រាជធានីភ្នំពេញ ៖ នៅព្រឹកថ្ងៃទី១ ឧសភា ២០១១ ជាថ្ងៃទិវាពលកម្មអន្តរជាតិ សហជីព និងសមាគមចំនួន៨ ដែលមានកម្មករ កម្មាការិនីចូលរួមប្រមាណជាង២.០០០នាក់ បាននាំគ្នាកាន់បដាពាក្យស្លោក និងដង្ហែក្បួនតាមបណ្តោយវិថីព្រះស៊ីសុវត្ថិឆ្ពោះទៅរដ្ឋសភាដើម្បីដាក់ញត្តិជូនរដ្ឋសភា និងនាយករដ្ឋមន្ត្រីសុំឱ្យយកចិត្តទុកដាក់ដល់ការងារផលប្រយោជន៍កម្មករ និងកំណែទម្រង់សេដ្ឋកិច្ច ។
ពិធីដង្ហែក្បួនដើម្បីជូនញត្តិដល់រដ្ឋសភា និងនាយករដ្ឋមន្ត្រីបានចេញដំណើរពីមុខក្រុមប្រឹក្សាអភិវឌ្ឍន៍ឆ្ពោះទៅរដ្ឋសភាជាតិដឹកនាំដោយសហភាពការងារកម្ពុជា សម្ព័ន្ធសហជ័ពប្រជាធិបតេយ្យ កម្មករកាត់ដេរកម្ពុជា សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធសហព័ន្ធសហជីពកម្មករចំណីអាហារ និងសេវាកម្មកម្ពុជា សមាគមមន្ត្រីរាជការឯករាជ្យកម្ពុជា សមាគមកសិករដើម្បីសន្តិភាព និងអភិវឌ្ឍន៍ និងសហព័ន្ធសហជីពកម្មករសំណង់ និងព្រៃឈើកម្ពុជា ។ ក្រោមប្រធានបទ «យើងទាំងអស់គ្នាត្រូវការសេរីភាពសមាគម សហជីព និងប្រាក់ឈ្នួលសមរម្យ» ។
ញត្តិនោះសហជីពនិងសមាគទាំង៨បានសំណូមពរដល់ប្រធានរដ្ឋសភា និងនាយករដ្ឋមន្រ្តី សូមឱ្យរាជរដ្ឋាភិបាលចាត់វិធានការយ៉ាងម៉ឺងម៉ាត់ និងមានប្រសិទ្ធភាពបំផុតដូចមានចែង ក្នុងច្បាប់ជាតិ និងអនុសញ្ញាអន្តរជាតិ ចំពោះការប្រឆាំងរើសអើងសិទ្ធិសេរីភាពសហជីព និងសូមដាក់ឱ្យក្រុមហ៊ុនទាំងអស់បញ្ឈប់ការប្តឹងថ្នាក់ដឹកនាំសហជីពទៅតុលាការ ការប្តឹងជំទាស់នឹងបញ្ជិកាសហជីពនិងការដាក់សំពាធផ្សេងៗទៅអ្នកដឹកនាំសហជីព ជាពិសេសក្រុមហ៊ុនមួយចំនួនរាជរដ្ឋាភិបាលត្រូវបញ្ឈប់រាល់ការប៉ុនប៉ងបង្កើតច្បាប់ដែលរឹតត្បិត សេរីភាពសហជីពសមាគមនិងអង្គការមិនមែនរដ្ឋាភិបាល រាជរដ្ឋាភិបាលត្រូវកំណត់ប្រាក់ឈ្នួលរស់នៅសមរម្យសំរាប់គ្រប់វិស័យ ជាពិសេសវិស័យសេវាកម្ម និងសំណង់ រាជរដ្ឋាភិបាលត្រូវដាក់ចេញនូវការសំរេចមួយឱ្យក្រុមហ៊ុនទាំងអស់បញ្ឈប់ការប្រើប្រាស់កិច្ចសន្យាខ្លី និងម៉ៅការបន្តខុសច្បាប់ សូមរាជរដ្ឋាភិបាល និងនិយោជកបញ្ឈប់ការប្រើប្រាស់ប្រព័ន្ធតុលាការដើម្បីគំរាមគំហែងចាប់ខ្លួន សកម្មជនសហជីពនិងសកម្មជនសិទ្ធិមនុស្សសូមឱ្យមានការដោះលែងលោកសួស ចន្ថា ប្រធានសហជីពឱ្យមានសេរីភាពវិញ ព្រោះជាការចោទប្រកាន់ដ៏អយុត្តិធម៌ រាជរដ្ឋាភិបាលត្រូវចាត់វិធានការឱ្យមានប្រសិទ្ធភាពចំពោះក្រុមហ៊ុនចំនួន១៣ឱ្យទទួលយកកម្មករចំនួន១៤០នាក់ ដែលបានបញ្ឈប់ដោយសារតែការចូលរួមធ្វើកូដកម្មទាមទារប្រាក់ឈ្នួលកាលពីថ្ងៃទី១៣-១៤-១៥-១៦ ខែកញ្ញា ឆ្នាំ២០១០ កន្លងទៅឱ្យចូលធ្វើការវិញ។ រាជរដ្ឋាភិបាលត្រូវបង្កើតតុលាការការងារដើម្បីធានាដល់យុត្តិធម៌ការងារនៅកន្លងសង្គមឱ្យបានឆាប់ រាជរដ្ឋាភិបាលត្រូវគ្រប់គ្រង និងពង្រឹងប្រព័ន្ធសុខភាព សុវត្ថិភាពនៅកន្លែងការងារ និងប្រព័ន្ធសន្តិសុខសង្គមសំរាប់កម្មករគ្រប់វិស័យ ជាពិសេសវិស័យសំណង់សេវាកម្មនិងអ្នករើសសំរាម។ រាជរដ្ឋាភិបាល ត្រូវរៀបចំបញ្ចុះតំលៃប្រេងសាំងមកត្រឹម៣.០០០រៀលក្នុងមួយលីត្រនិងតំលៃទំនិញទីផ្សារដែលតំរូវការចាំបាច់របស់ប្រជាពលរដ្ឋ.រាជរដ្ឋាភិបាលត្រូវពិនិត្យឡើងវិញចំពោះមន្រ្តីនគរបាលចរាចរណ៍ ដែលបង្ខំនិងផាកពិន័យលើសពីច្បាប់កំណត់៕
ចែករំលែកព័តមាននេះ