ខេត្តកំពង់ស្ពឺ ៖ ករណីគ្រោះថ្នាក់ចរាចរណ៍រថយន្តម៉ាកហាយឡែនឌ័រ បានបុកពីក្រោយរថយន្តម៉ាកព្រូស នៅលើផ្លូវល្បឿនលឿន បណ្តាលឲ្យរងរបួសស្រាលមនុស្ស០២នាក់ ។
ហេតុការណ៍គ្រោះថ្នាក់ចរាចរណ៍ខាងលើនេះកើតឡើងកាលពីវេលាម៉ោង១៥និង៤០នាទី ថ្ងៃទី០១ ខែឧសភា ឆ្នាំ២០២៣ លេីផ្លូវល្បឿនលឿន គីឡូម៉ែត្រ៨១ ត្រង់ចំណុចភូមិទឹកចេញ ឃុំយាយម៉ៅពេជ្រនិល ស្រុកភ្នំស្រួច ។
បើយោងតាមស្នងការដ្ឋាននគរបាលខេត្តកំពង់ស្ពឺ បានអោយដឹងថា រថយន្ត០១គ្រឿង ម៉ាកហាយឡែនឌ័រ ពណ៌ទឹកមាស ពាក់ស្លាកលេខភ្នំពេញ2BA-7035 បើកបរដោយឈ្មោះ ចន ចេម ភេទប្រុស អាយុ២១ឆ្នាំ នៅភូមិសំបូរ ឃុំអង្គរសរ ស្រុកមេសាង ខេត្តព្រៃវែង បើកបរពីទិសខាងលិចទៅទិសខាងកើត ដល់ចំណុចខាងលើបានបុកពីក្រោយរថយន្ត០១គ្រឿង ម៉ាកPrius ពណ៌ទឹកប្រាក់ ពាក់ស្លាកលេខភ្នំពេញ2AW-8684 បើកបរដោយឈ្មោះ ឆេង ធិ ភេទប្រុស អាយុ៣៤ឆ្នាំ នៅភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ក្នុងដំណើរស្របទិសគ្នា ។
គ្រោះថ្នាក់ចរាចរណ៍នេះបណ្តាលឲ្យគ្រោះថ្នាក់មនុស្សរបួសស្រាល០២នាក់ ស្រី០១នាក់ ខូចខាតរថយន្តទាំង ០២គ្រឿង និងខូចខាតរបាំងដែកលើផ្លូវល្បឿនលឿន ។
ស្នងការដ្ឋាននគរបាលខេត្តកំពង់ស្ពឺ បញ្ជាក់ថា ចំពោះមូលហេតុ គឺការបេីកបរក្នុងល្បឿនមិនសមាមាត្រនិងគម្លាតចម្ងាយនៃល្បឿនរថយន្ដ គន្លងយឺតចន្លោះពី ៦០-៨០ ចន្លោះគន្លងវ៉ាជែងចាប់ពី ១០០-១២០ គីឡូម៉ែត្រក្នុងមួយម៉ោង ។
ចំពោះវត្ថុតាងរថយន្តទាំង២គ្រឿងត្រូវក្រុមហ៊ុនល្បឿនលឿន ស្ទូចយកមករក្សាទុកនៅស្នាក់ការ K114 (កំពង់សីលា) ដើម្បីចាត់ការបន្តតាមនីតិវិធី៕
ចែករំលែកព័តមាននេះ