ពិតជាក្តុកក្តួលអួលដើម.កខ្លាំងណាស់ ពេលដឹងរឿងរ៉ាវរបស់លោកយាយងងឹតភ្នែកមួយរូប លោកយាយរងទុក្ខប្រមាណជា៥ឆ្នាំហើយ ដោយមូលហេតុភ្នែករបស់លោកយាយងងឹតទាំងសងខាង មើលពុំឃើញ ពោលគឺ
ខេត្តកំពត ៖ ពិតជាក្តុកក្តួលអួលដើម.កខ្លាំងណាស់ ពេលដឹងរឿងរ៉ាវរបស់លោកយាយងងឹតភ្នែកមួយរូប លោកយាយរងទុក្ខប្រមាណជា៥ឆ្នាំហើយ ដោយមូលហេតុភ្នែករបស់លោកយាយងងឹតទាំងសងខាង មើលពុំឃើញ ពោលគឺពិតជាអាណិតលោកយាយជាពន់ពេកកន្លង។ លោកយាយងងឹតភ្នែកទាំងសងរូបនេះ រងទុក្ខនៅភាពលំបាកជាច្រើន ដូចជា ៖ ការហូបចុក រកព្រឹកហូបឆ្អែត រកល្ងាចហូបពុំគ្រាន់ ហើយពេលខ្លះហូបតែបាយទទេក៏មានដែរ។
ក្រៅពីភាពខ្វះខាត លោកយាយដ៏កម្សត់រូបនេះ ថែមទាំងមានជំងឺប្រចាំកាយទៀតផង ដូចជា ជំងឺក្រពេះ ពោះវៀន លើសឈា.ម និងអ្វីដែលជាបន្ទុកដ៏ធ្ងន់ធ្ងររបស់លោកយាយនោះ គឺភ្នែកទាំងសងខាងមើលពុំឃើញ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោកពន្លឺ ដែលជាអ្នកជិតខាងរបស់លោកយាយ បានជម្រាបជូនថា លោកយាយដែលកម្សត់រូបនេះមានឈ្មោះ អ៊ឹម ស៊ីថា។ លោកយាយមានភាពក្រលំបាកជាខ្លាំង ដោយភ្នែកងងឹតមើលមិនឃើញ ប្រកបរបរក្រងស្បូវលក់ ដើម្បីបានថវិកាខ្លះៗទុកគ្រាន់ហូបចុកដោះស្រាយជីវភាព និងមើលជំងឺប្រចាំកាយ។
បើតាមលោកយាយ អ៊ឹម ស៊ីថា បាននិយាយថា «ឆ្នាំនេះ ខ្លួនលោកយាយមានអាយុ៧៤ឆ្នាំហើយ លោកយាយរស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។ លោកពិតជាលំបាកខ្លាំងណាស់ ក្រោយពេលលោកយាយធ្លាក់ខ្លួនមានជំងឺប្រមាណជា៥ឆ្នាំមកនេះ ភ្នែករបស់លោកងងឹតទាំងសងខាង ព្រោះតែជំងឺឡើងបាយ និងកន្ទុយថ្លែនជាដើម ពោលគឺក្រោយពេលភ្នែកមើលពុំឃើញ លោកយាយកាន់រងនូវភាពលំបាកមួយកម្រិតទៀត»។
លោកយាយមេម៉ាយរូបនេះ បន្តថា «លោកយាយសុំអោយបងប្អូនមហាជនជូនលោកយាយផង ព្រោះភ្នែករបស់លោកយាយងងឹកមើលពុំឃើញ ដូច្នេះក្តីបំណងដ៏ធំរបស់លោកយាយនោះ គឺការបកភ្នែក ដើម្បីមើលឃើញពិភពលោកជាថ្មីម្តងទៀត»។
លោកយាយដែលរស់នៅផ្ទះក្រាមដំបូលធ្លុះធ្លាយ បានបន្តថា «ពេលដែលលោកយាយងងឹតភ្នែកដូច្នេះ លោកយាយពិតលំបាក ដោយពេលដាំបាយ លោកយាយត្រូវរាវដៃលាងអង្ករ បង្កាត់ភ្លើង ពោលគឺសភាពដៃរបស់លោកយាយរងការរលាកជាច្រើនកន្លែង ទម្រាំបានបាយហូបម្តងៗ»។
លោកយាយរូបនេះបន្តថា «សព្វថ្ងៃនេះ លោកយាយប្រកបរបរក្រងស្បូវ បើទោះជាលោកយាយងងឹតភ្នែកក៏ដោយ ក៏លោកយាយត្រូវទៅច្រូតស្បូវជាមួយចៅ ដោយចៅជាអ្នកនាំផ្លូវពីមុខ។ ខណៈនៅពេលច្រូតរួច ត្រូវក្រងជាកណ្តាប់ ដោយមួយកណ្តាប់លក់បាន ១០០០រៀល ហើយក្នុងរយៈពេល១ថ្ងៃ លោកយាយក្រងបាន១៥កណ្តាប់ គឺ ១៥០០០រៀល»។ លោកយាយបន្ថែមថា «ពេលខ្លះក្រងបានហើយ លក់មិនដាច់ទៀតក៏មានដែរ»។
បើតាមការបង្ហើបរបស់លោក ពន្លឺ វិញ ដែលជាអ្នកជិតខាង ក៏បាននិយាយដែរថា នៅពេលមេឃភ្លៀងម្តងៗ លោកយាយពួនសង្ងំនៅក្រោមគ្រែ មិនហ៊ានចេញមកក្រៅ ហើយដំបូលក៏ធ្លុះធ្លាយទៀត ពោលគឺក្រោយពេលឃើញសភាពរបស់លោកយាយ ពិតជាលំបាកលើសពីលំបាកទៅទៀត។ លោកពិតជាសង្រេងចិត្ត ចំពោះលោកយាយជាខ្លាំង។ ជាចុងក្រោយ លោកសុំអោយមហាជនជួយលោកយាយផង ដោយក្តីបំណងដ៏ធំរបស់លោកយាយនោះ គឺការបកភ្នែក ដោយចង់មើលឃើញជាថ្មីម្តងទៀត៕ ដោយ ៖ លីហួ គីមឆាយ
ចែករំលែកព័តមាននេះ