បញ្ហាទំនាស់ដីធ្លី រហូតឈានដល់ដើមបណ្តឹងយកអេស្កាវ៉ាទ័រមកកាយកម្ទេចផ្ទះចោលអស់ចំនួន៣ខ្នង ក្នុងចំណោម១៣គ្រួសារនោះ ពេលនេះត្រូវបានដោះស្រាយបញ្ចប់ជាស្ថាពរហើយ កាលពី
ខេត្តបន្ទាយមានជ័យ ៖ បញ្ហាទំនាស់ដីធ្លី រហូតឈានដល់ដើមបណ្តឹងយកអេស្កាវ៉ាទ័រមកកាយកម្ទេចផ្ទះចោលអស់ចំនួន៣ខ្នង ក្នុងចំណោម១៣គ្រួសារនោះ ពេលនេះត្រូវបានដោះស្រាយបញ្ចប់ជាស្ថាពរហើយ កាលពីថ្ងៃទី២៩ ខែមេសា ឆ្នាំ២០២៣ នៅសាលប្រជុំសាលាក្រុងប៉ោយប៉ែត។
ក្រោយទំនាស់ដីធ្លីបានកើតអស់រយៈពេលជិត២០ឆ្នាំ រវាងប្រជាពលរដ្ឋចំនួន១៣គ្រួសារ ស្មើនឹង១៣ខ្នងផ្ទះ ជាមួយលោក ទិត្យ លេខ ជាដើមបណ្តឹង ដែលទទួលមរណភាពហើយ រួចក៏ប្រគល់ឱ្យលោកស្រី លី ម៉ារី ជាប្រពន្ធដើមបណ្តឹង ហើយបានប្តឹងផ្តល់គ្នាពីសាលាដំបូងខេត្ត ដល់សាលាឧទ្ធរណ៍ និងរហូតដល់តុលាការកំពូលទៀត ក្រោយមកត្រូវបានដើមបណ្តឹងឈ្នះ។
លុះនៅថ្ងៃទី២៦ ខែមេសា ឆ្នាំ២០២៣ ដើមបណ្តឹង រួមនឹងមន្ត្រីសមត្ថកិច្ចចម្រុះ បានដឹកនាំយកគ្រឿងចក្រប្រភេទអេស្កាវ៉ាទ័រ១គ្រឿងមកកាយកម្ទេចចោលផ្ទះប្រជាពលរដ្ឋអស់ចំនួន៣ខ្នងនៅផ្នែកខាងកើត បណ្តាលឱ្យខ្ទេចគ្មានសល់ ដោយមិនអាចយកសម្ភារៈទាន់នោះទេ និងខូចខាតម៉ូតូអស់២គ្រឿង, កង់១គ្រឿង។ ក្រោយមកត្រូវបានប្រជាពលរដ្ឋចំនួន១៣គ្រួសារ តវ៉ារហូតក្លាយជាហិ.ង្សាយកដំថ្មគប់ទៅលើអេស្កាវ៉ាទ័រ បណ្តាលឱ្យបែកកញ្ចក់ ទើបដកថយទៅវិញ។
ភ្លាមៗនោះផងដែរ ក៏ឃើញវត្តមានឯកឧត្តម អ៊ុ រាត្រី អភិបាលខេត្ត និងលោក ង៉ោ ម៉េងជ្រួន អភិបាលរងខេត្ត និងអាជ្ញាធរក្រុង-សង្កាត់ ចុះមក ដោយឯកឧត្តមអភិបាលខេត្តទទួលបទបញ្ជាថ្នាក់លើអោយរុះរើ កម្ទេចផ្ទះចេញ ហើយត្រូវកសាងផ្ទះ១ល្វែង ដែលមានទទឹង៤ម៉ែត្របណ្តោយ៦ម៉ែត្រ ប្រក់ស័ង្កសី ចែកជា៣បន្ទប់លើដីចាស់ជាបណ្តោះអាសន្ន ជាថវិការផ្ទាល់ខ្លួនលោក ហើយរង់ចាំការដោះស្រាយបញ្ចប់ ទើបអនុវត្តបន្ត។
ជាក់ស្តែងនៅថ្ងៃទី២៨ ខែមេសា ឆ្នាំ២០២៣ លោក ង៉ោ ម៉េងជ្រួន អភិបាលរងខេត្ត និងលោក គាត ហ៊ុល អភិបាលក្រុង និងមន្ត្រីជំនាញពាក់ព័ន្ធ បានអោយប្រជាពលរដ្ឋ១៣គ្រួសារជួបដោះស្រាយគ្នាជាមួយដើមបណ្តឹង គឺលោកស្រី លី ម៉ារី តែគ្មានលទ្ធផល។
លុះនៅថ្ងៃទី២៩ ខែមេសា ឆ្នាំ២០២៣ ឯកឧត្តម ប៉ាន់ ខែមប៊ុនថន នាយរងខុទ្ទការល័យសម្តេចតេជោ ហ៊ុន សែន និងលោក ង៉ោ ម៉េងជ្រួន និងលោក គាត ហ៊ុល បានអញ្ជើញប្រជាពលរដ្ឋ១៣គ្រួសារ និងលោកស្រី លី ម៉ារី ដើមបណ្តឹង ចូលជួបប្រជុំរកដំណោះស្រាយ ហើយត្រូវបានបញ្ចប់ ដោយប្រជាពលរដ្ឋចំនួន១៣គ្រួសារទទួលយកការដោះដូរទីតាំងថ្មី ដោយមួយគ្រួសារទទួលបានដី ដែលមានទទឹង៤ម៉ែត្រ និងបណ្តោយ២០ម៉ែត្រ ស្ថិតនៅភូមិមិត្តភាព សង្កាត់-ក្រុងប៉ោយប៉ែត៕
ចែករំលែកព័តមាននេះ