធផ្លូវទឹកស្អុយ ក្រោមដីឱ្យហូរបានលឿន និងបញ្ចៀសការបាក់ស្រុតតទៅទៀត ។ ជាក់ស្តែងប្រព័ន្ធលូមេ មានមុខកាត់មួយម៉ែត្រកន្លះ តភ្ជាប់ពីអាងទឹកអូឡាំពិក ទៅភ្ជាប់នឹងប្រឡាយទួលសែននៅចំណុចក្នុងវត្តមហាមន្ត្រី ខណ្ឌចំការមន បានបាក់ស្រុតជាបន្តបន្ទាប់ដែលចាំបាច់សាលារាជធានីភ្នំពេញត្រូវដាក់ថ្មីជំនួស។ ក្រោមការណែនាំពីលោកកែប ជុតិមា អភិបាលរាជធានីភ្នំពេញ អង្គភាពលូទឹកនៃមន្ទីរសាធារណការរាជធានី ដឹកនាំ ដោយលោកនៅ សារឿន ជាប្រធាន បានដំណើរការដាក់ប្រព័ន្ធលូថ្មី ទៅជំនួសលូដែលបាក់ស្រុតភ្លាមៗតែម្តង ដើម្បីតភ្ជាប់ប្រព័ន្ធផ្លូវទឹកស្អុយឱ្យហូរដូចធម្មតាវិញ ៕
ចែករំលែកព័តមាននេះ