និស្សិតនៅរាជបណ្ឌិត្យសភាកម្ពុជា រំលេចស្នាដៃគំនូរ ក្នុងព្រឹត្តិការណ៍កីឡាស៊ីហ្គេម២០២៣
រាជធានីភ្នំពេញ ៖ ព្រឹត្តិការណ៍កីឡាតំបន់អាស៊ីអាគ្នេយ៍ ឬស៊ីហ្គេម (SEA GAMES) លើកទី៣២ ឆ្នាំ២០២៣ ដែលកម្ពុជា បាននិងកំពុងធ្វើជាម្ចាស់ផ្ទះ…
រាជធានីភ្នំពេញ ៖ ព្រឹត្តិការណ៍កីឡាតំបន់អាស៊ីអាគ្នេយ៍ ឬស៊ីហ្គេម (SEA GAMES) លើកទី៣២ ឆ្នាំ២០២៣ ដែលកម្ពុជា បាននិងកំពុងធ្វើជាម្ចាស់ផ្ទះ បច្ចុប្បន្ននេះ ក្រុមនិស្សិតដែលកំពុងសិក្សាស្រាវជ្រាវ លើមុខជំនាញវិចិត្រកម្ម នៅរាជបណ្ឌិត្យសភាកម្ពុជា បានបញ្ចេញស្នាដៃគូរគំនូរ ចំនួន០៣ របស់កីឡាការិនី ស្រួង ភាវី (ម្ចាស់មេដាយមាសប៊ីយ៉ាការ៉ុម) កីឡាការិនី ប៊ួ សំណាង (អត្តពលកម្ម) និងលោក Keisuke Honda (អ្នកចាត់ការទូទៅបាល់ទាត់ជម្រើសជាតិ នៅកម្ពុជា) ។
គំនូរខ្វៀក គូរដោយនិស្សិត Chan Samphors បានបញ្ចេញស្នាដៃគូរគំនូរខ្វៀករបស់កីឡាការិនី ០២រូប រួមមាន ៖
ទី១- គឺអ្នកនាង ស្រួង ភាវី ម្ចាស់ជើងឯកលើផ្នែកកីឡាស្នូកឃ័រ ឬប៊ីយ៉ាការ៉ុប នៅប្រទេសកូរ៉េខាងត្បូង នាពេលថ្មីៗនេះ ក៏បានសាងស្នាដៃថ្មីមួយទៀតជូនព្រះរាជាណាចក្រកម្ពុជា ដោយបានឈ្នះមេដាយមាសលើវិញ្ញាសាកីឡាស្នូកឃ័រឬប៊ីយ៉ាការ៉ុម ៣បាំង ។
និងទី២- កីឡាការិនីអត្តពលកម្ម ប៊ួ សំណាង ក្នុងការប្រកួតវិញ្ញាសារត់ចម្ងាយ ៥,០០០ម៉ែត្រ បានខិតខំប្រឹងប្រែងរត់ក្រោមដំណក់ទឹកភ្លៀង ក្នុងស្មារតីមិនបោះបង់ រហូតមកដល់ទីព្រ័ត្រ បើទោះបីជាអត្តពលិករូបនេះ មិនទទួលបានមេដាយក៏ដោយ ។
ចំណែកឯរូបគំនូររបស់និស្សិត ព្រហ្ម ពុធវិសាល វិញគឺគូររូបលោក Keisuke Honda ជាអ្នកចាត់ការទូទៅបាល់ទាត់ជម្រើសជាតិកម្ពុជា ចាប់តាំងពីឆ្នាំ២០១៨ ដល់ ឆ្នាំ២០២៣ ដោយបានដឹកនាំក្រុមជម្រើសជាតិកម្ពុជាឆ្លងកាត់ការប្រកួតជាច្រើន និងទទួលបានជោគជ័យលើគូប្រកួតអន្តរជាតិជាច្រើន គួរឱ្យស្ងប់ស្ងែងនិងមោទកភាព។
សូមជម្រាបថា កាលពីយប់ថ្ងៃទី១០ ខែឧសភា ឆ្នាំ២០២៣ កន្លងមកនេះ ជាការប្រកួតរវាងក្រុមបាល់ទាត់ជម្រើសជាតិកម្ពុជា និងក្រុមបាល់ទាត់ជម្រើសជាតិឥណ្ឌូនេស៊ីក្នុងព្រឹត្តិការណ៍ស៊ីហ្គេមលើកទី៣២ នៅពហុកីឡដ្ឋានជាតិអូឡាំពិក ហើយក៏ជាថ្ងៃចុងក្រោយសម្រាប់លោក ហុងដា ធ្វើជាអ្នកចាត់ការទូទៅបាល់ទាត់ជម្រើសជាតិ នៅកម្ពុជាផងដែរ។
ការលះបង់កម្លាំងកាយកម្លាំងចិត្ត និងពេលវេលាដ៏មានតម្លៃរបស់លោក ពិតជាបានធ្វើឱ្យក្រុមបាល់ទាត់ជម្រើសជាតិកម្ពុជា មានការអភិវឌ្ឍ និងរីកចម្រើនជាខ្លាំង។ លោក ហុងដា ក៏បានរួមចំណែកជាច្រើនក្នុងរុញច្រានវិស័យបាល់ទាត់នៅកម្ពុជា ឱ្យមានការទទួលស្គាល់លើឆាកអន្តរជាតិ និងស្មើមុខស្មើមាត់ជាមួយនឹងមិត្តបរទេស។
ដោយមើលឃើញភស្តុតាងតាមរយៈការលះបង់ និងសមិទ្ធផលរបស់ លោកហុងដា សម្រាប់បាល់ទាត់កម្ពុជានេះហើយ ទើបប្រជាជនកម្ពុជាពិតជាសូមថ្លែងអំណរគុណយ៉ាងជ្រាលជ្រោះចំពោះលោក និងជាពិសេសដើម្បីចូលរួមថ្លែងអំណរគុណដល់លោក ហុងដា លោក ព្រហ្ម ពុធ វិសាល ដែលកំពុងសិក្សាស្រាវជ្រាវលើមុខជំនាញវិចិត្រកម្មនៅរាជបណ្ឌិត្យសភាកម្ពុជា បានបញ្ចេញស្នាដៃតាមរយៈគំនូរខ្វៀកមួយផ្ទាំងជូនទៅកាន់លោក ហុងដា ៕
ចែករំលែកព័តមាននេះ