កម្លាំងសមត្ថកិច្ច កាលពីថ្ងៃ១២ ខែឧសភា ឆ្នាំ២០២៣កន្លងទៅ បានចាប់ឃាត់ខ្លួនជន៣នាក់ ដែលជាប់ចោទពីបទហែក (Hack) គណនីហ្វេសប៊ុក រួចឆបោ.កម្ចាស់ប្តូរប្រាក់វីងមួយកន្លែងយកអស់ជាង៥០លានរៀល និងជនរងគ្រោះម្នាក់ទៀតអស់
ខេត្តបន្ទាយមានជ័យ ៖ កម្លាំងសមត្ថកិច្ច កាលពីថ្ងៃ១២ ខែឧសភា ឆ្នាំ២០២៣កន្លងទៅ បានចាប់ឃាត់ខ្លួនជន៣នាក់ ដែលជាប់ចោទពីបទហែក (Hack) គណនីហ្វេសប៊ុក រួចឆបោ.កម្ចាស់ប្តូរប្រាក់វីងមួយកន្លែងយកអស់ជាង៥០លានរៀល និងជនរងគ្រោះម្នាក់ទៀតអស់ ១.០០០ដុល្លារ នៅក្នុងក្រុងប៉ោយប៉ែត ។
លោកវរសេនីយ៍ទោ សោម សារុន នាយការិយាល័យនគរបាលប្រឆាំងបទល្មើសបច្ចេកវិទ្យាខេត្ត ថ្លែងថា ជនទាំង៣នាក់ដែលត្រូវបានចាប់ឃាត់ខ្លួននេះសុទ្ធតែស្នាក់នៅក្នុងក្រុងប៉ោយប៉ែត ក្នុងនោះរួមមាន ៖ ១-ឈ្មោះ រី ឌី ភេទប្រុស អាយុ១៩ឆ្នាំ ។ ២-ឈ្មោះ ចែម ដារ៉ា ភេទប្រុស អាយុ២៧ឆ្នាំ ។ ៣-ឈ្មោះ ហ៊ុន លីហេង ភេទប្រុស អាយុ២៦ឆ្នាំ ។
លោកនាយការិយាល័យបន្តថា ជនរងគ្រោះឈ្មោះ វឿន វី ភេទប្រុស អាយុ៤២ឆ្នាំ រស់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត បានដាក់ពាក្យបណ្ដឹងថា កាលពីថ្ងៃទី១០ ខែឧសភា ឆ្នាំ២០២៣កន្លងទៅ មានជនមិនស្គាល់មុខ និងអត្តសញ្ញាណ បានលួចហែក (Hack) គណនីហ្វេសប៊ុកឈ្មោះ ចាន់ ថៃឡុងគឿ ហើយឆាតទៅគណនីហ្វេសប៊ុកឈ្មោះ Vong Vy ដោយសរសេរឱ្យផ្ញើប្រាក់បាតថៃចូលទៅគណនីធនាគាររបស់ឈ្មោះ វឿន វី ។ បន្ទាប់មកឱ្យប្ដូរជាប្រាក់រៀល ហើយឱ្យផ្ញើចូលលេខទូរស័ព្ទចំនួន៥ខ្សែ រួមមានលេខ ៖ ០៧១ ៦៣០ ៦១៦៦/០៧១ ៩២១ ០៩៥៨/ ០៧១ ៨៤៩ ៧៦០០/ ០១៥ ៧២៧ ៤២៦/ ០១៧ ៤២៨ ៨៧៤ តាមរយៈធនាគារវីងចំនួន១៤លើក ស្មើនឹងទឹកប្រាក់សរុបចំនួន ៥០.៨៤០.០០០រៀល ។
រីឯម្ចាស់គណនីឈ្មោះ RY DY បានលួចហែក (Hack) គណនីហ្វេសប៊ុកឈ្មោះ អ៊ិន សំណាង ហើយឆបោ.កលុយឈ្មោះ ស៊ុន សុខ ដែលស្គាល់រាប់អានគ្នា និងមានលេខកូដគណនី ០៧១ ៣៩៨ ៤១៣៦ ឆបោ.កលុយចំនួន ១.០០០ដុល្លារទៀតផង។
លោកនាយការិយាល័យ សោម សារុន បញ្ជាក់ថា ក្រោមការណែនាំរបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត កម្លាំងការិយាល័យប្រឆាំងបទល្មើសបច្ចេកវិទ្យាខេត្ត បានធ្វើការស្រាវជ្រាវកំណត់មុខសញ្ញា និងឃាត់ខ្លួនជនសង្ស័យបាន៣នាក់ កាលពីថ្ងៃទី១២ ខែឧសភា ឆ្នាំ២០២៣ នៅសង្កាត់ប៉ោយប៉ែត ក្រុងប៉ោយប៉ែត ។
ក្រោយពីចាប់ឃាត់ខ្លួន ជនទាំង៣នាក់ត្រូវបានកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី១៣ ខែឧសភា ឆ្នាំ២០២៣ ៕
ចែករំលែកព័តមាននេះ