ក្រុងប៉ោយប៉ែត ៖ មានការភ្ញាក់ផ្អើលមួយឈុលបានកើតឡើងតាំងពីព្រលឹមស្រាងៗថ្ងៃទី៣០ មេសា នៅក្រុងប៉ោយប៉ែត ធ្វើឱ្យមនុស្សម្នាជាច្រើនបាននាំគ្នាសំរុកមកកាន់វត្តបាលិលេយ្យស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ដើម្បីរកមើលសពដែលពួកគាត់និយាយថា បានឮតៗគ្នាថា មានសពខ្មែរច្រើនត្រូវគេបញ្ជូនពីប្រទេសសៀម
ក្រុងប៉ោយប៉ែត ៖ មានការភ្ញាក់ផ្អើលមួយឈុលបានកើតឡើងតាំងពីព្រលឹមស្រាងៗថ្ងៃទី៣០ មេសា នៅក្រុងប៉ោយប៉ែត ធ្វើឱ្យមនុស្សម្នាជាច្រើនបាននាំគ្នាសំរុកមកកាន់វត្តបាលិលេយ្យស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ដើម្បីរកមើលសពដែលពួកគាត់និយាយថា បានឮតៗគ្នាថា មានសពខ្មែរច្រើនត្រូវគេបញ្ជូនពីប្រទេសសៀម ហើយក៏លេចឮពាក្យនិយាយខុសៗគ្នា ខ្លះថាស្លាប់ដោយសារគ្រោះថ្នាក់ចរាចរណ៍ ខ្លះថាស្លាប់ដោយពុលថ្នាំ ខ្លះថា ស្លាប់ដោយសៀមបាញ់ ។ ប៉ុន្តែការពិតវិញវាគ្រាន់តែជាពាក្យចចាមអារ៉ាមតែប៉ុណ្ណោះ ព្រោះនៅក្នុងវត្តអត់មានសាកសពមនុស្សណាម្នាក់សំរាប់គេមើលឡើយ។
ការភ្ញាក់ផ្អើលខាងលើនេះធ្វើឱ្យបរិវេណវត្ត បាលិលេយ្យមានចំនួនមនុស្សកាន់តែច្រើនឡើងៗ រហូតធ្វើឱ្យអាជ្ញាធរ និងសមត្ថកិច្ចក្នុងក្រុងមានវិធានការភ្លាមៗ ខ្លះធ្វើចរាចរណ៍ និងខ្លះជួយរារាំងសុំកុំឱ្យប្រជាពលរដ្ឋជឿពាក្យចចាមអារ៉ាមនោះតទៀត ព្រោះវាជារឿងមិនពិត។ ជុំវិញការភ្ញាក់ផ្អើលនេះ នៅពេលធ្វើការសួរនាំរកប្រភព គឺគ្មានប្រភពណាច្បាស់ការណ៍ ពីបុគ្គលណាម្នាក់ដែលហ៊ានបញ្ជាក់ថា ខ្លួនដឹងច្បាស់ដោយខ្លួនឯងនោះទេ គឺសុទ្ធតែអះអាងថា ឮពាក្យនោះតៗពីគេតែប៉ុណ្ណោះ។ ប្រជាពលរដ្ឋខ្លះបានខឹងសម្បាទៅនឹងការខាតពេលវេលារកស៊ី និងការចំណាយលុយជិះម៉ូតូឌុបមកមើល អស់ពេលមួយព្រឹកធំ។ ក្រោយពីស្តាប់ការបកស្រាយពីអាជ្ញាធរ និងសមត្ថកិច្ចប្រាប់ថា រឿងនោះជារឿងមិនពិត ទើបនាំគ្នាដកថយ។
ក្នុងហេតុការណ៍ខាងលើដែលមនុស្សម្នាសំរុកមកកាន់តែច្រើនឡើងនោះ គេឃើញខ្លោងទ្វារវត្តត្រូវបានគេបិទ ហើយក៏មានវត្តមានលោកអាន វណ្ណៈ អភិបាលរងក្រុង រួមជាមួយសមត្ថកិច្ចជាច្រើនទៀតបានណែនាំឱ្យប្រជាពលរដ្ឋត្រឡប់ទៅលំនៅឋានរៀងៗខ្លួនវិញ។ ហេតុការណ៍ភ្ញាក់ផ្អើលខាងលើនេះបានកើតឡើងតាំងពីព្រលឹមរហូតដល់ម៉ោងជិត១២ថ្ងៃត្រង់ ថ្ងៃទី៣០ មេសា ទើបមានការថយចុះវិញបន្តិចម្តងៗ។ ចំណែកនៅក្នុងវត្តព្រះសង្ឃមានដាក់មីក្រូបំពងសម្លេងលាន់ឮទ្រហឹងប្រាប់ប្រជាពលរដ្ឋនូវការពិត ទើបពួកគេនាំគ្នាត្រឡប់ទៅផ្ទះវិញ។
លោកឧត្តមសេនីយ៍ត្រី ឌី ផេន នាយករងទីចាត់ការការងារព្រំដែនអគ្គបញ្ជាការ និងជាប្រធានការិយាល័យទំនាក់ទំនងព្រំដែនកម្ពុជា-ថៃប្រាប់កោះសន្តិភាពតាមទូរស័ព្ទថា ការលេចឮព័ត៌មានចចាមអារ៉ាមដែលឈានដល់ការភ្ញាក់ផ្អើល វាជារឿងមិនពិតទេ។ លោកបន្តថា លោកបានឱ្យក្រុមការងារឆែកទៅ ប្រទេសសៀម ហើយ គ្មានទេរឿងបែបនោះ ៕
ចែករំលែកព័តមាននេះ