រាជធានីភ្នំពេញ ៖ ក្មួយប្រុសបង្កើតម្ចាស់ភោជនីយដ្ឋានយីហោរស្មីសូរិយា ដែលមានទីតាំងផ្ទះលេខ១១Eo ផ្លូវលេខ១០៨ កែងមហាវិថីព្រះនរោត្តម ភូមិទី៤ សង្កាត់វត្តភ្នំ ខណ្ឌដូនពេញ ត្រូវបានខ្សែភ្លើងឆក់ស្លា.ប់ក្រោយពីបញ្ជូនទៅដល់មន្ទីរពេទ្យព្រះកេតុមាលា កាលពីវេលាម៉ោង៥ល្ងាចថ្ងៃទី១ ឧសភា ២០១១
រាជធានីភ្នំពេញ ៖ ក្មួយប្រុសបង្កើតម្ចាស់ភោជនីយដ្ឋានយីហោរស្មីសូរិយា ដែលមានទីតាំងផ្ទះលេខ១១Eo ផ្លូវលេខ១០៨ កែងមហាវិថីព្រះនរោត្តម ភូមិទី៤ សង្កាត់វត្តភ្នំ ខណ្ឌដូនពេញ ត្រូវបានខ្សែភ្លើងឆក់ស្លាប់ក្រោយពីបញ្ជូនទៅដល់មន្ទីរពេទ្យព្រះកេតុមាលា កាលពីវេលាម៉ោង៥ល្ងាចថ្ងៃទី១ ឧសភា ២០១១ ។
មន្ត្រីនគរបាលមូលដ្ឋានបានឱ្យដឹងថា ជនរងគ្រោះដែលត្រូវចរន្តភ្លើងឆក់ស្លាប់មានឈ្មោះឈឿន វណ្ណា ហៅទូច អាយុ១៦ឆ្នាំ ស្នាក់នៅភោជនីយដ្ឋានរស្មីសូរិយា ផ្ទះលេខ១១Eo កែងផ្លូវលេខ១០៨ និងមហាវិថីព្រះនរោត្តម ភូមិទី៤ សង្កាត់វត្តភ្នំ ខណ្ឌដូនពេញ ។ នៅថ្ងៃកើតហេតុ ជនរងគ្រោះ និងកូនម្ចាស់ហាងរួមជាមួយកម្មករម្នាក់ទៀតបានរៀបចំចងបដាបញ្ចុះតម្លៃហូបចុក ហើយពេលនោះយុវជនរងគ្រោះតោងឡើងតាមរបងដែក និងយកដៃកាន់ស្លាកប៉ាណូយីហោអេនឆឺ ស្រាប់តែត្រូវខ្សែភ្លើងឆក់ញាក់ទទ្រើកតែម្តង ។ ភ្លាមៗនោះត្រូវបានបងប្អូនកម្មករជួយទ្រដាក់ចុះក្រោម និងជួយរឹតធ្វើសរសៃ តែជនរងគ្រោះនៅតែមិនដឹងខ្លួន ទើបម្ចាស់ហាងដឹកជនរងគ្រោះតាមម៉ូតូទៅមន្ទីរពេទ្យព្រះកេតុមាលា ក៏ប៉ុន្តែគ្រូពេទ្យប្រាប់ថា យុវជនរងគ្រោះបានស្លាប់បាត់ទៅហើយមុនមកដល់មន្ទីរពេទ្យ។
នគរបាលជំនាញបាននិយាយថា ជនរងគ្រោះឈ្មោះឈឿន វណ្ណា ហៅទូច ពិតជាត្រូវខ្សែភ្លើងឆក់ស្លាប់មែន ព្រោះតាមការពិនិត្យបង្គោលប៉ាណូផ្សាយពាណិជ្ជកម្មស្រាបៀរអេនឆឺនៅមុខហាងរស្មីសូរិយាមានស្នាមខ្សែភ្លើងរលាត់ទើបបណ្តាលឱ្យឆ្លងចរន្តភ្លើងឆក់ជនរងគ្រោះដល់ស្លាប់ ។ សពយុវជនរងគ្រោះត្រូវបានសាច់ញាតិបញ្ជូនទៅធ្វើបុណ្យនៅឯភូមិទន្លេបាទី ឃុំបាទី ស្រុកបាទី ខេត្តតាកែវ កាលពីយប់ថ្ងៃកើតហេតុ៕
ចែករំលែកព័តមាននេះ