ក្រុងប៉ោយប៉ែត ៖ ចំណតរថយន្តធំដែលមានឈ្មោះផ្លូវការថា ចំណតបេនចាន ស្ថិតក្នុងក្រុងប៉ោយប៉េតនៅតែបង្កការលំបាកសម្រាប់រថយន្តធំៗចូលចតផ្ទេរ ឬលើកដាក់ទំនិញដដែល ខណៈចំណតមួយនេះគ្មានការអភិវឌ្ឍ បណ្តោយទុកឱ្យស្ថិតក្នុងស្ថានភាពមានភក់ជ្រាំ ឬជន់លិចក្នុងរដូវវស្សាជារៀងរាល់ឆ្នាំធ្វើឱ្យរថយន្តធំៗចតគ្មានសណ្តាប់ធ្នាប់តាមដងផ្លូវ
ក្រុងប៉ោយប៉ែត ៖ ចំណតរថយន្តធំដែលមានឈ្មោះផ្លូវការថា ចំណតបេនចាន ស្ថិតក្នុងក្រុងប៉ោយប៉េតនៅតែបង្កការលំបាកសម្រាប់រថយន្តធំៗចូលចតផ្ទេរ ឬលើកដាក់ទំនិញដដែល ខណៈចំណតមួយនេះគ្មានការអភិវឌ្ឍ បណ្តោយទុកឱ្យស្ថិតក្នុងស្ថានភាពមានភក់ជ្រាំ ឬជន់លិចក្នុងរដូវវស្សាជារៀងរាល់ឆ្នាំធ្វើឱ្យរថយន្តធំៗចតគ្មានសណ្តាប់ធ្នាប់តាមដងផ្លូវ។
ចំណតរថយន្តធំជារៀងរាល់ឆ្នាំ ពិសេសរដូវវស្សាតែងមានការជន់លិចដែលរថយន្តធំៗត្រូវទឹកលិចពាក់កណ្តាលកង់នៅពេលចូលចត។ ដោយឡែកឆ្នាំនេះពុំទាន់ដល់រដូវវស្សាផងគ្រាន់តែភ្លៀងធ្លាក់មួយមេតូចក៏បែកភក់ទៅហើយធ្វើឱ្យរថយន្តធំៗមួយចំនួនបង្វែរទិសដៅចេញទៅផ្ទេរ ឬលើកដាក់ទំនិញតាមដងផ្លូវសាធារណៈវិញធ្វើឱ្យប៉ះពាល់ដល់សណ្តាប់ធ្នាប់សាធារណៈ។ ចំណែករថយន្តធំៗដែលចូលចំណតនោះពេលបើកចេញមកវិញនាំភក់ជ្រាំឡើងមកលើដងផ្លូវជាតិធ្វើឱ្យដីភក់ជ្រុះពេញផ្លូវ លុះពេលស្ងួត ហុយទ្រលោមពេញតាមផ្លូវជាតិ។
ជុំវិញរឿងនេះលោកទ្រី ណារិន អភិបាលនៃគណៈអភិបាលក្រុងប៉ោយប៉ែតប្រាប់តាមទូរស័ព្ទនៅព្រឹកថ្ងៃទី២៩ មេសា ថា ចំណតនោះពុំមែនជាការទទួលខុសត្រូវរបស់សាលាក្រុងទេ គឺមានក្រុមហ៊ុនមួយម៉ៅការអភិវឌ្ឍពីរដ្ឋហើយក្រុមហ៊ុនគ្រប់គ្រងចំណតរថយន្តនៅក្រុងប៉ោយប៉ែត។ ចំណែកតំណាងក្រុមហ៊ុនគ្រប់គ្រងចំណតម្នាក់ប្រាប់តាមទូរស័ព្ទថា ចំណតរថយន្តធំដែលជន់លិច ឬបង្កការលំបាក គឺដោយសារការដាក់ប្រព័ន្ធលូរបស់ក្រុមហ៊ុនមួយទៀតដាក់លូមិនបានល្អទើបបង្កឱ្យទឹកចេះតែមានការកកស្ទះ ចំណែកគោលការណ៍អភិវឌ្ឍដែលត្រូវធ្វើយ៉ាងណានោះពុំត្រូវបានតំណាងក្រុមហ៊ុនបំភ្លឺឱ្យបានច្បាស់លាស់ទេ ៕
ចែករំលែកព័តមាននេះ