ខេត្តព្រះសីហនុ ៖ អ្នករត់ម៉ូតូកង់បី និងម៉ូតូឌុបសរុបប្រមាណ២០០នាក់ បានប្រមូលផ្តុំគ្នានៅទីធ្លាសួនច្បារអតីតមហោស្រពកាលពីព្រឹកថ្ងៃទី១ ឧសភា ដើម្បីតវ៉ា និងដាក់ញត្តិជូនលោកជិន សារិន អភិបាលក្រុងព្រះសីហនុ។ ញត្តិដែលបានដាក់ជូនអាជ្ញាធរក្រុងព្រះសីហនុ គឺសុំឱ្យអនុវត្តឱ្យបាននូវខ្លឹមសារសេចក្តីបង្គាប់ ចុះថ្ងៃទី១៧ ខែធ្នូ ឆ្នាំ ២០១០
ខេត្តព្រះសីហនុ ៖ អ្នករត់ម៉ូតូកង់បី និងម៉ូតូឌុបសរុបប្រមាណ២០០នាក់ បានប្រមូលផ្តុំគ្នានៅទីធ្លាសួនច្បារអតីតមហោស្រពកាលពីព្រឹកថ្ងៃទី១ ឧសភា ដើម្បីតវ៉ា និងដាក់ញត្តិជូនលោកជិន សារិន អភិបាលក្រុងព្រះសីហនុ។ ញត្តិដែលបានដាក់ជូនអាជ្ញាធរក្រុងព្រះសីហនុ គឺសុំឱ្យអនុវត្តឱ្យបាននូវខ្លឹមសារសេចក្តីបង្គាប់ ចុះថ្ងៃទី១៧ ខែធ្នូ ឆ្នាំ ២០១០ របស់សាលាខេត្តព្រះសីហនុ ដោយបិទឱ្យអស់អាជីវកម្មជួលម៉ូតូទៅឱ្យជនបរទេស និងសូមឱ្យតាមដានមើលមន្ត្រីមួយចំនួនតូចដែលតែងតែទទួលលាភសក្ការៈពីម្ចាស់អាជីវកម្មគ្មានច្បាប់ទាំងនេះ ហើយមិនព្រមអនុវត្តតាមសេចក្តីបង្គាប់នោះ។ លើសពីនេះសូមឱ្យអាជ្ញាធរខេត្តចាត់វិធានការបញ្ឈប់ក្រុមហ៊ុនរថយន្តក្រុងប្រមូលភ្ញៀវដល់ផ្ទះសំណាក់ និងសណ្ឋាគារ ដែលបង្កឱ្យមានការកកស្ទះចរាចរណ៍។ រថយន្តក្រុងទាំងនោះធ្វើឱ្យប៉ះពាល់ដល់ការប្រកបរបរទទួលទានប្រចាំថ្ងៃ។
យោងតាមសម្តីអ្នករត់ម៉ូតូឌុបម្នាក់ឱ្យដឹងថា សព្វថ្ងៃនេះគាត់មានការពិបាកប្រកបរបរទទួលទានណាស់ ព្រោះភ្ញៀវទេសចរបរទេសជួលម៉ូតូជិះដោយខ្លួនឯង ហើយពេលត្រឡប់ទៅវិញ រថយន្តក្រុងទៅយកដល់ផ្ទះសំណាក់ និងសណ្ឋាគារទៀត ជាហេតុធ្វើឱ្យពួកគាត់ត្រូវដាច់បាយជាអន្លើ ដូចនេះសូមឱ្យអាជ្ញាធរក្រុង-ខេត្ត បញ្ឈប់សកម្មភាពរថយន្តក្រុងដើរប្រមូលភ្ញៀវ និងអាជីវកម្មជួលម៉ូតូ ទុកឱ្យពួកគាត់មានការងារធ្វើខ្លះផង។ ក្បួនតវ៉ាត្រូវបានរំសាយនៅម៉ោង១០និង៣០នាទីថ្ងៃដដែល បន្ទាប់ពីលោកលី វណ្ណដា អភិបាលរងក្រុងមកទទួលញត្តិ និងសន្យាថា នឹងយកបញ្ហានេះទៅដាក់ជូនអភិបាលក្រុង ដើម្បីរកដំណោះស្រាយដោយយុត្តិធម៌បំផុត៕
ចែករំលែកព័តមាននេះ