រាជធានីភ្នំពេញ ៖ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ មានកីឡាការិនីវ៉ូវីណាកម្ពុជា ២រូបទទួលបានមេដាយច្រើនជាងគេ ក្នុងនោះមានកីឡាការិនីម្នាក់ឈ្នះមេដាយចំនួន៦ គ្រឿង និងកីឡាការិនីម្នាក់ទៀតឈ្នះបានមេដាយចំនួន៥ គ្រឿង។ សម្រាប់ការឈ្នះបានមេដាយជាច្រើននៃការប្រកួតកីឡាវ៉ូវីណាម…
រាជធានីភ្នំពេញ ៖ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ មានកីឡាការិនីវ៉ូវីណាកម្ពុជា ២រូបទទួលបានមេដាយច្រើនជាងគេ ក្នុងនោះមានកីឡាការិនីម្នាក់ឈ្នះមេដាយចំនួន៦ គ្រឿង និងកីឡាការិនីម្នាក់ទៀតឈ្នះបានមេដាយចំនួន៥ គ្រឿង។
សម្រាប់ការឈ្នះបានមេដាយជាច្រើននៃការប្រកួតកីឡាវ៉ូវីណាម ដែលវិញ្ញាសារមួយនេះទើបតែបិទបញ្ចប់ កាលពីថ្ងៃទី១០ ខែឧសភា ឆ្នាំ២០២៣ កន្លងទៅ គឺមានកីឡាការិនីកីឡាវ៉ូវីណាមជម្រើសជាតិកម្ពុជា ពៅ សុខា បានឈ្នះមេដាយចំនួន៥ គ្រឿង ដោយក្នុងនោះរួមមាន មេដាយមាស ៣គ្រឿង ប្រាក់១គ្រឿង និងសំរឹទ្ធិ១គ្រឿង ។
ប្រាកដណាស់ ក្រោយកីឡាការរិនីឆ្នើមរូបនេះធ្វើបានយ៉ាងល្អដូច្នេះ ធ្វើអោយមហាជនជាច្រើនបានកោតសរសើរពីសមត្ថភាព ក៏ដូចជាភាពអង់អាចក្លាយរបស់កម្ពុជា ក្រោយកញ្ញាបានយកឈ្នះដៃគូប្រកួតចំនួន ៥ប្រទេស ។
ជាការពិតណាស់ ក្រោយកីឡាការិនី ពៅ សុខា ទទួលបានមេដាយច្រើនដូច្នេះ មហាជនពិតជាចង់ដឹងហើយថា តើបច្ចេកទេសរបស់កញ្ញាយ៉ាងដូច្នេះ ជាពិសេស គឺយុទ្ធសាស្ត្រនៅកន្លែងប្រកួតតែម្តងថា តើកីឡាការិនីរូបនេះបានប្រើក្បាច់អ្វីពិសេស ដើម្បីទទួលបានជោគជ័យដ៏អស្ចារ្យជូនជាតិមាតុភូមិ ក្នុងនាមជាម្ចាស់ផ្ទះនៃព្រឹត្តិការណ៍ស៊ីហ្គេមលើកទី ៣២នេះ។
តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព កីឡាការនីឆ្នើម កញ្ញា ពៅ សុខា បានពោលថា កញ្ញាពិតជារំភើបខ្លាំងណាស់ ក្រោយពេលដែលកញ្ញាទទួលបានមេដាយរហូតដល់ទៅ ៥គ្រឿងនៃការប្រកួតវិញ្ញាសារកីឡាវ៉ូវីណាម ។ មានវ័យត្រឹមតែ ២៥ ឆ្នាំ កីឡាការនីឆ្នើម ពៅ សុខា មិនត្រឹមតែមានរូបសម្រស់ស្រស់សោភានោះទេ តែនាង គឺជាកីឡាការិនីដែលពេញដោយសមត្ថភាពខ្ពស់ រហូតទទួលបានការកោតសរសើរពីសំណាក់មហាជនសម្រាប់ការខិតខំប្រឹងប្រែងក្នុងនាមជាអត្តពលិកមួយរូបដែលអាចឈ្នះបានមេដាយច្រើនក្នុងព្រឹត្តិការណ៍ស៊ីហ្គេមនៅកម្ពុជា ។
កីឡាការនីឆ្នើម ពៅ សុខា បានបន្តថា មេដាយដែលឈ្នះទាំង៥ ក្នុងនោះរួមមាន មេដាយមាសចំនួន៣ មេដាយប្រាក់ចំនួន១ និងមេដាយសំរិទ្ធចំនួន១ ។ ក្នុងចំណោមមេដាយមាស ដែលកីឡាការិនីរូបនេះទទួលបាន គឺរួមមាន ៖
– មេដាយមាស ១គ្រឿង បានទៅលើវិញ្ញាសា សម្តែងមេគុនដាវនារី ៥នាក់ ។
– មេដាយមាស ១គ្រឿង បានទៅលើវិញ្ញាសា សម្តែងស្នៀតការពារក្រុម បុរស៤នាក់ នារី៣នាក់។
– មេដាយមាស ១គ្រឿង បានទៅលើវិញ្ញាសា សម្តែងស្នៀតការពារខ្លួន ប្រើដាវជាគូ រួមជាមួយកីឡាការិនី សឿ ច័ន្ទលក្ខណា។
– មេដាយប្រាក់ ១គ្រឿង បានទៅលើវិញ្ញាសាសម្ដែងមេគុនដាវ ផ្នែកនារីឯកត្តជន
– មេដាយសំរឹទ្ធ ១គ្រឿង បានទៅលើវិញ្ញាសាសម្ដែងមេគុណចម្រុះ រួមជាមួយនឹងកីឡាការិនី សុខ នីដានុត ។
កីឡាការនីឆ្នើមមកពីរាជធានីភ្នំពេញរូបនេះបានបន្តថា កញ្ញាមានបទពិសោធន៍ឆ្លងកាត់ការហ្វឹកហាត់ និងការប្រកួតកីឡាវ៉ូវីណាមនេះ រយៈពេល១២ឆ្នាំហើយ ហើយកាលពីកន្លែងទៅកញ្ញាក៏ធ្លាប់ជាការនីហែលទឹកដ៏ឆ្នើមផងដែរ។ កីឡាការនីឆ្នើមដែលយកបានមេដាយរហូតដល់ទៅ ៥គ្រឿងបានបន្តថា យុទ្ធសាស្ត្រសម្រាប់ការឈ្នះ សំខាន់បំផុតគឺ ទី១ គឺស្មារតី គិតថា ស្មារតីខ្លួនយើងនឹងក្រុមផ្ទាល់ពេលដែលឡើងទៅលើទីលានប្រកួតគឺសំខាន់ណាស់ ព្រោះទាមទារអោយយើងធ្វើបច្ចេកទេសសម្តែងអោយបានខ្លាំងលឿនច្បាស់ហើយមានភាពស្រុះគ្នា ទី២ បច្ចេកទេសត្រូវតែខ្លាំង ការបច្ចេកស្នៀតត្រូវតែច្បាស់ ការចងចាំស្នៀតគួបផ្សំគ្នា តែអ្វីដែលលើសពីសំខាន់នោះគឺទាមទារអោយយើងហ្វឹកហាត់អនុវត្តន៍វិញ្ញាសាទាំងនោះអោយបានច្រើន ស្តាប់ការកែប្រែចំណុចខ្វះខាតពីគ្នា។
កីឡាការនីឆ្នើមរបស់កម្ពុជាបានបន្ថែមថា កាលដែលយកឈ្នះបានមេដាយជាច្រើននេះ កញ្ញាបានយកឈ្នះលើប្រទេស វៀតណាម ថៃ ឥណ្ឌូនេស៊ី ភូមា និងឡាវ ។ ប៉ុន្តែទន្ទឹមនឹងការយកឈ្នះ កញ្ញាក៏បាននិយាយថា ត្រូវប្រុងប្រយ័ត្នចំពោះ វៀតណាម មីយ៉ាន់ម៉ា និងឥណ្ឌូនេស៊ី ព្រោះកីឡាករ កីឡាការនីបីប្រទេសនេះ សុទ្ធតែខ្លាំងៗ ដូច្នេះត្រូវមានភាពម៉ត់ហ្មត់ក្នុងការប្រកួត។ ការីនីឆ្នើម ពៅ សុខា បានបន្តថា ក្នុងនាមកម្ពុជាជាម្ចាស់ផ្ទះ កញ្ញាពិតជារំភើបលើសពីរំភើប ដោយដែលខ្លួនកញ្ញាបានឈ្នះមេដាយច្រើនដូច្នេះ ពោលក្នុងចិត្តកញ្ញាពិតជារីករាយជាខ្លាំង។
ជាចុងក្រោយ កញ្ញា ពៅ សុខា សូមអរគុណចំពោះការគាំទ្ររូបកញ្ញា ដោយការគាំទ្រនេះហើយ ដែលជាកម្លាំងចិត្តទើបកញ្ញាទទួលបានមេដាយច្រើនដូច្នេះ ៕ ដោយ៖លីហួ គីមឆាយ
ចែករំលែកព័តមាននេះ